Manifestazions atuales speziales

Data

05 de messel 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 5 de messel
»Nos dales bales«
Ciarcé bales de sorts desvalies: ai 11 de messé a San Linert
Le zënter da San Linert a Badia i á te chisc ultims agn fat da cornisc a de plü manifestaziuns gastronomiches, che á albü n gran suzes. En chësc ann vëgnel pité bëgn döes sëres a tema y la pröma ti vëgn dedicada ales bales. La jöbia ai 11 de messé podaran ciarcé de vigni sort de bales – da chëres sarades ales duces – fora por la strada prinzipala da San Linert, stlüta al trafich dales 19:00 inant. Önesc eserzizi dl post fej para y vignun píta n'atra sort de bala. La sëra gnará abelida dales melodies dl grup »Licaones«. Por tó pert ala manifestaziun n'ól ester degüna prenotaziun y an pó cumpré i bons dales bales sides i dis denant ti ofizi turistics dl'Alta Badia, sides en chë sëra diretamënter tl zënter de San Linert. La manifestaziun é gnüda reconesciüda sciöche »Going to green event«, n evënt olache an ciara da ti dé ince na gran importanza ala sostenibilité y al'ecologia. Sce al é bur' tëmp, vëgn la manifestaziun spostada al de do, vëndres ai 12 de messé.

Segra da La Val
Dai 5 ai 7 de messé, cun n bel program de intratignimënt
Le program mët man incö vëndres ai 5 de messé cun l'iniziativa »Lascé vöies aspetan la Segra«. Dales 19:00 él aperitif y griliada cun musiga dal DJ, dales 21:00 inant sona i »Mühlwalder Schuhplattler«. La sabeda ai 6 de messé dales 18:00 él l'alzada dl »Kirtschtamichl« - le lëgn dla segra, ince chiló cun intrati-gnimënt y musiga dal DJ.
Le de dla segra ai 7 de messé él dales 9:00 la mëssa da festa te dlijia da La Val, dales 10:00 él la Musiga da La Val che tëgn conzert y domisdé él musiga cun DJ. Dales 17:00 musiga da bal cun le grup »Da Piz a Ciantun«. Sura misdé vëgnel pité n pité n program de intratignimënt por i mituns.

Musiga cun l'orghelist Choi Soo Young
Badiamusica deura les portes a süa 19ejima ediziun, che lascia pié ia i sonns la secunda edema de messé cun dui conzerc
La daurida ti speta al jonn orghelist corean Choi Soo Young, che lasciará soflé l'orghe dla dlijia de Badia/San Linert en mercui ai 10 de messé, dales 21:15. Le repertore se möi danter le '600 y le '900.
Le vëndres ai 12 de messé, dales 21:00, sarál spo da aldí musiga da ciamena cun n trio dal sonn morjel de dui clarinëc (Beka Sirbiladze, Alberto Àlvarez), liá al acompa­gnamënt dl clavier soné da Olga Albasini. Chësc conzert sará da aldí tl Istitut Ladin a San Martin de Tor.

Pradel Cup
Torné de nöt a San Martin de Tor
I jogn da San Martin organisëia por le secundo iade le torné de nöt, en sabeda ai 13 de messé dales 18:00 inant, söl ciamp dal sport »Pradel« a San Martin. An pó se scrí ite cina en mercui ai 10 de messé, tres e-mail a jognsanmartin@gmail.com
Ince chi che ne fej nia para é dër bel inviá da gní a sostigní i sogadus y a sté en compagnia. Por l'intratignimënt musical se crüzia la band »Luis & the Space travellers«, por mangé y bëre vëgnel fistidié. Gnide tröc!

Sëira dl vin tl raion da jì a pe Bënunì a S. Cristina
Festa dl luech n vënderdi sëira ai 12 de lugio da 19:30 inant pra na cërcia de vins, velch de bon da maië y de bela mujiga tl raion da jì a pe a S. Cristina
Na bela cumpëida de ciuleies dal vin de gran inuem de Südtirol piterà da ciarcë chësc vënderdi sëira na vela de vins de gran cualità, sun l tepih cueciun tl raion da jì a pe a S. Cristina.
Leprò saràl nce mesun se maië vel' bon bucon servì pra plu stonc sun ëur de streda. Sambën unirà dut adum acumpanià da de bela mujiga suneda y cianteda dala grupes »Take Off« y »Demetz Duo«.
Ve aspiton a S. Cristina n vënderdi ai 12 de lugio!

»Berg ...«
Mostra dl fotograf Uli Wiesmeier te Tublà da Nives
Chedri de marueia y nia da se aspité de crëps y persones de Uli Wiesmeier, fotograf drët cunesciù a livel nternaziunel cun na pascion per i crëps che l à bele da duta si vita incà. Ël mët ora te chësta mostra crëps y montes mo mei udui nscila y che dà tl uedl. Wiesmeier chier n chësc cont paroles cun l prefis BERG..., sciche BERGbahn (furnadoia da mont), BERGbauer (paur da mont), BERGstraße (streda da mont) o BERGblick (udleda da mont) y ti dà na si nterpretazion fotografica. Nscila iel da se udëi ora per ejëmpl sun la fotos dl BERGbauer (paur da mont) amirazion y respet, ntantsce iel per l BERGsee (lech da mont) da udëi belau n pue' de sënn. I crëps ne ie nia unii mudei y ie zënza filter. Fotografies da mont che va a cuer y fates te na maniera unica.
La giaurida dla mostra ie nsnuet, vënderdi ai 5 de lugio dala 20:30. La ntroduzion unirà fata da Markus Larcher; danterite sunerà Leon Mussner la »Steirische«. La mostra resta davierta nchin ai 28.07. uni di (ora che de lunesc) dala 16:00 ala 19:00 y de dumënia, merdi, mierculdi y vënderdi nce dala 20:30 ala 22:30 te Tublà da Nives te Sëlva.

»Art in the Centre«
Idea Unika gëura si mostra n juebia ai 11 de lugio, dala 18:00, a Urtijëi sun Plaza Stetteneck
Cun la edizion da chëst ann iesen ruvei ala terza mostra, ulache i artisć dla Unika porta si ert tl zënter de Urtijëi, cun la ntenzion de nvië chëi che passa tres l zënter da jì a pe a se fermé, a usservé y a pensé do.
Te chësta ucajion prejentea i scultuëures dla grupa Unika si lëures nueves, scultures y nstalazions fates aposta per chësta mostra tl zënter dl luech. I argumënc y i messajes che i uel dé inant cun si ert ie desferënc y ie nsci esprescion dla varietà y criatività di artisć da tlo.
L fajerà pea sies artisć pra la mostra che vën cureda dal critich d'ert Andrea Baffoni. Tres la sëira dla giaurida menerà Beatrix Unterhofer.

Sëra de rock
La 1.st.friday.live.session@saj.un di 5 de messé i é dedicada al rock
Incö vëndres ai 5 de messé se presentará sön la paladina dl Zënter Cultural SaJ.un a La Ila »I Canaies«, n grup metü adöm da trëi musizisć badioc, cun cianties de stil rock. Ince la secunda pert dl conzert cun »The Aviary«, n grup de jogn da Porsenú, sará dedicada al rock. Le grup presentará cianties conesciüdes y ince de sües composiziuns. La serada mët man dales 21:00, cun entrada debann.

Festa por la daurida de SMACH
Indoman sabeda, ai 6 de messé 2019, dales 18:00, pro le Museum Ciastel de Tor, por la pert ofiziala, dedô, dales 20:00, pro la Ciasa dl Maier a Picolin por la party
I 10 laurs de SMACH 2019 é istalá o metüs sö, y i organisadus s'arjigna ala vernissaja che sará indoman, sabeda ai 6 de messé, dales 18:00, cun incuntada al Museum Ladin de Tor por varié deboriada tres la Val dl'Ert. Te chësta ocajiun sarál ince le salüt de bëgnodü da pert de Michael Moling, presidënt de SMACH. Lapró s'injunta les parores dles autorités politiches Giorgio Costabiei, Ombolt da San Martin de Tor, y Daniel Alfreider, Assessur provinzial ladin a Balsan. A instradé tla ediziun atuala de SMACH y ti singui laurs sarál la curadëssa artistica Katharina Moling. Les usc dla juria gnará dal componënt Guus Van Den Hout, un di direturs dl MET a New York.
Dales 20:00 sarál spo la festa pro la Ciasa dl Maier a Picolin.
En cajo de bur' tëmp vëgn döta la manifestaziun metüda da jí a Picolin pro la Ciasa dl Maier, dales 18:00 inant!

Festa de munt dl raiun de Puster
La Uniun di Paurs de Puster y i Paurs de Mareo inviëia ala festa che gnará tignida sön Munt da Rina, en domënia ai 14 de messé
La festa vëgn daurida dales 10:45 cun i salüc y i sonns di corgn da munt da Rina; dales 11:00 sarál la mëssa zelebrada da siur Franz Senfter y abelida dal Cor »Col dla Vedla«. Dedô vëgnel presenté en cört la munt y al sará i salüc dles autorités. Ara vá inant cun musiga dla Böhmische da Rina y musiga da bal cun jüc. Les organisaziuns da paur dl comun de Mareo pîta speziaries dl post y presentëia produc dai lüsc y dles munts. Rové sö pón sambëgn a pe, mo por chi che stënta da jí y por de pici mituns acompagná vëgnel pité n sorvisc de trasport dal ciamp dal sport da Rina sö.

Fan Zone »Mür dl Giat«
En gaujiun dla Maratona dles Dolomites, ai 7 de messé dales 9 inant
En domënia ai 7 de messé gnarál desfiré la Maratona dles Dolomites, sot al tema »Duman«. Por l'ocajiun inviëia i Stüdafüch da La Ila da storje pro tla »Fan Zone Mür dl Giat«, che gnará arjignada söinsom le mür a La Ila, olache i ziclisć fej l'ultima gran fadia. Dales 9:00 inant gnarál trasmetü la Maratona sön gran televijiun y al gnará pité döt le de spëisa y boanda, cun musiga dal vi.