Manifestazions atuales speziales

Data

19 de messel 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 19 de messel
Cursc da jadiné
L'Ice Club Alta Badia organisëia cursc da jadiné por prinzipianć y progredis
En lönesc ai 29 de messé mët man i cursc da jadiné por mitans y mituns dai 4 agn insö, pitá dal Ice Club Alta Badia por prinzipianć y por progredis. I cursc jará inant por 6 edemes.
I mituns podará tó pert al curs un o dui iadi al'edema y al gnará tigní vigni lönesc y mercui dales 16:15 ales 17:00. Le cost dl curs é de 55,00 euro por un n iade al'edema y 90,00 euro por dui iadi al'edema.
Düc i mituns y dötes les mitans che á vëia da jadiné dess s'anunzié. Por informaziuns y prenotaziuns prëibel cherdé sö o scrí, anter i 25 de messé, al numer 333 2930586.

»Dolomites Yoga Days«
Dai 25 ai 28 de messé án la poscibilité de imparé y perfezioné les tecniches dl hatha yoga
A La Ila y San Ciascian vëgnel metü a jí por le cuarto ann n program cun de plü workshops y cursc por prinzipianc y progredis. L'insegnant Egon Castlunger da La Ila mostrará les ativités, focalisan sön les posiziuns fisiches, la dërta respiraziun y la pert meditativa dl yoga. La jöbia ai 25.07. dales 10:00 vëgnel presenté le program, tl salf dles manifestaziuns a La Ila, y mostré les tecniches prinzipales dl yoga. Düc pó tó pert zënza prenotaziun. Ti prá daite dal Sas Dlacia vëgnel tigní le vëndres ai 26 dales 10:00 n curs de »yoga asana« y la sabeda ai 27 dales 10:00 él söl program na leziun che combinëia l'asana cun la respiraziun, sot al inom de »Hatha Vinyasa« cun lapró na picera introduziun al »Yin-Yoga«. Sce al ess da ester bur' tëmp, vëgn les leziuns tignides tla ciasa dla cultura a La Ila. I Dolomites Yoga Days se stlüj jö la domënia ai 28 de messé cun na sesciun completa de yoga, dales 9:30 tla ciasa dla cultura. Les iscriziuns mëss gní fates pro un di ufizi turistics dl'Alta Badia anter le de denant.

»Jöbia de Corvara«
Le secundo apuntamënt, la jöbia ai 25 de messé, é caraterisé dala musiga tradizionala
Fora por le raiun da jí a pe da Corvara, che vëgn stlüt al trafich dales 17:00 ales 22:30, podarán aldí melodies dl trio di corns da munt »Sassongher«, sciöche ince i boc dles scoriades di »Taistner Gaslkrocha«. Implü podarán amiré tl zënter i bai tradizionai dl grup de jones »Hegidex Gitschn«. Por i plü pici ne manciarál nia animaziun cun figöres de palés da soflé sö y ai pó ince se lascé depënje le müs da profescionisć. L'animaziun y la musiga tl zënter da Corvara vëgn pitada dales 17:15 ales 19:15 y do cëna dales 21:00 ales 22:15. La Jöbia de Corvara dedicada ala musiga tradizionala sará ciamó n iade ai 5 de setëmber.

»Jun a munt«
Na escurjiun por descurí les tradiziuns y i laurs da paur da zacan
En domënia ai 21 de messé vëgnel metü a jí a La Val por le 2. iade la manifestaziun »Jun a munt«. En chësc de án la poscibilité da conësce da daimpró les tradiziuns, la spëisa y i laurs da paur, sciöche ai ê dandaía. L'escurjiun fora por i pra de Ciavaza y Rit mët man dales 10:00 a Ramëi sura Spëscia; pro la pröma staziun a Paröis pón descurí deplü sön les Dolomites Patrimone Mondial UNESCO, adöm cun i responsabli dl parch natural Fanes – Senes – Braies. Sö Ciavaza sarál la uniun di paurs che tëgn n curs da sié por pici y gragn y al gnará ince metü a jí na gara da sié. Fora por le percurs ne manciarál sambëgn nia spezialités gastronomiches tradizionales dër scëmples, sciöche jopa arestida, soni y pan de siara cun smalz, polëinta cun ciajó, liagnes sfomiades y pücia, bales da cioce y gnoch da zigher cun capüc, mo ince cioce y ciajó; döt cant arjigné ca da plü uniuns. Do marëna pó i partezipanc fá na picera palsa tla zona relax püch dan la crusc da Rit. Dales 16:00 vëgnel tigní la premiaziun dl concurs de figöres de lëgn, metü a jí dal'Assoziaziun Turistica da La Val. Düc é bel inviá da tó pert.

Mostra »Terracotta« de Manfred Mureda
En vëndres ai 26 de messé dales 18:00, gnarál daurí tl Istitut Ladin Micurá de Rü a San Martin de Tor la mostra di laurs de Manfred Mureda
L'Istitut Ladin Micurá de Rü inviëia dër bel ala daurida dla mostra »Terracotta« dl artsit de Gherdëna Manfred Mureda, che vir y laora a Porsenú. La mostra é na retrospetiva cun sü laurs de arjila. Modelé cun i dëic chësc material é por l'artist sciöche na meditaziun. I temesc de so laur é tres la figöra umana, le corp intier o ince ma details.
La mostra sará spo daverta dai 27 de messé cina ai 11 de agost 2019, vigni de dales 10:00 ales 12:00 y dales 15:00 ales 19:00.

Festa per Sn. Raimund
Sn. Pluan de S. Cristina Raimund Perathoner ie 60 ani preve. Ai 21.07. iel dala 9:30 la Mëssa Solene
N la Segra de S. Cristina ai 21.07. iel dala 9:30 la Mëssa Solene, cun perdica de Sn. Eugen Runggaldier. La Mëssa vën abelida dal Cor y dal'Urchestra de S. Cristina, che lascia audì la mëssa de Mozart cun l Ave Maria de Rossini. La festa va pona inant sun Plaza de Dlieja y tl Zënter Iman.
Sn. Raimund ie nasciù a Urtijëi ai 20 de jené dl 1935. Do la scola a Urtijëi y pona a Dorf Tirol, àl fat l stude de teologia a Trënt. Cunsacrà preve iel unit ai 15.03.1959 a Gries. N Lunesc de Pasca dl medemo ann ova Sn. Raimund dit Mëssa Nevela.
La cumenanza de S. Cristina ti mbincia dut l bon a Sn. Raimund, sanità y la benedescion de Chël Bel Die, y che l posse mo resté giut te si S. Cristina tan ameda. Duc ie sambën nviei a unì a festejé cun nëus!

Dolomites Star Party
En ocajiun dl Dolomites Star Party, che vëgn tigní tl'Alta Badia, a Al Plan y sön Börz, podarán descurí cun plü esperc y apascioná les carateristiches dl cil
Dai 25 ai 31 de messé gnarál tigní n program rich de referac, incuntades y osservaziuns dl sorëdl y dles stëres. Tl zënter di paisc gnarál metü fora na mostra de imajes di fotografs de stëres plü conesciüs: dai 25 ai 27 de messé a San Ciascian y dai 28 ai 31 de messé a Al Plan.
Interessá á spo la poscibilité da osservé le sorëdl cun telescops aposta: ai 25 y 26.07. dlungia la scora de schi a La Ila y ai 29.07. dlungia palestra d'Al Plan, tres dales 16:00 ales 18:30.
Te n planetar cun na cupola de 8m podarán odëi i spetacui dles costelaziuns y di planëc, dai 25 ai 27.07. dlungia salf dles manifestaziuns a Calfosch y dai 28 ai 31 dlungia palestra d'Al Plan. Le planetar sará en funziun dales 17:00 ales 19:00 y dales 21:00 ales 23:30.
Ai 25.07. dales 21:15 él söl program te salf dles manifestaziuns a San Ciascian na relaziun sön l'arsida söla löna; ai 28 de messé dales 21:00 él sön paiun d'Al Plan na mësa torona cun plü reladus che baia dl'astronomia te chësc milenn. Al ne manciará nia animaziun por i mëndri, cun i missils d'ega, che vëgn stlopetá tl aier ai 26.07. sön plaza de Comun a Corvara y ai 29.07. pro la ciasa dl parch natural a Al Plan, tres dales 15:00 ales 17:00.
Ti ciaré ales stëres
Na pröma y mëndra osservaziun dles stëres gnará tignida ai 26.07. dales 21:30 inant al Sas Dlacia; le highlight dl Dolomites Star Party é dessigü la gran osservaziun dles stëres sön Börz, ai 30.07. dales 21:30 ales 23:30, acompagnada dales melodies al clavier de Alex Trebo. Por chësta sëra vëgnel pité n sorvisc de shuttle cina sön Börz. Sce al ess da ester bur' tëmp, vëgn l'osservaziun spostada al de do.

Badia Music Days Festival
A Badia trëi dis de musiga, dai 26 ai 28 de messé
Sciöche grups importanc él gnü invié iniann i »Mr. Punch« cun musiga di Marillion, i »Europroject« che sona musiga di Europe, i »Orion« che sona i Metallica en acustich, y i »Zen Garden« cun musiga di U2. Dales valades vijines sarál i »Velvet Radio« da Ampëz, i »Wing Dick« y »Jak« da Pardac. Les prömes döes fej cover rock, Davide Giacomuzzi alias Jak cianta y sona chitara da solist.
Al ne manciará nia musizisć dla Val Badia: la band jona de Badia »I Canaies«, i fredesc da La Pli Pire y Rudi Ellecosta cun i orghi da man, y ezezionalmënter por chësta ediziun na band nöia: i »Music Ways« cun musizisć bele consciüs. La sabeda danterite él i artisć »Deadra Project« da Verona che fej n spetacul de füc y löms. Le vëndres mëtera man dales 19:30 y al sonará Jak, Wing Dick y Mr. Punch, la sabeda incër les 18.00 mëton man cun Pire y Rudi, spo i Canaies, Music Ways, Velvet Radio, Deadra Project y Europroject. La domënia mët man i Orion y spo i Zen Garden, che stlujará jö le festival. L'entrada é indô debann.

Nos dai strudli
Le strudl te dötes sües variaziuns é le protagonist dla manifestaziun »Nos dai strudli«, en mercui ai 24 de messé dales 19:00 inant a Badia
Nü coghi y conditurs de plü hotí y restoranc de Badia interpretëia do süa fantasia y so stil chësta spezialité locala. Les variaziuns de strudl duc y saré gnará sorvides cun n bun gote de vin dl Südtirol, fora por la strada prinzipala da San Linert, stlüta al trafich dales 18:30 ales 23:00. Le grup »Pamstiddn Kings« se crüzia dl intratignimënt musical. Por tó pert ala serada »Nos dai strudli« n'ól ester degüna prenotaziun; an pó cumpré i bons por i strudli bele danfora ti ofizi turistics dl'Alta Badia, o diretamënter en chë sëra tl zënter da San Linert. La manifestaziun é gnüda reconesciüda en chësc ann sciöche »Going green event«, n evënt te chël che an ciara da ti dé ince na gran importanza ala sostenibilité y al'ecologia. Sce al é bur' tëmp, vëgn la manifestaziun spostada ala jöbia ai 25 de messé.

Roda di Morins a Lungiarü
I Stödafüch da Lungiarü inviëia ala Roda di Morins 2019, cun spezialités gastronomiches de nüsc paisc
La domënia ai 4 d'agost 2019 vëgnel metü da jí a Lungiarü la »Roda di Morins 2019«, na manifestaziun che acompagnëia na bela spazierada por odëi i morins en funziun. La roda pëia ia da Lungiarü y se desfira por 5 km tres la Val di Morins. Iniann él la novité che sön tru sarál bëgn 9 punc de restoraziun, olache al vëgn pité spezialités de nüsc posć: da cajincí t'ega a gnoch da zigher, da fëies da soni a balotes cun golasc, cina tutres, spezialités ala grilia, strudel da pom y d'ater. I Stödafüch da Lungiarü se conforta da podëi ves saludé. Al ne manciará nia la cornisc musicala.

Peter Senoner y Ingrid Hora
La doi mostres ndividueles unirà giaurides ai 27.07. dala 17:00 inant tla Galaria Doris Ghetta a Puntives
Da una na pert iel Peter Senoner, bele pra si segonda mostra persunela tla Galaria Doris Ghetta. Dal'autra iel Ingrid Hora, che ie pra si prim iede tla galaria d'ert a Puntives. L se trata de doi mostres ndividueles.
N sada ai 27.07. dala 17:00 scumëncia la giaurida cun la performance »BIEN« de Ingrid Hora.
Da dedò iel la giaurida dla mostra de Peter Senoner, che se partësc su danter l evënt tla Galaria Doris Ghetta dala 17:30 cun la prejentazion dla nstalazion de desseniës »Circus Corpus«, y na segonda pert, che à inuem »Circus Cor«. Te chësta uniràl prejentà n setting nuef per na scultura dedora, y ie dala 19:00 tl atelier dl artista a Laion, frazion de Albeins numer 39.
Duc ie nviei de cuer ala giaurida de chësta doi mostres!

600 agn dlijia da Calfosch: 1419-2019
Calfosch festejëia i 600 agn dla dlijia cun na mostra sön plaza de dlijia
En chësc ann pón festejé a Calfosch i 600 agn dla dlijia de paisc. Chësc vëgn fat cun na mostra dal titul »Da inlaota al dedaincö«. Ara é metüda fora sön plaza de dlijia y sará da odëi döt isté.
Sce i porvun da ponsé scöche la vita sará stada dan 600 agn a Calfosch, nes fajunse de morvëia che cun la pücia desponibilité de mesi che ai â inlaota, ési stá bogn da mëte en pé na opera che vëgn tan amirada ince aldedaincö. Chësc post de pésc cun la cornisc de munts incëria á dessigü ispiré y motivé l'ideadú dla costruziun, y le rest á fat la popolaziun cun la forza dl Spirit, la fede te Dî tan sterscia, la orenté da mëte dötes les forzes y ressorses te chë costruziun. I ti sun reconescënc a nüsc antenac che i podun tres ciamó s'anuzé de chësta strotöra tan armoniosa y bela – post ideal olache nüsc pinsier se relazionëia cun les forzes de Dî, ti bi momënc y ti momënc de dificolté söl tru de nosta vita.

»Gadersound« é indô dan porta
Chësc fin dl'edema ai 19 y 20 de messé éra indô tan inant: a Pidrô gnarál tigní le festival alaleria »Gadersound«
Danter les bands sarál pro chësta 16ejima ediziun ince da aldí i »Koza Mostra« dala Grecia, conesciüs por avëi davagné le sesto post pro l'Eurovision Song Contest dl 2013.
Ince en chësc ann á i jogn y les jones dl festival preodü na colaboraziun cun le salf protezioné »La Spona«. L'ann passé á i organisadus y les organisadësses dl festival venü malietes cun i dessëgns dessigná cun gran impëgn dai jogn y les jones d'La Spona.
En chësc ann fajará chisc ultims dant a düc i interessá le teater de »Blancianëi«, la sabeda ai 20 dales 12:00.
I organisadus y les organisadësses ti ciara cun motivaziun y ligrëza a chësta proscima ediziun de Gadersound.

La mostra »ContainErt« deura les portes
Indoman, sabeda ai 20 de messé dales 18:00, él a Longega la festa de daurida dla mostra d'ert dl'EPL-Ert por i Ladins. 12 é i containers. Al sona Eduard Huber, spezialist söi orghi da botuns
I 12 containers cun les lercs é partis sö insciö: Albert Crazzolara, Albert Mellauner & Christian Ferdigg, Fabian Feichter, Georg Erlacher, Guido Tavella, Gustav Willeit & Roberta Dapunt, Helmut Pizzinini, Hubert Prousch, Irina Tavella, Margareth Forer, Mariana Acuña, Markus Moling, Michael Moling, Pepi Pescollderungg, Raimond Mussner, Roberta Sottara, Le Lizeum d'ert, Simon Rubatscher.
La mostra sará spo daverta da chësta domënia inant cina ai 18 d'agost 2019, vigni de dales 10:00 ales 12:00 y dales 15:00 ales 20:00.

Cujiné te ütia
Tratan l'isté vëgnel metü a jí tl'Alta Badia de plü manifestaziuns liades ala gastronomia. Öna de chëstes á inom »Cujiné te ütia«
Ara se trata de n curs da cujiné, che vëgn tigní tles üties dl'Alta Badia a 2.000m. Le cogo dla ütia presentará na rezeta de na spezialité tradizionala y ti mostrará ai partezipanc sciöche ara vëgn arjignada. Chi che tol pert podará instësc cujiné y arjigné so taí. Le pröm apuntamënt é en vëndres ai 26 de messé tla Ütia de Bioch, olache an pó imparé da fá cajincí t'ega. Ai 9 d'agost él le cogo dla ütia Club Moritzino che insëgna da fá spazlan de poia, ai 23 d'agost vëgnel arjigné tla ütia I Tabla bales da spinot. Le curs mët man dales 15:00. An mëss se scrí ite anter le de denant ti ofizi turistics dl'Alta Badia.

Segonda Academia da d'Instà
La lia La Vëta mët a jì la segonda Academia da d'Instà tla berstot de Aron Demetz a Puntives. La ie davierta dai 22.07. nchin ai 03.08.
Pra l'Academia da d'Instà, chëst ann la segonda edizion, pòssen ti cialé ai artisć y ala artistes ntan che i lëura y pona ai lëures finei. La ie n cunlaurazion cun l Südtiroler Künstlerbund. I referënc ie Peter Senoner, Aron Demetz, Markus Delago y Reinhard Eiber, che fajerà cursc de scultura y pitura. Ai 02. y ai 03.08. pòssen pona jì a ti cialé ai lëures finei di artisć y dla artistes che à fat pea. La segonda Academia da d'Instà dla lia La Vëta ie davierta dai 22.07. nchin ai 03.08., da lunesc nchin sada dala 08:30 nchin la 12:00 y dala 14:00 nchin la 18:00. Per plu nfurmazions, pòssen cherdé su Aron Demetz al 333 94920337.

Badiamusica sön paladina
Chisc dis él söl program cater conzerc tla cornisc dl festival da d'isté
I apuntamënc cun le Festival Badiamusica vá inant ince chëst'edema, cun conzerc a La Val, San Ciascian, Badia y Corvara.
La Val: »Ensemble Fidicinium«
»Celebramus« é musiga por zelebré i gran maestri dl pröm baroch, sciöche Claudio Monterverdi y Johann Heinrich Buxtehude. Ai 19 de messé dales 21:00 lascia le »Ensemble Fidicinium« ringhiní sonns barocs tla dlijia da La Val.
San Ciascian: »La douceur et l'esprit«
Le trio »La douceur et l'esprit«, metü adöm da Nadia Prousch al fabló, Veronika Egger ala vidora y viola da gamba y Mariana Bisacchi al cembalo, presentëia n program cun de vigni sort de flus musicales de epoches desvalies, da chëres plü vedles ala musiga contemporana. Le conzert vëgn tigní tl salf dles manifestaziuns a San Ciascian, en domënia ai 21 de messé dales 21:15.
Badia: sonns söl orghe
Le bel sonn dl orghe dla dlijia de Badia sará indô da aldí en lönesc ai 22 de messé dales 21:15, cun compositurs de gran importanza por chësc stroment: Francois Couperin, J. S. Bach, Dietrich Buxtehude y Georg Böhm. Al orghe sona la ruscia Olga Persits.
Corvara: »Ensemble Moebius«
Le fí cöce che condüj fora por le program dl »Ensemble Moebius« é le bal. Tanja Agreiter al fabló y le duo de viola y chitara, inviëia a na sëra de bai, scric en gran pert da compositurs dl'America Latina. Le conzert é da aldí en mercui ai 24 de messé tl salf dles manifestaziuns a Corvara.