La Usc di Ladins

Bondì, son Dellantonio Marco, da pech più de doi egn President del Comitat Manifestazions de Cianacei »Canazei Events«.
Ti doi isté passé, la manifestazions les é states tropes, in linia coi egn dant. Chest an, vedudes la problematiches leèdes al Covid-19, l program che aane enjignà l'era stat smendrà a presciapech 30 evenc, manco che la metà respet ai egn passé, ma istesc n segnèl fort per la repreisa turistica de nosc paìsc. L program, ence chest an, l'era stat pissà e enjignà dal sotscrit con la colaborazion de autra persones, desche semper te na completa forma de volontariat.
La manifestazions les era states programèdes co la colaborazion de la desvaliva Sociazions, del Comandant di Polins de Fascia, de la Polizia Aministrativa de Trent e di etres Comitac de Val.
Per esser bogn de dejoujer la manifestazions en segureza con duta la prescrizions domanèdes dai regolamenc sanitères dovui al Covid-19 tant burocratics che operatives, desche i egn passé, en calità de president de »Canazei Events« é domanà a la Jonta la possibilità de tor sù n lurierant e na secretèra.
L lurierant da tout sù per vèlch ora da sera en ocajion di evenc per la pèrt operativa, desche per ejempie ensevièr l raion de l'event, meter a post e sanifichèr la carieghes, meter sù e tor jù i gloriec, enjignèr i impianc audio/video, e c.i.. La secretèra, enveze, con n contrat part-time (20 ores per setemèna dai 25 de jugn ai 20 de setember) per ge stèr dò a l'ofize (dadoman) e didèr l sotscrit endèna la manifestazions.
Chesta doi fegures les é de fondamentèla emportanza per n bon éjit di evenc; l'é de fat de valuta la pèrt operativa, ma ence la pèrt burocratica domana trop temp anter autorisazions a la Polizia Aministrativa de Trent e ai Polins de Fascia, a la Siae, permiscions per serèr la strèdes, bilanzes de la singola festes, gropes folcloristics, e c.i.: la secretèra l'é donca na fegura determinanta.
La Jonta, travers un de si Assessores, a la fin de jugn la me à comunicà che la secretèra no podea aer n contrat de 20 ores en setemèna e che aesse cognù smendrèr debel sie: aldò de chest mia colaboradora à dezidù de chierir n auter lurier.
Me é troà da soul a cogner gestir la manifestazions, cossa che jà fossa stat senestra i egn passé; chest an co la normes anti Covid fossa stat praticamenter impossibol, donca é retegnù che no sie la condizions minimes per portèr inant l program. La Jonta à tout at de chest i prumes dis del meis de messèl.
Carateriamenter, canche scomenze zeche me dae jù te l portèr a térmen, ti limic de mia competenzes e de mia possibilità. Per chest chest istà desche »Canazei Events« ge stae dò a la 10 seres endrezèdes da la Biblioteca de Comun e l projet de animazion da d'istà »Marijene«, pèrt del projet »Fassalandia«, ativitèdes finanzièdes no diretamenter da contribuc del Comun.
In relazion a chel che l'é sozedù, é tout n'autra dezijion. Me aee metù a despojizion per me candidèr desche Ombolt per l Comun de Cianacei a la elezions aministratives comunèles del 3 de mé passà (litazions dapò sburlèdes ai 20 de setember) sostegnù da na lista de 14 persones. Te chest temp de dificoltà aon de besegn, pèrto mia più che mai, de n'Aministrazion de Comun forta, coerenta, esperta, enjignèda a ge jir dò con profescionalità al paìsc con sie sentadins, valorisèr l volontariat, ma soraldut esser bogn de fèr fora problematiches emportantes che se met dant te chest temp.
Co la situazion che se à creà, con pèrt de la comunanza scechèda e avelida per la mencianza de evenc da d'istà te nosc Comun, no cree che sie l cajo de scomenzèr na campagna litèla; no l'é la condizions per scomenzèr n bon lurier en completa serenità, apede al fat che me é vegnù a mencèr la gaissa. Per chest motif mia lista desche Candidat Ombolt no vegnarà prejentèda. Rengrazie tant dut l grop per l temp e la fiduzia che l me à resservà.  (Dellantonio Marco, Cianacei)