La Usc di Ladins

Su La Usc di Ladins de la setemana passada, te na intervista fata da Monica Cigolla al capocomun de Soraga Valerio Pederiva, vegnìa rejonà de la viabilità del comun de Soraga.
N muie de robe dite te l'articol da l'ombolt pisson che le sie bone e le troa l consens da man del grop de mendranza 'L Sveiarin', ma volassane far en par de prezisazion. L grop no à mai rejonà de strisce pedonali en località Capitel de la Roca, descheche vegn scrit te l'articol, ma tel program lital, te la sezion lurgeres e opere publiche vegn scrit: »rejonar col Servije Strade de la PAT per miorar la segureza ló da la toronaa del Capitel de la Roca olache d'istà passa n muie de jent, co l'endrez de n marciapé sun pont de la Veisc envers Molin«. N lurger, donca, più gran e ressolutif al problem. Argoment portà al luster, con tant de servije fotografich, ence te la sera de prejentazion de la lista dal candidat capocomun Fernando Brunel. Perauter de chest vers no se troa nia sul program lital de Soraga Ensema, lista con a ciaf Pederiva. Tel program de la lista n auter pont perveit l miorament de dute le strade de Comun olache l'é besegn e n auter pont n muie emportant l'é studiar fora n projet per meter en segureza la strada de Troi de Pala.
N auter argoment tratà te la intervista che aon a cher l'é chel del sens unich en località Molin. Pisson che chest argoment, ajache revarda la segureza de le strade de paìsc ma soraldut de la jent, cognessa esser descoret te Consei de Comun per troar la soluzion miora per Soraga. L grop de mendranza, donca, content che l'aministrazion de Comun de Soraga abie tout a cher l problem solevà da Brunel ta Capitel de la Roca, se augura na percacenta colaborazion ence su de autres argomenc.  (Grop de Mendranza – L Sveiarin)