Manifestazions atuales speziales

Data

12 de messel 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 27 de messel
Segonda Academia da d'Instà
La lia La Vëta mët a jì la segonda Academia da d'Instà tla berstot de Aron Demetz a Puntives. La ie davierta dai 22.07. nchin ai 03.08.
Pra l'Academia da d'Instà, chëst ann la segonda edizion, pòssen ti cialé ai artisć y ala artistes ntan che i lëura y pona ai lëures finei. La ie n cunlaurazion cun l Südtiroler Künstlerbund. I referënc ie Peter Senoner, Aron Demetz, Markus Delago y Reinhard Eiber, che fajerà cursc de scultura y pitura. Ai 02. y ai 03.08. pòssen pona jì a ti cialé ai lëures finei di artisć y dla artistes che à fat pea. La segonda Academia da d'Instà dla lia La Vëta ie davierta dai 22.07. nchin ai 03.08., da lunesc nchin sada dala 08:30 nchin la 12:00 y dala 14:00 nchin la 18:00. Per plu nfurmazions, pòssen cherdé su Aron Demetz al 333 94920337.

StallArt
N sada ai 20.07. dala 17:00 cun Christian »Stl« y Armin »Grunt«
I doi artisć de Urtijëi, che à trasfurmà la stales dl luech da Pecëi te salamënc per mostres, te na galaria d'ert, nvieia de cuer ala giaurida. Christian »Stl« y Armin »Grunt« lascerà udëi lëures de pitura y scultura te chësta luegia particulera tla streda Nuaves/Sureghes
a Urtijëi.
N sada ai 20 de lugio, n ucajion dla giaurida dala 5 domesdì, suneràl i Monkeydee's.

L'é endò »La Bira te Fascia«!
A Ciampedel te Ischia ai 19, 20 e 21 de messèl rua endò l festival de bires artejanèles da mont, magnadiva de produtores del post, degustazions vidèdes, bona musega e auter amò
L'é ruà a la 6^ edizion e ogne an l ne sporc vèlch neva l'event »La Bira te Fascia«, nasciù da la gaissa de 3 amisc pascioné de bira e de produzions da mont de calità.
Dal scomenz de messèl a la fin de aost, per »A spas co na Bira«, 6 refuges e restoranc de la val sporc bires artejanèles de calità e piac spezièi pissé per valorisèr e vegnir valorisé da la beanda de òr.
Ai 19, 20 e 21 de messèl sarà l moment »clou«: per 3 dis te Ischia a Ciampedel se podarà cercèr bires artejanèles de 6 produtores desferenc e magnadiva de aziendes de noscia valèdes, con la formula oramai colaudèda di »getons« e scutèr de bona musega.
Program:
Vender 19.07:
Da les 17.00 aur l festival con stonc de magnadiva de produtores del post. Da les 17.30 »Degustazion tel bosch«: dò na curta raida de podarà cercèr bires e magnadiva en abinament. Da les 21.00 musega live con i trentins Souled Out: gregn suzesc de la musega internazionèla e talièna. Se sera da mesanet.
Sabeda 20.07:
Da les 17.00 aur l festival con stonc de magnadiva de produtores del post e da les 17.30 »Degustazion tel bosch«. Da les 21.00 musega live col grop Disco/Funk da Busan »The Giggers«. Se sera da mesanet.
Domenia 21.07:
Da les 12.00 aur l festival con stonc de magnadiva de produtores del post. Da les 15.00 e da les 17.30 »Degustazion tel bosch«e da les 21.00 musega live con Cisco, storica ousc di Modena City Ramblers. Se sera da les 23.00.
Info: www.labiratefascia.com.

Cin' conzerc tla Val Badia
La 19ejima ediziun dl Festival Badiamusica é piada ia y vá inant cun cin' apuntamënc, le pröm insnöt a San Martin de Tor
Trio »playful clarinet«
Incö vëndres, ai 12 de messé dales 21:00, sarál da aldí tl Istitut Ladin Micurá de Rü a San Martin de Tor le trio »playful clarinet«, cun Beka Sirbiladze y Alberto Àlvarez al clarinet, y Olga Albasini Garaulet al clavier.
»Ensemble Baroque«
Dodoman domënia, ai 14 de messé dales 21:15, rondenësc tla dlijia de Badia le sonn dl »Ensemble Baroque«, metü adöm da Franz Comploi, Esther Crazzolara, Priska Comploi, Ewa Miribung, Mara Miribung, Francesco Colletti, Gabriel Jublin, Marco Lo Cicero y Roberto de Franceschi.
Le percuscionist Philipp Lamprecht
Le conzert solistich á l'intérieur tu é dediché ai sonns dles percusciuns de Philipp Lamprecht, che se dá apuntamënt en lönesc, ai 15 de messé dales 21:15, tla Ciasa Runcher a Badia.
Duo »Barta – Pereyra«
Le Duo Barta y Pereyra presentëia na sëra cun elaboraziuns de musighes de Henry Purcell scrites da compositurs contemporanns, en pert dal chitarist dl duo, Adrian Pereyra intës. Le duo é metü adöm da Adrian Pereyra y dal mezsopran Susanne Barta. Le conzert vëgn tigní en mercui, ai 17 de messé dales 21:00, a La Pli de Mareo tla Ciasa dles Uniuns.
»Ensemble Fidicinium«
L'edema conzertistica de Badiamusica se stlüj jö cun le »Ensemble Fidicinium«, metü adöm da Joseph Höhn, Stefanie Steger, Sophia Andrich, Andrea Ferroni, Nathan Chizzali, Andreas Benedikter y Pietro Prosser che se lascia aldí cun n program vocal-stromental dl pröm baroch, ai 19 de messé dales 21:00 tla Dlijia da La Val.

Domisdé di mituns a San Ciascian
D'isté él vigni mercui tl Museum Ladin Ursus ladinicus n domisdé di mituns cun laborators didatics y presentaziuns de libri por mituns
Ai 17 de messé vëgnel tigní la pröma presentaziun dl'iniziativa »Domisdé di mituns – Il libro nella roccia«. Dales 17:00 ales 19:00 gnarál presenté le liber »Il canto del lupo« de Paolo Ligabue y Matteo Paganin y dedô podará i mituns tó pert al laboratore didatich. Les atres presentaziuns di libri por mituns vëgn tignides ai 31 de messé y ai 7 y 14 d'agost. Tratan i atri apuntamënc dl »Domisdé di mituns – Sön les pedies dla laurs ladina« á i mituns dai 5 ai 12 agn la poscibilité da vijité le Museum Ladin y tó pert a jüc y ativités creatives y manuales. Chisc apuntamënc é ai 24 de messé, ai 21 y 28 d'agost, y ince ai 4 de setëmber, dagnora dales 16:45 ales 18:30. I mituns é periá da se scrí ite pro l'Assoziaziun Turistica da San Ciascian anter les 16:00.

Gosté sön munt
Por le pröm iade vëgnel metü a jí pro la staziun a munt dl implant de Gherdenacia le »Gosté sön munt«
Ara se trata de na ocajiun por gosté n iade te n post particolar, te chël che an pó amiré les munts de Sas dla Crusc, Lavarela y Conturines. Le gosté sön munt vëgn tigní en jöbia ai 18 de messé dales 8:00 inant; de plü strotöres dl post arjigna ca n gosté rich de produc locai. Al sará la poscibilité da jí sö cun l'implant de Gherdenacia bele dales 8:00 inant. Chi che ó, pó dedô ince tó pert ala escurjiun de grup cina sön Col Plö Alt. Por tó pert ala manifestaziun mësson se prenoté te un di ofizi turistics dl'Alta Badia anter le de denant. Sce al é bur' tëmp, vëgn la manifestaziun spostada al de do, vëndres 19 de messé.

10° Incuntada di orghi da man
Ai 20 y 21 de messé sön Börz
Por le diejim iade vëgnel tigní en chësc ann ai 20 y 21 de messé la incuntada de orghi da man sön Börz. La incuntada di amanc di orghi mët man la sabeda dales 18:00 tla Ütia de Börz. La domënia sonará gragn y pici, sciöche ince ghesć dala Slovenia – dales 11:00 inant pro la Ütia de Fornella. Intrami i dis sarál la firma Rutar che presentará sü orghi da man.

Jöbia de Corvara
Pröm apuntamënt ai 18 de messé, cun animaziun por pici y gragn
Le zënter da Corvara i fajará ince chësc isté da cornisc a »La jöbia de Corvara«, che gnará metüda a jí da pert dl'Assoziaziun Turistica de Corvara dai 18 de messé ai 5 de setëmber. Vigni apuntamënt é caraterisé da n ater tema, che vá dal'animaziun por mituns ala musiga tradizionala, mo ince al'ert de strada. Le pröm apuntamënt i é dediché ai plü pici. Dales 17:15 ales 19:15 y do cëna dales 21:00 ales 22:15 sarál de vigni sort de animaziun cun clowns, strinadus, face painting y jüc fora por le zënter. Le duo »Whiskey & Ginger« se cruziará dl intratignimënt musical. En ocajiun de vigni Jöbia de Corvara vëgn la strada prinzipala da Corvara stlüta al trafich dales 17:00 ales 22:30.

»Na munt de emoziuns«
Alpinisć de livel internazional cunta de sües esperiënzes tles munts
Ince chësc isté él tl'Alta Badia la seria de referac cun i alpinisć y personaji liá ales munts, dal titul »Na munt de emoziuns«. Le pröm apuntamënt cun la campionëssa mondiala de schi freeride da Corvara Arianna Tricomi é en lönesc ai 15 de messé a San Ciascian. Gianfranco Corradini, che á cun 61 agn y zënza na iama arjunt la piza dl Aconcagua, é protagonist ai 22 de messé tl Saj.un a La Ila. Trëi é spo i alpinisć sön paladina ai 5 de agost tl salf dles manifestaziuns a La Ila: Nicola Tondini, Sergio Rocca y Christoph Hainz por le referat »Non abbiate paura di sognare«. Ai 16 d'agost podarán tó pert a na incuntada cun i cians da socurs en colaboraziun cun la federaziun de Südtirol a La Ila; le basejumper Maurizio di Palma cuntará de sües aventöres ai 26 d'agost a Badia. L'ultim apuntamënt é ai 2 de setëmber a Corvara cun l'alpinist Stefan Glowacz. Düc i apuntamënc mët man dales 21:15 y é por talian, adinfora dl ultim apuntamënt che mët man dales 21:00 y sará por todësch.

»Paisc en festa« a San Ciascian
Le zënter da San Ciascian pîta fora por l'isté n domisdé cun musiga, spezialités gastronomiches y devertimënt por mituns
Le »Paisc en festa« vëgn organisé 5 iadi d'isté, tres de mercui: le pröm iade ai 17 y spo ai 31 de messé, sciöche ince ai 7, 21 y 28 d'agost. Vigni iade él dales 16:00 inant n pice marcé de produc dl post y di artejans, abelí dal sonn di orghi da man. De vigni sort de bun patüc da mangé ciafon pro i stonc gastronomics dles uniuns dl paisc y de de plü hotí y eserzizi dl post. Ince por i mituns gnarál metü a jí n bel program de intratignimënt. Adöm cun le Parch Natural Fanes-Senes-Braies vëgnel organisé le domisdé »Tl rëgn di tiers«, n laboratore creatif cun i verdaparcs sön flora y fauna di parcs. Pici y gragn dai 6 agn insö é inviá da tó pert dales 16:00 ales 19:00. Les serades dl »Paisc en festa« gnará animades da plü grups musicai. Pro le pröm apuntamënt sona domisdé le duo »Whiskey & Ginger«, »Don Cravallo« dales 17:00 inant y le grup »Da Piz a Ciantun« da sëra.

Segra d'Antermëia
Chësc fin dl'edema ai 13 y 14 de messé festa cun musiga y alegria
La festa por la Segra d'Antermëia mët man indoman sabeda ai 13 de messé dales 20:00, olache al sará na party cun le grup »Südtirol 4«. La domënia ai 14 él dales 10:00 la santa mëssa te dlijia d'Antermëia; dales 11:00 matinée cun musiga te plaza de paisc. Dales 14:00 ales 16:30 sarál la Böhmische da Weitental che tëgn conzert y dales 17:00 inant musiga da bal cun le grup »Vollgas«. Por spëisa y boanda vëgnel fistidié döt le de, iniann cun la novité de spezialités de pësc. Al ne manciará nia na lotaria y jüc por gragn y pici. Jogn, Sport Club, Stödafüch y Pëiapësc d'Antermëia se conforta da ves saludé.

Sommelier te ütia
Tratan l'isté él te üties dl'Alta Badia de plü apuntamënc cun la manifestaziun liada ai mius vins dl Südtirol
En gaujiun dl »Sommelier te ütia« podarán ciarcé i mius vins dl Südtirol a 2.000 metri. N sommelier ti spligará ai partezipanc les carateristiches di vins che gnará ciarciá y dará ince informaziuns sön i vins: te ci gote che al vëgn juté sö, la temperatöra ideala, pro ci spëisa che n vin passenëia y i.i. Indöt él cin' apuntamënc: ai 19 de messé pro la ütia La Tambra sön Ciaulaunch, ai 2 d'agost tla ütia I Tablá, ai 16 d'agost tla Ütia de Bioch, ai 30 d'agost tla ütia Pralongiá y l'ultim apuntamënt ai 6 de setëmber tla ütia Club Moritzino. An s'incunta vigni iade dales 14:30 tla ütia che tol pert. Les prenotaziuns mëss gní fates ti ofizi turistics dl'Alta Badia anter le de denant.

Dolomyths Run Sellaronda Ultra Trail
En sabeda ai 13 de messé vëgnel organisé la Dolomyths Run Sellaronda Ultra Trail, na gara da salté incër le Grup dl Sela, che passa fora por les cater valades ladines
Chësc isté é le start y travert dla gara tl'Alta Badia, a Calfosch. I partezipanc pëia ia dales 5:00 da doman y i pröms rovará zoruch indô incër les 11:00. La competiziun vëgia danfora n percurs de 61,2 km, cun n deslivel de 3.670 m. En chësc ann él ince la poscibilité da fá ma mez le percurs, pian ia da Cianacëi te Fascia dales 9:00 y rové cina a Calfosch. Dales 18:30 gnarál fat la premiaziun tl salf Tita Alton a Calfosch y al gnará tigní le
pasta party.
Incö vëndres ai 12 de messé dales 18:30 él, tres tl salf dles manifestaziuns a Calfosch, n briefing tecnich, y l'ofize gara olache an pó jí a se do numeri, davert dales 15:00 ales 19:30, y la sabeda dales 4 da doman inant. Informaziuns: www.dolomiteskyrace.com

»Gadersound« é indô dan porta
Ai 19 y 20 de messé éra indô tan inant, a Pidrô gnarál tigní le festival alaleria »Gadersound«
Danter les bands sarál pro chësta 16ejima ediziun ince da aldí i »Koza Mostra« dala Grecia, conesciüs por avëi davagné le sesto post pro l'Eurovision Song Contest dl 2013. Ince en chësc ann á i jogn y les jones dl festival preodü na colaboraziun cun le salf protezioné »La Spona«. L'ann passé á i organisadus y les organisadësses dl festival venü malietes cun i dessëgns dessigná cun gran impëgn dai jogn y les jones d'La Spona. En chësc ann fajará chisc ultims dant a düc i interessá le teater de »Blancianëi«, la sabeda ai 20 dales 12:00.
I ticket pón iniann por le pröm iade cumpré online danfora, cina ai 17 de messé. I organisadus y les organisadësses ti ciara cun motivaziun y ligrëza a chësta proscima ediziun de Gadersound.

I mercui de ra Cultura Ladina
Per duc i marcui de luio e agosto l'Ulda la met a jì col storico Paolo Giacomel desferente ocajiogn per cugnesse meo la storia de la val de Anpezo
Dal 17 di luio al 04 de setembre torna in Anpezo i »Mercui de ra cultura ladina«, la scomenzadiva organizada da l'Ulda in colaborazion col prof. Paolo Giacomel che la inconsent de ruà a cugnesse ogni stemana tanc de aspec de la storia, de l'arte e de la cultura anpezana. Chest l programa per la sajon 2019:
Marcui 17 de luio: Gejia Anglicana e boteghe dei pech de Anpezo.
Marcui 24 de luio: Don Fonjo Videsott–Cassa Rural e Sozietà Cooperativa.
Marcui 31 de luio: La strada Regia
Marcui 07 de agosto: L Hotel Posta e la gejia de Santa Caterina
Marcui 14 de agosto: L Capitanat de Anpezo e la fontana storica
Marcui 21 de agosto: Capela del Santo inom de Maria a Coiana
Marcui 28 de agosto: Vijita a la mostra del Imperador Massimilian I
Marcui 04 de setembre da le 09.30: L Ciastel de Andrac
Marcui 04 de setembre da le 14.30: 110 agn de Strada de le Dolomiti
Dute le gite, fora che chele del 04 de setembre, le pearà via da le 10.30. Duc i apuntamenc i é debann, unizi cosc sarà, per i partezipanc, chi dei mujei e chi dei mezi. I luoch ulà se ciatà per pèe via i vegnarà lassei savè ota per ota sui placac. Per maor info: ra.ulda@tin.it o, per urgenze, 3803610764 (Francesca). Nte sto istà 2019 l'Ulda e l prof. Giacomel i ve speta de cotanc!

Joegn Mendranzes Musega Jazz
Ai 14 de messèl n conzert de ecezion te Navalge a Moena con Martina Iori e Rita Payés
La Grenz, col sostegn de Region, Provinzia e Comun General, met a jir la rassegna JMMJ (Joegn Mendranzes Musega Jazz) per valorisèr joegn talenc e lengac mendres.
Se taca en domenia ai 14 da les nef da sera te Navalge: a averjer l conzert Martina Iori, che dò aer vent i festival SUNS e LIET International la seghita a aer suzess con sia bela ousc compagnèda da chitara e ukulele e da Matteo Cuzzolin al sax, Marco Stagni al contrabas, Matteo Rossetto a la chitara eletrica e Enrico Tommasini a la baterìa.
Dò Martina, sun paladina ruarà Felix Rossy Quintet con Rita Payés: Felix Rossy l'à 25 egn e l sona da canche l n'aea 7. Con sia tromba l porta dant stii musicai desferenc viventé da l'improvisazion. Rita Payés l'à 19 egn, l'é na ciantarina e sonadora de possauna catalana con milions de views su Youtube e l'à encantà l publich l'an passà te Navalge con la Sant Andreu Jazz Band. L'é n conzert da no se perder: l'entrèda é debant.

Bal dles Stries
Sön Börz él indô les stries che bala, en vëndres ai 19 de messé. Program por pici y gragn
Ai 19 de messé él indô les stries che bala sön Börz! Dales 16:00 inant mët man n bel program por mituns adöm cun artisć de strada, jüc cun liëndes y stories. Dales 18:30 intratignimënt musical cun le Cor de Dlijia da Antermëia y dales 21:00 inant podarán jí deboriada cun i striuns söi pra de Pütia, cun dedô le gran bal cun les stries che cianta y bala incër le füch ia.

Le Ciastel dla Müjiga
Le Ciastel Colz a La Ila i fajará da cornisc a na seria de conzerc de messé y agost
Le pröm conzert dl'iniziativa »Le Ciastel dla Müjiga« tla curt dl Ciastel Colz é en mertesc ai 16 de messé cun Chloe Mun y Max Trebo al clavier. Ai 19 de messé podarán aldí les melodies dl cuintet classich Mamblix y ai 23 de messé sarál le cuintet de stromënc de banda y le grup »De Cater« che tëgn conzert. La sëra di 9 d'agost sarál da amiré sön la falzada dl ciastel n spetacul de videomapping cun löms, corusc y musiga. L'ultim apuntamënt vëgn spo tigní ai 13 de agost cun la Dimonic Band. Chësc conzert vëgn organisé en colaboraziun cun le Festival Badiamusica. Düc i apuntamënc mët man dales 21:15 y sce al ess da ester bur' tëmp, vëgni tignis tl salf dles manifestaziuns. Ma le spetacul de videomapping mët man dales 21:30.

Cursc da jadiné
L'Ice Club Alta Badia organisëia cursc da jadiné por prinzipianć y progredis
En lönesc ai 29 de messé mët man i cursc da jadiné por mitans y mituns dai 4 agn insö, pitá dal Ice Club Alta Badia por prinzipianć y progredis. I cursc jará inant por 6 edemes.
I mituns podará tó pert al curs un o dui iadi al'edema y al gnará tigní vigni lönesc y mercui dales 16:15 ales 17:00. Le cost dl curs é de 55,00 euro por un n iade al'edema y 90,00 euro por dui iadi al'edema.
Düc i mituns y dötes les mitans che á vëia da jadiné dess s'anunzié. Por informaziuns y prenotaziuns prëibel cherdé sö o scrí, anter i 25 de messé, al numer 333 2930586.

La mostra »ContainErt« déura les portes
Te otedé, en sabeda ai 20 de messé dales 18:00, gnarál invié ia a Longega la festa de daurida dla mostra d'ert dl'EPL-Ert por i Ladins. 12 é i containers
I 12 containers cun les lercs é partis sö insciö: Albert Crazzolara, Albert Mellauner & Christian Ferdigg, Fabian Feichter, Georg Erlacher, Guido Tavella, Gustav Willeit & Roberta Dapunt, Helmut Pizzinini, Hubert Prousch, Irina Tavella, Margareth Forer, Mariana Acuña, Markus Moling, Michael Moling, Pepi Pescollderungg, Raimond Mussner, Roberta Sottara, Le Lizeum d'ert, Simon Rubatscher.
La mostra sará spo daverta da en sabeda inant cina ai 18 d'agost 2019, vigni de dales 10:00 ales 12:00 y dales 15:00 ales 20:00.