La Usc di Ladins

La sajon da d'istà la é tachèda ite, i operatores se à metù en jech e l respet de la prescrizions é a n livel dassen n muie aut.
Me prem scriver chesta pecia righes per testimonièr l comportament ezelent di operatores turistics te chesta pruma fasa de sajon da d'istà tel respetèr e fèr respetèr duta chela prescrizions che l'é de besegn per prevegnir l contage da Covid-19.
L risech zero no l'é, l saon, soraldut te n lech turistich desche noscia val, ma l sens de segureza che Fascia la é dò che la ge trasmet a si ghesć l'é n surplus che disc n muie su la profescionalità e sul sens de respet de la normes che à tout sù noscia comunanza e nesc operatores. Gé enstes é podù veder con mi eies e proèr coche l setor de l'acolienza e duc i servijes sporc dai operatores de noscia val sie aldò e i respete la regoles, dut chest, l'é ben fat l'uzèr fora, con n sforz no demò economich ma ence uman-psicologich, no da pech.
La cèria de prescion che ogne imprenditor se à tout sù per sporjer si servijes te na »verscion segura« no pel e no cogn vegnir smaorèda amò de più da la tema di controi da man de l'autoritèdes de soravèrda. L'é emportant, fondamentèl, che te chesta fasa ence la funzion de soravèrda, che ben segur la é nezessèra, la sie de suport e de aiut, de comprenjion e no demò de sanzion. Ge vel se recordèr che, vindò chela ativitèdes, vindò chi operatores, l'é persones, families che se à metù en jech per se tor dant chesta neva endesfida e les é dò che les l fèsc a na vida ezelenta e a ic va mie complimenc, en calità de assessor al turism del Comun general de Fascia, per l sens del lurier e la voa de repartir con chela che i se à tout dant chesta situazion per nia sorida.  (Matteo Iori, assessor al turism, economìa e comerz del Comun general de Fascia)