Dan da püch á Ezio Prinoth, presidënt de Dolomites Val Gardena Marketing scrit sön le foliet »Alto Adige« dl bojëgn da mudé i criters che definësc i raiuns turistics. La configuraziun atuala resultëia estremamënter penalisanta por la Val Badia y Gherdëna, che subësc a chësta moda na concorënza sleala da pert de d'atres localités de Südtirol. An pó dí che i scioldi di badioc y gherdënes vá a finanzié la concorënza. La gauja de döt mëss gní chirida ti rapresentanc politics ladins a Balsan, che n'á mai orü se bate por porté iustizia, y en pert ince di litadus che á chirí fora sü rapresentanc, scebëgn che chëstes problematiches foss conesciüdes da tëmp. Mo por gní zoruch al mirit: ci ól pa ester por che les
valades ladines pois se svilupé te na manira armoniosa, cherian bëgnsté por düc? An dess pié ia dala conscideraziun che la munt ne mëss nia deventé n travert de passaje, mo ara dess ester viüda, al dess ester na esperiënza che resta di cörs. Le turism »mordi e fuggi« – de passaje – ne passenëia nia ite te chësta vijiun. Insciö gnanca le conzet de aumënt indescriminé de turisć. I sun rová sö pro, suradöt te certes periodes, y i messun nen tó cosciënza. La munt ne dess nia deventé n grandiscim luna park cun ofertes »tol 3 y paia 2«, che é gnüdes y vëgn tres ciamó portades inant dai responsabli dl turism. Al dess gní alzé la cualité, mo por fá chësc, mësson ester metüs sön le medemo livel di atri y nia pié ia cun le handicap che vëgn fora dala classificaziun atuala di raiuns turistics. Na mudaziun ne n'ó nia dagnora dí strotöres tres maius, mo cualitativamënter mius.
Al ó ester unité danter Badia y Gherdëna, al ó ester rapresentanc che portes inant la chestiun cun coraje y vijiuns. Chisc rapresentanc mancia indere y i nen paiun les conseguënzes.
(Hubert Dalponte, Ladins Dolomites) 
