Cunselieres zënza vijion

Data

24 de messel 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Ai 29 de juni, doi dis dan che l ie unì metù n droa la normativa provinziela »Raion y cuntreda«, à l Cunsëi de Chemun de Santa Cristina dat pro l stude de fatibltà per n cunliamënt cun na ferata o na furnadoia da condles danter Mont de Pana y Sautaria. Na dezijion tëuta de prëscia, zënza tenì cont de chël che on fat pea ultimamënter y de chël che ti jon ancontra. L mpat ambientel per n tel cunliamënt ne n'ie nia da se nmaginé y l revina per for nosta majera ressorsa. Sfruté inant la natura, do che vënt y nëif à desdrù ti ultimi doi ani tan de bosch, ie zënza fundamënt. Oradechël muessen tenì cont che tres l mudamënt dl tlima se auza la temperatura dla Tiera for plu y plu, cun cunseguënzes catastrofeles, y nëus on l duvier de fé riesc zeche.
Nvestì ti mplanc portamont y duc i njins ntëurvia, per i rënder plu ecologics, fossa n var dl drë' viers, y no nen junté d'autri y mo te n raion tan sensibl. Ma l semea che na gran maiuranza de cunselieres dl Chemun de Santa Cristina stluje i uedli al daunì de nosc mutons y nepoc. Messons'a propi dunfrì su nosc plu bel raion ai nteresc de n valguni? Cie davanions'a nëus che vivon dut l ann te chësta valeda?
L custimënt de vita se auza for plu y plu. I jëuni ne n'à nia plu l muet de se fé su si coa y muessa jì a sté oradecà. Cuatieres vën vendui ora y l ie cëses uetes tan che dut l ann.
Nscila zidlons su inant n patin che vën tlo y bëisa ju te curt tëmp nosta valeda y la montes zënza se tò dl'aurela de se goder la belëza de nosc raions, mustran puech nteres per cultura y natura. Ne ulons'a nia plu chëi patins che vën dala ziteies busientes per se goder la gheneda, che ngali ne ons nia plu da ti pité? Ie pa chisc i fins de chëi che ne ie mei cuntënc, che uel for deplù y che ti dà mpurtanza mé ai scioldi?
L semea propri che la sibe nsci: sfruté la ressorses natureles nchin che l nen ie y plu debota che la va.
Stimei cunselieres, ulà ie pa la vijion per n'autra forma de turism y mubltà, plu sustenibla per nosta jënt y per nosc ambient?  (Saluc da Engelbert Mauroner)

Galaria retrac