La Usc di Ladins

Bele dan n valgun ani éi tacà su sun n pitl parëi te nosta cësadafuech la fotografies de doi de gran artisć y nce bon cumpanies. I ova vivù tl medemo tëmp, i se ova fat scialdi n gran merit y cun chël n gran bon inuem!
L prim di doi fova bera Luis da Cudan, uem de Frida, na gran ladinista, una dla plu jëunes dla gran familia da Brida, te chëla che l fova nasciù nia manco che dejedot danter mutons y mutans.
L segondo fova bera Peter Demetz da Fëur, mut de bera Siegfried da Fëur y de anda Ida Mahlknecht. Chisc doi scialdi granc tl'ert de nosta valeda de Gherdëina ova nce nsenià tla scoles prufescioneles tlo da nëus. Da dì iel nce che l'ert de Luis da Cudan fova dantaldut l ziplé tl sas, te chël che ël se ova fat n gran bon ineum. Bera Peter da Fëur fova n gran spezialist tla pitura dla natura cun tematiches de uties y ciajeies, ma dantaldut de nosc biei crëps dolomitics, de chëi che l ova n gran savëi.
Dessegur pòssen y muessen nce mo ncueicundì ti auzé dassënn l ciapel »spirituel« a tramedoi: artisć y persunajes da mei y propi mei ne desmincë.
Dl bon bera Peter da Fëur pudëssen nce lecurdé chësta trëi risses scialdi senificatives: »Lecordete de inier, semieia dl duman, ma viv ncuei!« Y ajache son bele pra lecurdanzes scëmples cun de bela paroles, ne nes sàl nce defin »nia mal« n doi risses dl ex jurnalist dla Rai Erwin Frenes: »Per viver giut: maië l mez, jì a pe mo ntant, s'la rì trëi iedesc deplù y avëi gën zënza deguna mesura.«  (Oscar Prinoth dl Rezia, Urtijëi)