Scolina d'Al Plan y ater

Data

23 de dezember 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Do avëi lit l'articul de Pablo t'La Usc di 15.11.2019, nr. 45, m'ái ponsé da fá y scrí na mia conscidraziun sön chësc tema dla scolina. Che al vá debojëgn da fá locai por na 4a seziun tla scolina d'Al Plan é tler, che al é da ressané le tët é ince tler, y che al é dërt da baraté fora les finestres y les portes ne striti nia jö. An pó dí che, do proiet, pón partí sö i laurs te trëi lóc y porchël jissera da nen realisé un al iade; chësc ésson messü baié cun l'architët y fá aladó che an ess podü realisé n lót al ann, zënza messëi jí intoronn a chirí locai y trá sotissura döta la scolina. Ciodí pa nia fá le pröm lót, la 4a seziun y ciasa di pici, te n corp de costruziun su, zënza messëi spaché la scolina? An podess pö colié chësta 4a seziun, a laurs fac, ala scolina vedla cun n pice porte. Le secundo lót, le tët y ampliamënt dl sotletët, vára da fá ti mëisc da d'isté, y le terzo lót, baraté finestres y portes y mëte l'isolaziun al frabicat, pón fá l'isté do. Al ne me sá nia dërt y trasparënt da cherdé ite les families, maestres y autorités dla scolina ladina canche an á bele dé ia i laurs da fá.
Maestres y geniturs dess podëi dí la süa, mo cina che ara vá da cambié le proiet; dedó é le fin dla incuntada döt n ater. Iö ne sá nia co che l'aministraziun s'imaginëia da jí cun passa 80 de pici mituns te d'atri frabicac y d'atri locai che n'á nia i sorvisc igenics – sanitars adatá por i pici, n'á nia la lerch y magari gnanca le cialt y la löm che ai adora. Al é ma n »caje d'emergënza« vëgnel dit, i pici ne conësc nia chëstes döes parores, tan deplü vál porchël debojëgn da baié fora denant le program de n gran laur, te chësc caje la scolina. L'architët mëss fá n proiet de düc i laurs comaná, ince por che l'aministraziun conësces les spëises por mëte a bilanz, por podëi damané finanziamënc y contribuc, mo al speta a chësta porté dant a d'ël i problems che vëgn tres le frabiché y l'aministraziun mëss ince ponsé ales conseguënzes de laur por les maestres, a na sistemaziun da se sté saurí por i pici dla scolina. Che dij pa che döt mëss gní fat te n iade?
Al me sá spo ince demorvëia che söl retrat che é sot l'articul mancel trëi assessurs. Pla presentaziun de n proiet cun na opera de n cost de 2,5 miliuns de euro, ci che é do mia minunga esageré, s'aspetasson bëgn plü interes da pert dla Junta, él pö tles mans de chësta, adöm al diretur di laurs, döt le procedere aministratif y organisatif. Sëgn spontan me tomel ite n pinsier: co fossera pa sce an fajess ince cun i assessurs desche an fej cun döt le personal de Comun? Chësc ciafa n iade al ann paié fora na premia de produtivité, desche an dij, basada söla retribuziun dl livel funzional. Le 40% é fis y l'ater 60% pó gní paié fora deplëgn o ince demanco, aladó che al é gnü valuté bun o manco bun le laur fat ia por l'ann dal impiegat/a o laurant/a; ma che cun chësc sistem él prigo da rové tla descriminaziun y ofenüda dla dignité dla porsona, suradöt sce an n'á nia pla valutaziun ogetivité y se lascia trá ite tl monn dles simpaties por chësc o por chël. Sce la valutaziun n'é nia coreta, iüsta y ogetiva, spo él miú y dërt da ti dé a düc l'import deplëgn.
Mo i me pënsi che le sistem da paié fora l'indenité d'inciaria do le sistem dl paiamënt dla premia de produtivité (ince 50/50%) ne foss nia tan damat y podess ester na inzentivaziun por i assessurs; ma che mi pinsier é y romagn na »utopia«, porciodiche chiló él la Regiun che á la competënza da fá la lege. Y desche an alda y pó lí ti foliec, á la Regiun TN-Südtirol indó intenziun da ti sciuré do scioldi publics ai politics. Sce an baia ince da i dé na pensiun ai ombolc spo sunse a öna, a condiziun che ai ciafes la pensiun desco n laurant cun 20 agn de contribuc y a 67 agn d'eté. Plü che an scraia dles iniustizies, plü che la püra jënt se stënta ala fin dl mëis, plü che i politics ciafa privilegs. En festa dl Cör de Gejú se recordon te nosta provinzia dla fede, di valurs cristiagn y culturai che nüsc antenac á defenü ples batales de liberaziun de Tirol y an renovëia les impormetüdes. Na buna cossa, mo ci él pa dedó? Al ne joa gnanca plü supliches, i jun intres plü sot y chësc fej sté mal bele moralmënter tröpa jënt. Sperun sön tëmps che se lascia indó crësce plü umanité. Impó: n Bun Nadé!  (Stachio Erlacher, Al Plan de Mareo)

Galaria retrac