Savëis'a chiche ie son?

Data

26 de dezember 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La religion ie zeche de speziel, dantaldut te nosta valeda. Tl tëmp d'Avënt devënta l dualism ti jëuni mo plu sterch che no tl rest dl ann: sons'a ie fat per la dlieja o no? La majera pert dijëssa de no, mpo ne pudëssa San Martin, San Miculau, la ueia de Nadel y nsci inant nia mancë. La tradizions ie mpurtantes per nëus, chëles cristianes y sambën nce l'autres, la garejedes de Copa dl Mond, mé per dì.
Śën de dezëmber iel iusta stat San Miculau, y nce tlo àn udù la pert positiva y negativa. L bel dla stua tizeda y la familia senteda doite, che aspitova, do che l fant ova sunà, che na usc bassa ëssa cunedì: »Bona sëira, savëis'a vo chiche ie son?« L respet che i mutons à abù y à uni ann de viers de chësta persunalità ne n'ie nia da crëier, n zitramënt y l mus ruvënt, che semea che i ëssa fat na trifa, mé che ëi savova y sà che l ie mo piec: l ti univa y vën trat dant dut chël che i à fat ntan dut l ann.
Sce n vëija la situazion de San Miculau da dedora, sce n ne cunescëssa nia la usanza, fossa la situazion bën mpo bëndebo' manaceda, perchël me scusi sce a vel' letëur ti sà chësc de massa.
L fat che n jëunn se tira sëura da vedl y vën nsci lascià ite te uni stua, ie bën mpue' ncherscëul. Riesc do che l ie ite te cësa ti damàndel pona a na tel jëuna sce la ti tën l fust. OK, śën éi bën scumencià cun zeche de pesoch. La urità ie che i genitores ti nsënia ai mutons a ne ti avëi nia crëta a chëi che i ne cunësc nia, dantaldut nia a de tei che dà dant de vester zachei d'autri che i ne n'ie, ma San Miculau possa fé dut. I biei angiuli che sta dlongia su ti cëla cun na nvidia ala jëunes che possa ti tenì l fust, ntan che l jëunn dij na urazion. A jì do l schema tlassich, vëniel śën damandà sce zachei cunësc pa la storia dl vëscul.
»Sci, nëus l'on mpareda a scola: L fova n iede n jëunn, scialdi da ulëi bon, che ti dajova scincundes a duta chëles che n ova debujën,« conta na muta. De n tel samaritan n ëssa bën mo al didancuei una debujën. Mpo ne n'ie la coreografia mo nia fineda. Nce ch'i mëndri muessa mustré cieche i sà da fé: un cianta, l auter sofla te n flaut o dij su n trëi rimes audides uni ann. Nscila rùven pra la bela pert, che ie l liber. Dan duc vëniel dit tan bon y tan rie che un ie, sce l ti fej mel al auter o l smiela, l vën cunedì che l unirà l malan cun la scurieda y mpo giapa duc na lauda. N ne se nfida doite mpo nia a dì mé chël che l auter à fat fauz. Finan via l pitl teater ie duc mé plu sun i jenodli che prëia. Sce la tradizion ie tan drëta ne sà deguni, mpo la tenirons inant, uniun cun si uedli. Halleluja!  (Barbara Runggaldier, Sëlva/Viena)

Galaria retrac