A scuté su la trasmiscion de Chemun dl 4 de fauré, te chëla che l à rujenà i cunselieres dla SVP, me sënti de messëi respuender sun trëi argumënc.
La Cësa di Ladins ie y resterà nce tl daunì na cësa cun destinazion publica y no privata coche n se ustina for inò a dì, a bën de duta la populazion de Gherdëina. Śën che n à abinà na soluzion burocratica che ti va bën a duta la pertes nteressedes, iel gran ëura che n posse fé i vares inant per la adaté ai bujëns d'al didancuei. Duc chëi che lëura y fej si atività laite se l merita. Per chël che à da n fé cun la streda Cuca iel da dì che l ne n'ie da 70 ani incà unì fat tan che nia. Da iló su ie la situazion chëla che ie, strënta, frabicheda pro, perchël
rie da abiné na soluzion. N lëura inant per crì la miëura soluzion puscibla. Slargë zënza ne ti tò nia a deguni, coche nunzià tla trasmiscion, ie de bela paroles ma nia realistich, davia che l Chemun ne n'à degun terac da iló su. Per l palé nëif, nce sce nia plu de mi cumpetënza, ulëssi mé dì che son cuntënt che on na boniscima scuadra de lauranc tl magasin de Chemun y che ti ultimi ani sons stac boni de mudé ora truepa mascins y n njenië de nueves, cossa che à pona ugà dassënn per la neveres di ultimi doi ani. Zënza firmes privates che vën cun si camions, ne fóssel nia mesun rumé demez la nëif ajache l Chemun ne n'à nia chisc mesuns de trasport. Y la nëif muessen per la gran pert mené demez, ajache l ne n'ie deguna lerch da la palé ora nzaul, dantaldut canche l n ie tanta. Se lascé dl'aurela ajache l ne n'ie chëst ann degun patins tlo, ne me savëssa nia drët, à pu chëi da tlo ënghe la rejon de pudëi jì ncantëur do si streda y si lëur. Posse capì che pervia dla crisa dl Covid sons te na situazion melsegura, ma rate mpo che l ie da cialé inant al daunì cun positività, y ne lascé nia perchël vester lëures bele nviei via da giut.
(Rudi Kostner, assessëur dl Chemun de Urtijëi) 
