Cun n test plütosc confus y nia da capí – dantadöt por chi che n'é nia informá bun sön les chestiuns – se baudia Claus Fistill, Raimund Irsara y Egon Ploner, che é te Consëi de Comun sciöche mëmbri de mia lista (la lista »Manfred Canins Ombolt« n'é pö gnanca rapresentada te Consëi) ch'al n'é nia gnü azeté la proposta da sburlé a do les lites la domanda da aprové le proiet dl léch artifizial nü sön Piz Sorega. Vignun pó sambëgn avëi süa minunga, mo dessigü ne pó degügn aconsiadus de Comun jí cuntra la lege o cuntra i regolamënc varënc. Tles ultimes legislatöres él tl Comun de Badia
View the embedded image gallery online at:
https://www.lausc.it/letres/12785-le-lech-soen-piz-sorega#sigProIde4f6d738dd
https://www.lausc.it/letres/12785-le-lech-soen-piz-sorega#sigProIde4f6d738dd
11 aconsiadus á lité de no, 6 á lité de sce. Tl concret ó chësc dí ch'al n'é nia gnü arjunt na maioranza por aprové le proiet. Tla pratica ól ince dí che le medemo proiet pó gní presenté danü, dan o do les proscimes lites, sce la sozieté che á fat domanda mina da ciafé na maioranza. Tla sostanza ne müdel porchël nët nia respet a ci che Fistill, Irsara y Ploner contestëia. Dessigü él n desplajëi da odëi che i trëi aconsiadus se stënta dër da azeté la lita de na maioranza tan tlera!
Sce zacai á miné da tó l'ocajiun por se fá reclam sciöche aconsiadus de na lista che n'é al momënt gnanca rapresentada te Consëi, spo él avisa i trëi auturs dla tuta de posiziun. (Iaco Frenademetz, Ombolt dl Comun de Badia)