La Usc di Ladins

Che la presciun fiscala sides massa alta tambëgn a livel statal che ince a livel local, s'un á anadé oramai düc! La soferënza dl'economia taliana é ince gaujada da chësc. Al ó ester n arbassamënt dl livel dles cutes por favorí l'iniziativa economica privata. I n'orun chiló nia jí ite sön chëra che é la problematica nazionala, mo orun resté a chëra locala di comuns.

I comuns se finanziëia en pert cun trasferimënc, tl caje de nüsc comuns suradöt trasferimënc dala Provinzia y de entrades propries. Danter chëstes podunse recordé l'Imi, Ica, i contribuc de costruziun (canche an frabichëia), entrades plü desvalies por sorvisc sciöche chël dl refodam y chël dl'ega, o cutes che vëgn spo trasferides a d'atri ënc, sciöche la cuta de sojornanza.

Che ince te chësc caje é les cutes massa altes é feter düc a öna, mo al é n tema püch aziché, ajache lauré cun manco ressorses se damana da lauré damí. An n'á ciamó tanco mai aldí te campagna litala comunala propostes por smendrí les cutes locales, sciöche sce an se temess da afronté chësc tema. I me augüri che i candidac da ombolt y les listes che i sostëgn mëtes man da afronté chësta tematica, ajache i Comuns mëss s'ausé da lauré te na manira plü efiziënta.

Ne podun nia brancé tres tles gofes dl contribuënt. Jí vára da fá tröp. Sce an fej jö valgügn cunc spo pón dí, zënza se falé de tröp, che an pó garantí la medema cualité cun n smendrimënt dles cutes locales danter le 10 y le 20%.
Vigni bun aministradú mëss avëi propostes concretes por le smendrimënt dles cutes, y les capazités por le porté inant.
An pó ma se auguré che chësc sides un di temesc dles proscimes campagnes litales ti comuns ladins.  (Albert Pizzinini, La Ila)