La Usc di Ladins

Les portes é dagnora davertes ti confrunc de posiziuns di atri, mo te chësc caje él na mancianza de »respet« ti confrunc dles maestres, dla scora ladina y dl'istituziun dla Republica Taliana. Iö dijess bëgn de ti fá na lauda ala scora, ales insegnantes y düc i geniturs de sciöche ai á gestí l'emergënza. Te chësc tëmp nia saurí él sté les maestres che á fat n gran laur por le bëgn dla sozieté, porvan de adoré na didatica, metologia y dantadöt na gran empatia por daidé dötes les families. Cun pici vari de por de sunse düc stá bugn da arjunjé tröp.
Düc nos sperun indó da se incunté da d'altonn y no ma dan da n monitor sciöche sëgn, mo por na scora che funzionëies bun adorunse la colaboraziun de düc, maestres, scolars y geniturs.  (Rudi Moling, La Val)