I sinti le dovëi da sporje n giulan sinti y parores de lalt al assessur provinzial Daniel Alfreider y al ombolt dl Comun da Corvara Robert Rottonara, por avei metü man i laurs por stabilí y mëte a post i terac dl sotfunz sön le trat Costes dal'Ega sön Ciaulunch y por se avëi cruzié dl asfaltamënt dl Ju de Frara. Chisc laurs é de importanza fondamentala por döta la comunité dl'Alta Badia, odü che chëstes é les döes avënes prinzipales de coliamënt cun nostes valades vijines.
Terac en movimënt de na contrada nia stabila é n gran problem por la viabilité y cina sëgn án tresfora, do vigni sajun, avalié cun n funz nü de asfalt, l'arbassamënt y alzamënt di terac che gauja gobes y büsc prigorusc. Sëgn vál debojëgn
che al vëgnes fat n stüde definitif, na proietaziun de laurs aprofondis, y che an mëtes a desposiziun le finanziamënt che pormët na sistemaziun stabila che desgropes chësc problem por n tëmp lunch. I sun sigü che l'assessur Alfreider se tolará sö l'impëgn por la realisaziun de chisc laurs, ajache ara và debujëgn de de gragn investimënc. Chisc laurs ne garantësc nia ma n mioramënt y na maiú segurëza dla viabilité, mo ai porta ince pro a dé na imaja de cura, de belëza de nosta contrada, de nüsc paisc y respidlëia nosc intënt costant y nosta lighrëza da podëi ester i curadus y conservadus capazi de chësta natöra unica che nes é gnüda afidada. Al romagn da mëte a post la smöia de Crëp de Sela, gnüda jö bele tl ann 2014, y por chëra che i laurs pé al momënt architá. Chësta smöia é sciöche na plaia daverta te nosc bel paesaje y á debujëgn de n ressanamënt apronté. I sun fidënt che por chësc laur ciafará le Corp Forestal adöm al assessorat de competënza y cun l'aiüt dl ass. Alfreider na soluziun por na sistemaziun te n tëmp cört.
(Richard Pescosta, Hotel Sassongher, Corvara)
