La neva vegnuda fora sun valch sfoi de chisc dis passé, adertura su la pruma piata con ence tant de foto, la é dalbon da scandol per no dir da far aric.
L nef regolament regional aproà, perveit l rembors di chilometres ence per le sentade online, donca a star a ciasa.
L'é vera che chi che fasc le legi, n muie de oute i le fasc su mesura e donca i giustifichea soa aplicazion desche »at de dover«, descheche l'é stat sobito prezisà.
Che te chest moment aboncont, de gran crisa economica, de ocupazion, sanitaria e soziala, canche n muie de familie stenta a meter valch sun desch a ogni bast, chi che ne goerna e tegn te man i cordogn del borset, i soi a no n ressentir nia deldut de la crisa, ajache i ciapa n bel assegn ogne meis, i perveide ence l rembors de le speise al chilometer per le sentade online, che vel dir a star a ciasa o te ofize personal, l'é na vera mostazada morala a duta la popolazion de la region.
Jonte apede, me sà de aer let, che ence le speise per i tablet, da durar per tor part a le sentade, le vegne paade. A pissar che l'é familie che per la DAD é obligade a far debite per permeter che duc i fies i tole part a le lezion da ciasa, percheche a scola no i pel jir. Se l'é chi che giustifichea chest tant desche at de dover, spere che sie ence chi che sent en coscienza de no se n prevaler de cheste norme, e alincontra i se dae jù per le descancelar. Chest scì che fossa n at de giustizia de dover. (Floriano Bernard de Cechinol, Pera)
Dalbon da destrameter
Galaria retrac
View the embedded image gallery online at:
https://www.lausc.it/letres/15285-dalbon-da-destrameter#sigProId80d2d795a5
https://www.lausc.it/letres/15285-dalbon-da-destrameter#sigProId80d2d795a5