La Usc di Ladins

L ie bën na mueia a messëi usservé coche i guvierns dla U.E. se stënte a abiné na soluzion ala pandemia de Covid che nes perseghiteia da urmei n ann ntier.
Ntan che Stac coche Israel porta inant na campania de dlaveies cun dut l sgors, se juvan nchinamei dl militer y acumpanieia chësta azion cun n lockdown rigurëus, va nosc guvierns inant cun mesures for inò mudedes ju y zënza n cunzet tler y efizient.
Nchinamei l presidënt american Biden se muev śën cun n feter sgors, aldò de leges de emergënza, nce per valivé ora i danns gaujei dala aministrazion da dant.
L fossa gran ëura che nce te nosta vedla Europa se descedëssa ora i respunsabli politics, fajan veramënter chël che va debujën, ma ntantsce se lasci monce tò per l mat dala gran corpurazions farmazeutiches che fej afars sun la pel dla jënt, sometuda ala »roulette russa« de n pricul murtel.  (Roland Verra, Persenon/Urtijëi)