»Le tëmp dla familia é prezius, y sciöche autorités publiches – chël ó dí sciöche Provinzia en colaboraziun cun i Comuns – podunse dé n contribut dal punt de odüda organisatif, p.ej. tres l'istituziun de n sorvisc de refeziun, tres la coordinaziun dl tëmp te chël che an vá a tó i mituns a scora y scolina y tres l'ampliamënt di sorvisc de acompagnamënt y assistënza tratan les ores al de fora dla scora.« Insciö á dit l'assessuria Waltraud Deeg y chësc é preodü tl program che la Provinzia se tol dant da porté inant a sostëgn dles families tratan le 2021, por daidé suradöt i geniturs che laora. Al é da me infora val de beliscimo! Mo sëgn me aspeti i fac concrec.
Tl comun de Badia - en particolar a La Ila -
n'él por ejëmpl nia ciamó la poscibilité da mené i mituns ala refeziun vigni de. Dan n valgügn agn s'â deplü geniturs metü adöm por damané ala Direziun sce ara foss jüda da mëte da jí chësc sorvisc, mudan magari ince i orars dles leziuns y jon spo a tó i mituns dales 14.00. En chëra ota êl gnü dit de no, deache chësc ne ess nia buté ai atlec dl Ski Club che mët man i alenamënc atira do marëna. Mo da me infora n'é chësta nia la dërta motivaziun. Sce al é la orenté da fá valch, spo ne chíron nia vertores, an ciafa soluziuns. I crëii che chësc sides le dër momënt, sëgn che al vëgn ince pité sostëgn da pert dla Provinzia. Ciodí pa nia mudé usanzes vedles y chirí soluziuns nöies? An ne messass pa nia mudé i orars dles leziuns. Do scora podess – chi che ô – mené sü mituns ala refeziun y jí a se i tó spo do marëna. Chësc sorvisc podésson p.ej. magari ince ma anuzé tratan la sajun turistica. Ara jiss forsc da cujiné tla mensa dla scora mesana, olache ai é bele atrezá, y condüje spo le mangé te n salf metü a desposiziun ai mituns dla elementara. Chëstes é mies idees, mo i sun sigüda che tröc podess nen benefizié. Por scomencé podésson mené fora chestionars, por capí tan de families che foss interessades da mené sü mituns ala refeziun. Te na val moderna sciöche la Val Badia, ti jon do a chëra che é la filosofia dla Provinzia, podéssera garaté. I me aodi che chësta sides la dërta ocajiun!
(Alena Černohousová, La Ila) 
