La Usc di Ladins

Sce les Olimpiades 2026 sará na delujiun sciöche la zerimonia de inauguraziun di Mondai de Cortina, spo ne podunse fá nia ater co mëte en dübe döt ci che reverda n avenimënt che ará inom Milano – Cortina.
La pücia lerch dedicada a nosta cultura ladina, cun püces parores ladines y cun bai y musiga che n'á nia da nen fá cun nos y cun nosc teritore, é stades banales, deprimëntes y ince ofensives.
Ti dé publizité ales beles cités dl Venet â dessigü, da n punt de odüda dl'economia, na motivaziun sterscia: mo ne fossel nia sté damí da se mëte adöm cun Südtirol y cun le Trentin, ponsan a n messaje de coejiun, meton al pröm post nostes Dolomites, cun focus Ladinia? I sun tres al medemo punt, y porchël él legitim da nes damané sce les bones intenziuns de »gnanca n euro publich, ecologia indlunch, zero catedrales tl desert« detlarades dai organisadus dles Olimpiades 2026 gnará davëi respetades. Cina a chësc momënt n'án dessigü nia odü valch de bel.  (Michil Costa, Corvara)