Manifestazions atuales speziales

Data

21 de jugn 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 21 de jugn
Glitch & Data
Mostra de Simon Perathoner tla sala dla Lia Mostra d'Ert a Urtijëi, cun giaurida n vënderdi ai 21.06. dala 20:30
Camilla Martinelli che à curà la prima mostra persunela de Simon Perathoner tl luech ulache l ie chersciù su, spiega coche Perathoner dà inant te na maniera defin autramënter l cuntenut, l messaje y la pusciblteies dla fotografia, dla imajes. Cun la tecnica da garat te nosc tëmps ne curespuend la imajes nia for ala realtà y l ie mesun tò su na cumpëida desmesureda de chedri sun de pitli portadac. Simon Perathoner se dà ju tla mostra cun chësta pusciblteies. N ucajion dla giaurida dla mostra saràl nce l artist y performer Hannes Egger, che se meterà a cunfront cun na opra de Perathoner penseda propi per chësta mostra y cun chëla che nce l publich sarà nvià a nteragì, n lëur de video game art che reprejentea dantaldut la rujeneda digitela, chëla dl mitich Super Mario Bros.
La mostra dl artista, grafich designer y fotograf, che à studià a Unieja y vif y lëura śën a Urtijëi, resterà davierta nchin ai 21.07., uni di dala 16 nchin la 19 y dala 20 nchin la 21:30, cun na pitla pausa dai 5 nchin ai 8 de lugio.

Cëna dal morná
Tla Val di Morins a Lungiarü vëgnel pité ai 21 de jügn na iniziativa culinara particolara
Incö vëndres ai 21 de jügn ón dales 18:00 inant festejé deboriada le de plü lunch dl ann, pro n bun gote tla Val di Morins a Lungiarü. Pro la iniziativa »Cëna dal Morná« vëgnel pité aperitifs y derzades arjigná ca cun amur dai ostis de paisc, cun produc locai y regionai. Al sará ince intratignimënt cun musiga dal ví y poscibilité da odëi davijin i morins en funziun.

Mostra de Poldão
Vernissaja indoman sabeda, ai 22 de jügn, dales 17:00
L'artist da La Ila Wilhelm Agreiter alias Poldão inviëia a na mostra personala, do 20 agn de assënza dal monn creatif-artistich, te garasc de süa ciasa a Altin a La Ila. La daurida dla mostra é indoman sabeda ai 22 de jügn 2019 dales 17:00. La mostra sará da odëi cina ai 30 de jügn 2019, vigni de dales 17:00 ales 19:00. Tla ediziun de "La Usc di Ladins" dan otedé él da lí do deplü de Poldão y süa vijiun dl'ert.

Tennis d'instà; cursc per mutons y mutans
Ntan l mëns de lugio vëniel metù a jì tl Zënter dal Tennis a Runcadic cursc te tennis per mutons y mutans danter 6 y 12 ani
L Tennis Club Urtijëi deberieda cun l maester de tennis Alberto Cestarollo mët a jì per d'instà cursc de tennis per mutons y mutans.
I cursc ie: dai 1. ai 5 de lugio, dai 8 ai 12 de lugio, dai 22 ai 26 de lugio y dai 29 de lugio ai 02 de agost 2019.
Tenii vën i cursc da lunesc nchin vënderdi dala 8:30 nchin la 12:00 tl Zënter dal Tennis a Runcadic.
N possa fé pea duta la cater enes o nce mé una, doi o trëi enes.
Per se scrì ite y per nfurmazions plu avisa prions bel de cherdé su l maester Alberto Cestarollo, tel. 338 7048909 o scenó nce tl tennis a Runcadic, do la 14:00, tel. 0471 797275.

»Düt le bun Dolomites!«
Ai 26 de jügn na festa y conzert por recordé i 10 agn de Patrimone Mondial Dolomites UNESCO, pro i saltadus dl Pisciadú
Diesc agn él bele passé dai 26 de jügn dl 2009, canche les Dolomites é gnüdes detlarades Patrimone Mondial UNESCO. Por zelebré le compliann vëgnel metü a jí avisa le medemo de, le mercui ai 26 de jügn 2019, n conzert dl grup »Lilac for People«. Le grup metü adöm da ot musizisć portará dant dales 21:15 inant, melodies jazz ti pra jödape di saltadus dl Pisciadú–sambëgn zënza amplificaziun. Le highlight dla serada é la proieziun de imajes sön i parëis dl crëp de Pisciadú, acompagnada dal ritm dla musiga. I spetadus podará amiré imajes dles Dolomites y dla particolarité y unizité de chëstes munts. I pra sot ai saltadus de Pisciadú pón arjunje a pe do na cörta spazierada, pian ia dal Hotel Luianta a Calfosch.

»Sëis duc bënunii«
Duman sada ai 22 de juni uniràl inaugurà la mostra dl artista Harald Schmalzl, tla Cësa di Cungresc a Urtijëi, n ucajion de si 960 mënsc de età. La giaurida sarà dala 18.00
L'ena do ai 28 de juni, uniràl ora tla USC n articul de Harald. Ël nstës nes cunterà de si ispirazions, de si ambizions y de si pascion, coche cultivadëut tl ciamp dl'ert.Danter i argumënc che descëida plu nteres, rujenerà Harald danter l auter dla belëza di bronc de Riace, che ël à ziplà do y dl percie che ël à dessenià y depënt tan de pitures de Carolina, nosta balarina sun la dlacia.
Y Harald nes dijerà nce cie che ie veramënter ert senziera te si uedli.

Al Plan: gran festa por i 10 agn Dolomites Unesco
Le pröm iubileum toronn dles Dolomites - patrimone mondial UNESCO - vëgn festejé cun iniziatives desvalies a Al Plan de Mareo: impröma dui dis de convëgn y spo ai 29 de jügn na gran festa por pici y gragn cun defilada, mostres, musiga y na »promenada« de aventöres y devertimënt
Le paisc d'Al Plan de Mareo á le plajëi y l'onur da podëi ospité la festa de iubileum por i 10 agn da canche les Dolomites é gnüdes detlarades patrimone dl'umanité UNESCO. N iubileum che é gnü organisé indortöra tres l'Assoziaziun Turistica d'Al Plan/San Martin, cun le sostëgn de n gröm de istituziuns y uniuns. La gran festa cun at ofizial y n program de cornisc rich sará en sabeda ai 29 de jügn.
Mëssa cun Paolo Renner y at ofizial
La festa di 29 de jügn mët man dales 10:00 cun na santa mëssa alaleria sön la plaza dla festa, dan paiun de paisc, zelebrada da don Paolo Renner y le ploan d'Al Plan siur Heinrich Perathoner. Dales 11:00 gnarál spo daurí la plaza dla festa, cun na linia de stonc olache al vëgn pité speziaries culinares.
L'at ofizial é dales 11:30, cun salüc da pert dl Ombolt Albert Palfrader, le secretér general dla comisciun UNESCO dla Talia Enrico Vicenti, l'assessuria provinziala Maria Hochgruber Kuenzer y le presidënt dla Fondaziun Dolomites UNESCO Graziano Pizzimenti.
Na promenada de aventöres y dlacins debann
Da aconsié é la prömenada dles aventöres, che se sleria dala plaza dla festa do la strada Fanes, dlungia la plaza dai jüc sö cina ala Ciasa dl Parch. Ara sará daverta dales 11:00 cina ales 17:00. Pici y gragn, jogn y manco ciafará chiló n gröm de stonc metüs sö cun la colaboraziun de uniuns y istituziuns: I verdabosc y l'ispetorat forestal informëia sön la tempesta VAIA, l'ofize provinzial de Geologia sön les Dolomites, l'Ofize Parcs Naturai pîta n quiz y ince la poscibilité da »ascuté i lëgns«, al sará spo stonc dl Museum dla Natöra da Balsan y le MUSE da Trënt, la Fondaziun Dolomites Unesco, la Lia da Munt Ladinia, la Ciasa di Düli da Falcade, la Mila dl Südtirol, i maestri dl dlacin da Zoldo, workshops creatifs cun la federaziun »Gaetano Gambara« y ince valgünes aziëndes agricoles dl raiun UNESCO. Sides dales 13:30 che dales 16:30 sarál l'assoziaziun »Gelatieri di Zoldo« (BL) che partësc fora debann 400 dlacins de süa produziun.
Defilada dl Rëgn de Fanes
Un di punc culminanc é la gran defilada dl Rëgn de Fanes, che pëia ia dales 14:30 pro la Ciasa dl Parch Natural, por se slarié incër döt le paisc y rové tl zënter sön la plaza dla festa. Al sará da odëi düc i personaji dles liëndes de Fanes - Dolasila, Ey de Net, Spina de Mul y tanc d'atri, mo ince flora y fauna, döt rapresenté cun de bi costüms, ciars infornis cun originalité y acompagnamënt musical.
Musiga cun Alexander dal Plan, Ermes Costa y Volxrock
Por de bela musiga vëgnel ponsé döt le de: dales 12:30 él la Musiga d'Al Plan che tëgn conzert, dales 16:30 sonará la Musiga »Ongia« da Muggia tl triestin. Dales 18:30 él Alexander dal Plan y Ermes Costa che animëia la serada, dales 20:00 sona le grup conesciü Volxrock y dales 23:00 vára inant cun DJ Luca.
Döes de beles mostres
La festa dles Dolomites UNESCO é por l'Assoziaziun Turistica ince stada ocajiun da arjigné döes de beles mostres. Sön inciaria dl'AT y cun la colaboraziun dl Fotoclub Val Badia él gnü arjigné na bela mostra alaleria cun 32 retrac de gran format, che mostra les Dolomites ti dui parcs naturai dla valada. Chësta mostra sará da odëi dai 26 de jügn cina ai 16 d'agost sön plaza dan le salf dles manifestaziuns.
Na secunda mostra é metüda fora dai 26 de jügn cina ai 8 de setëmber te Ciasa dl Parch, olache l'artist y professur universitar iapanesc Asami Kato mët fora sües operes sot al titul »Les Dolomites odüdes da n iapanesc«.
Dui convëgns
Bele i dis denant, ai 27 y 28 de jügn, él preodü dui convëgns scientifics te salf dles manifestaziuns, cun intervënc da pert de esperc da indlunch adalerch. La jöbia ai 27 de jügn él na conferënza organisada dal autur scientifich Rodolfo Calanca. Dales 9:00 ales 13:00 se dán jö cun la morvëia de n cil scür y i parcs dles stëres. Dales 14:00 ales 18:00 él intervënc sön la jënt tles Dolomites, cun storia, popolaziun, mic y liëndes y ince le lingaz ladin.
Le vëndres ai 28 de jügn nen vára dl »Valur y la funziun dl raiun por n turism sostenibl«, organisada dal'assoziaziun taliana de »Geologia y Turism«. Dales 9:00 ales 13:00 nen jarára de geologia, floria y fauna, desco ince de n esperiënzes y laur por n turism sostenibl. Domisdé dales 14:00 ales 18:00 baiarán dla funziun dl raiun por la coltivaziun de produc locai, cun degustaziun finala.
Chësta sëra dales 21:00 él ince ciamó na mësa torona dal titul »Belëza y armonia dla natöra«. Dal mëteman slominará ince l'asteroid »UNESCO«. Ghesć é don Paolo Renner, Marcella Morandini - direturia dla Fondaziun Dolomites UNESCO - y Enrico Vicenti - secretér general dla comisciun UNESCO dla Talia.
Döt adöm n program nia da perde. Informaziuns ciafon pro l'AT al 0474 501037.