Tuta de posiziun »Nou al lech sön Piz Sorega«

Data

01 de jugn 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
En referimënt al articul d'La Usc di Ladins cun le titul »Nou al léch sön Piz Sorega« publiché ai 15.05.2020 (y ince en referimënt ai ultimi articui gnüs fora söl »Alto Adige«) sintiunse le dovëi da injunté n valgönes informaziuns importantes che é ince gnüdes dites tratan la sentada dl Consëi de Comun de Badia, mo n'é nia gnüdes cuntades cina ala fin. Le tema dl léch de Piz Sorega é sté dessigü un di temesc plü cialc tl ultim Consëi de Comun. Al é gnü baié tröp sön la segurëza dla infrastrotöra y dl ambiënt cina a rové a baié dl debojëgn de na infrastrotöra che garantësc inevamënt dles pistes por les proscimes sajuns da d'invern.
Püces parores é gnüdes dites y dedó ince scrites ti foliec por ci che reverda la litaziun dl proiet. Na aconsiadëssa á damané da podëi fá na litaziun socrëta, la dezijiun é gnüda aprovada spo da 5 mëmbri dl Consëi.
Sön la domanda dla litaziun socrëta á i mëmbri dla lista »Manfred Canins Ombolt« fat la proposta da sposté la dezijiun dl proiet a do les lítes comunales, che oress dí, al Consëi de Comun nü, por ne fá nia deventé la litaziun dl proiet n stromënt de propaganda politica por les proscimes lítes comunales.
Insciö foss la dezijiun dla mudaziun al plan urbanistich gnüda tuta ogetivamënter, zënza la moscedé cun chestiuns politiches. La proposta é gnüda refodada, don insciö n resultat plütosc nia da capí. Le resultat dla litaziun fej dër ponsé che la dezijiun é bele gnüda ponsada danfora. La Junta instëssa ne s'á bonamënter nia tigní a ci che ai á bele lité te Junta l'ann denant (l'assessuria al turism ê assënta). Ci él pa cambié?
Al é ince demorvëia che l'ombolt n'á nia tut posiziun sön le proiet dl léch, aladó che te Junta êl bele gnü tut na dezijiun l'ann denant.
Al nes desplej dër da odëi che les sentades dl Consëi de Comun vëgn sëgn anuzades por fá propaganda politica, a chësta moda pó n valgönes domandes gní sciurades zoruch y d'atres ne pó nia gní tratades coretamënter y ogetivamënter. Chi che nen paia sura é spo le privat, la sozieté, o te chësc caje ince indiretamënter le turism instës cun l'economia.
Dessigü dál da ponsé che les 6 usc por le léch é tosc cumpedades, mo chi che dij sön i foliec de avëi lité positivamaënter é sambëgn deplü. I numeri fala y la propaganda (manco iüsta) jora.  (Por la lista »Manfred Canins Ombolt«, i aconsiadus Claus Fistill, Raimund Irsara, Egon Ploner)