La Usc di Ladins

Curs de pilates
Tl Hotel Fanes a San Ciascian vëgnel metü da jí n curs cun Nabiha
Dai 17 de jügn ai 31 d'otober vëgnel metü da jí tl Hotel Fanes a San Ciascian n curs de pilates cun l'istruturia Nabiha. Le curs é vigni lönesc y jöbia dales 20:00 ales 21:00. Por informaziuns él da cherdé sö Ingrid al 335 6278950 o tl Hotel Fanes al 0471 849470.

Segra da Bula
N dumënia ai 16 de juni vëniel festejà la Segra da Bula
La festa scumëncia cun la mëssa dala 9:30, che unirà abelida da na grupa de strumënc a fla.
Da dedò saràl l cunzert tradiziunel dla Mujiga da Bula, ulache l unirà nce dat ora da maië y da bever, sambën nce crafons da segra.
Chëst ann unirà la segra festejeda per l prim iede sun la plaza de dlieja nueva.
La Mujiga y la populazion da Bula nvieia sambën duc de cuer a unì a chësta blòta festa y a sté mpue' n cumpania, scutan su de bela mujiga.

Cëna dal morná
Tla Val di Morins a Lungiarü vëgnel pité ai 21 de jügn na iniziativa culinara particolara
Le vëndres ai 21 de jügn ón dales 18:00 inant festejé deboriada le de plü lunch dl ann, pro n bun gote tla Val di Morins a Lungiarü. Al gnará pité aperitifs y derzades arjigná ca cun amur dai ostis de paisc cun produc locai y regionai. Al sará ince intratignimënt cun musiga dal ví y poscibilité da odëi davijin i morins en funziun.

Glitch & Data
Mostra de Simon Perathoner tla sala dla Lia Mostra d'Ert a Urtijëi, cun giaurida n vënderdi ai 21.06. dala 20:30
Camilla Martinelli che à curà la prima mostra persunela de Simon Perathoner tl luech ulache l ie chersciù su, spiega coche Perathoner dà inant te na maniera defin autramënter l cuntenut, l messaje y la pusciblteies dla fotografia, dla imajes. Cun la tecnica da garat te nosc tëmps ne curespuend la imajes nia for ala realtà y l ie mesun tò su na cumpëida desmesureda de chedri sun de pitli portadac. Simon Perathoner se dà ju tla mostra cun chësta pusciblteies. N ucajion dla giaurida dla mostra saràl nce l artist y performer Hannes Egger, che se meterà a cunfront cun na opra de Perathoner penseda propi per chësta mostra y cun chëla che nce l publich sarà nvià a nteragì, n lëur de video game art che reprejentea dantaldut la rujeneda digitela, chëla dl mitich Super Mario Bros.
La mostra dl artista, grafich designer y fotograf, de Urtijëi che viv y lëura a Unieja y Bulsan, resterà davierta nchin ai 21.07. cun na pitla pausa dai 5 ai 8 de lugio.

Sellaronda Bike Day 2019
Nce chëst ann de sada! Plu avisa ai 22 de juni
L Sellaronda Bike Day ie ruvà a si 14ejima edizion y ti dà la puscibltà a duc chëi che ti sà bel a jì cun la roda de fé la raida di jëufs ntëur al Sela zënza unì desturbei da auti y motores.
N sada ai 22 de juni 2019 uniràl inò dsarà i cater jëufs dla Dolomites (Sela, Pordoi, Ciaulonch y Frea) dala 8:30 nchin la 15:30. N possa pië via tl zënter di luesc japé di cater jëufs che ie: Sëlva, Corvara, Reba y Cianacëi.
Nfurmazions plu avisa n con' dla manifestazion ie da giaté sun la plata internet www.sellarondabikeday.com
Unide nce vo y passëde n bel di tla bela cuntreda dla Dolomites!

Dolomites Bike Day
En domënia ai 16 de jügn vëgnel metü da jí la terza ediziun, cun les strades ma por les rodes
I jus de Ciaulunch, Falzares y Valparola sará i protagonisć dla terza ediziun dl Dolomites Bike Day, söl program en domënia ai 16 de jügn. Le percurs dl Dolomites Bike Day a forma de anel pëia ia dal'Alta Badia sura Ciaulunch cina a Reba y passa fora por i paisc de La Pli de Fodom y la fraziun de Cernadou. Da chiló ván spo sön le ju de Falzares y Valparola por rové zoruch ti paisc da La Ila y Corvara y stlü jö insciö la roda. Pié ia pón sambëgn ince dai paisc de Reba o La Pli y lascé le ju de Ciaulunch sciöche ultim. Le percurs á na lunghëza totala de 51 km cun n dislivel de 1.290 m. Dales 9:00 ales 15:00 gnarál stlüt les strades al trafich motorisé, insciö da ti lascé lerch ales rodes y ti pité plü segurëza söl percurs. Al vëgn aconsié da fá la roda tla direziun cuntra la ora. Düc i amanc dla roda, sides chëra da strada che ince mountain bike, é dër bel inviá da tó pert ala manifestaziun, a chëra che an ne á nia bria da se scrí ite. Deplü informaziuns ciafon sön la plata internet: www.dolomitesbikeday.it