Manifestazions atuales speziales

Data

31 de mei 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 31 de mei
Les melodies d'aisciöda dla Musiga da San Ciascian
La musiga dl paisc inviëia düc la sabeda ai 8 de jügn, vëia de Pasca de Ma, dales 20:30 te salf dles manifestaziuns dla ciasa J. B. Rinna da San Ciascian ala sëra dal titul »Melodies d'aisciöda«
Le dirighënt jonn Giuliano Federa á chirí fora por l'ocajiun n program dër plajor y desvalí. Tl mëteman aldiarán la »Fanfare for a Celebration« de Michiel Charles. Dala pëna de Antonin Dvorák sarál spo da aldí »Two Dvorák«, döes melodies fora de süa nona y ultima sinfonia. Ara vá inant cun »Rêverie« dl componist jonn da Balsan Armin Kofler, por stlü jö la pröma pert cun »Dakota« de Jacob de Haan. Do na picia palsa y na onoranza, vára inant cun la polca »Zeitlos« de Kurt Gäble, y al sará da aldí na omaja al dirighënt Giuliano y a »süa« Banda da Fodom, cun »Tiera Ladina«, scrit da Antonio Rossi por la Musiga da Fodom. Le conzert se stlüj jö cun le marsc »In Harmonie vereint« de Siegfried Rundel y la polca »Böhmischer Traum« de Norbert Gälle. Tlafinada ciamó na picera sorpresa cun i musicontri jogn da San Ciascian.

Conzert de onoraziun
La Seziun cors de dlijia tl'EPL-Ert por i Ladins inviëia ala festa de oonoraziun cun cater cors dla Val Badia, chësta domënia ai 2 de jügn, dales 16:00 a La Val
L'EPL cun i cors Raiëta da La Val, le Cor de Dlijia da La Val, le Cor de Dlijia d'La Pli y le Cor de Dlijia da San Martin de Tor inviëia ala festa de onoraziun de Felix Dapoz y Lois Ellecosta a La Val. Tröpes é les poesies che i dui scriturs dla Val Badia á scrit y publiché, dantadöt tl lingaz ladin. Gran mirit s'ái fat ince por les cianties ladines scrites deboriada (musiga de Felix y parores de Lois) che fej pert aldedaincö dl reportore classich di cors de dlijia. Felix Dapoz y Lois Ellecosta é trami nasciüs dl 1938, ai é stá tres de bogn compagns de vita y ince de creativité. I cors portará dant les plü beles cianties de Felix Dapoz y Lois Ellecosta. La festa a La Val vëgn metüda da jí en colaboraziun cun le Comun da La Val y les Patrones da La Val.

Melodies d'aisciöda a San Martin
Conzert d'aisciöda dla Musiga da San Martin Tor, indoman sabeda al 1. de jügn dales 20:00, tl salf dles manifestaziuns
La Musiga da San Martin de Tor á le plajëi da porté dant le program imparé ite ti ultims mëisc. Sot la bachëta de Sepl Pezzei podarán aldí n conzert de döes perts. Tla pröma vëgnel soné »Tsaritsino–A Russian Scene« de Johann Nijs, »Der Märchenkönig« de Timo Dellweg, »Adventure« de Markus Götz y »Verwehte Blumen« de Florian Pranger. La secunda pert vá inant cun »You raise me up« de Brendan Graham–ar. Hein Briegel, »Jesus Christ Superstar« de Lloyd Webber–ar. Willy Hautvast, »Despacito« de Luis Fonsi–ar. Filip Ceunen y »Zum Städtel hinaus« de Georg Missner. Düc i mëmbri dla Musiga ves inviëia cun gran ligrëza a passé na sëra cun de beles melodies.

Dui grups ladins a La Ila
La sesta 1.st.friday.live.session@saj.un de chësc ann, en vëndres ai 7 de jügn, é daldöt ladina. Tl Zënter Cultural Saj.un sonará dales 21:00 inant Martina Iori de Fascia y dedô le grup »Louis & The Space Travellers« dala Val Badia
Martina Iori á tl ann 2014 davagné dui pesć internazionai: le SUNS y le Liet International. Ti agn passá ara albü n gran suzes cun sües cianties ladines, talianes y inglejes.
Louis & The Space Travellers nasc dala pasciun por la musiga sonada incër n füch ia, söl iade, tl bosch y tres te de bona compagnia. Insciö porti dant musiga acustica y nia amplificada. So repertore é metü adöm da cianties tradizionales de nazionalités desvalies, che ai adatëia te na verjiun »folketnospaziala«, y toc originai de süa creaziun. Ince ëi ciantará val' por ladin.
L'entrada é debann. Jogn y manco jogn é dër bel inviá.

Baiun, i ciafun pa bëgn n tru
»Reden wir miteinander, wir finden einen Weg!« é le titul dla serada informativa cun la MIP – Männerinitiative Pustertal, en mercui 5 de jügn dales 20:00, te Raiun Sozial a Picolin
La MIP–Männerinitiative Pustertal é n post de incuntada olache ëi pó se baié fora y se lascé aconsié. Obietif é na orëdla daverta por tematiches de ëi y peri ti don coraje, tigní en pe le dialogh danter ëi y ëres y chirí prospetives nöies. Ara nen vá de vita de copia, separaziun, paternité, educaziun di mituns, crises de vita, virilité y i.i. Ara nen vá ince de sentimënc che nasc pro chëstes tematiches y che i ëi sbürla sön na pert. Al nasc tëma, tristëza y surité o ince se sintí confus y zënza aiüt. N gran crüze é danter l'ater le pëis finanziar y les conseguënzes che na separaziun gauja.
Adöm al Comité de raiun dl Raiun Sozial Val Badia sarál en mercui ai 5 de jügn dales 20:00 na serada informativa cun la MIP. Le tema zentral sará le baié adöm por ciafé na soluziun ti conflic te familia, tla relaziun, tl monn dl laur zënza che al sides chël che perd y chël che davagna. Thomas Pichler, mediadú y avocat, cuntará de sües esperiënzes tl baié adöm. I se inconfortun ai ëi, ëres, jogn, neni y las che orará se scinché na serada n pü' atramënter.

Marcé por n bun fin
Devoc de siur Heinrich Videsott: n marcé di pöresc a La Val, dai 18 ai 25 de agost, por daidé fá sö na scora tl Camerun. Al vëgn chirí patüc
Chësc ann vëgnel recordé i 20 agn dala mort de siur Heinrich Videsott. Por recordé so gran ejëmpl de vita, süa desponibilité de y nöt por i atri, sües mans y so cör tres daverc por düc, orunse daidé cun nostes ofertes fá sö na scora tl Camerun. Te chësta tera de misciun á lauré y pordiché la parora de Dî por tröc agn le nu de siur Videsott–siur Hans Kronbichler. Por cöie adöm ofertes vëgnel fat n marcé di pöresc a La Val, dai 18 ai 25 de agost; porchël rengraziunse bele danfora chi che á patüc de secunda man o che ne vëgn nia plü adoré, y che ó le dé jö. Por informaziuns plü avisa pón cherdé sö le 331 2719213. Dilan a düc dl aiüt.

Stachio n'ó nia partí
Le teater por pici y gragn vëgn ciamó presenté a La Ila y San Martin
Stachio é le patrun de n bel gran urt plëgn de ciüfs de vigni corú, brüsces y lëgns.
N urt demorvëia, olache les mitans y i mituns vá dër ion a soghé, mo Stachio n'ó nia partí so urt cun valgügn d'atri.
Le teater é ciamó da odëi a La Ila, indoman sabeda al 1. de jügn dales 18:00, tla Ciasa dla Cultura, y en domënia ai 2 de jügn dales 18:00 tl salf dl Istitut Ladin Micurá de Rü a San Martin de Tor.
Sön paladina él da odëi Silvia Costabiei, Silvia Liotto y Roland Pizzinini, la scenografia é de Gabi Mutschlechner y la rejia de Erika Castlunger.

Corusc dla vita
En Pasca de Ma vëgnel pité te dlijia d'Al Plan n conzert dl cor »cantus iuvenis«
En domënia ai 9 de jügn–festa de Pasca de Ma–dales 19:30 él te dlijia d'Al Plan n conzert dl cor »cantus iuvenis«, sot la direziun de André Comploi. Le titul é »Corusc dla vita«. Le cor da Viena lasciará lominé la dlijia d'Al Plan ti plü bi corusc. Al sará da aldí n program musical dër desvalí: da balades pop fina cianties de dlijia. Cianté gnarál dl amur, dla belëza dla natöra y dal sö y jö de nosta vita.