Manifestazions atuales speziales

Data

02 de agost 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 2 de agost
10 agn Orchestra Val Badia
Conzert iubilar en vëndres ai 9 d'agost dales 20:30, te dlijia da La Val
Al é recorc de tëmps passá, indere ciamó vis, chi che l'Orchestra Val Badia porta dant tl conzert de iubileum ai 9 d'agost dales 20:30 tla dlijia da La Val. Por le iubileum di 10 agn, na spazirada danterater cun les stëres dla musiga dl siscënt, da Antonio Vivaldi a Georg Friedrich Händel cina Johann Sebastian Bach. Da richëza de ornamënc y solenité dl'orchestra d'archëc, ai passaji de gran virtuosité di solisć – la musiga baroca é musiga alingrana, plëna de ispiraziun. Vigni nota nes dá l'idea de movimënt, de abondanza y forsc sarál val' nota che portará pro a cherié n recort de na sëra da d'isté. I sëis dër bel inviá al conzert. L'entrada é lëdia.q

Ferrari y i ani d'or dl Cavallino
Ancunteda cun l autor Umberto Zapeloni te Tublà da Nives te Sëlva, ulache l vën prejentà n mierculdi ai 7 de agost dala 21.00 l liber nuef n con' dl mit dla Ferrari
L liber à l titul »Ferrari. Gli uomini d'oro del Cavallino–Ritratti di nove eroici piloti che hanno fatto la storia della Ferrari e della Formula Uno.« L autor nstës Umberto Zapeloni sarà prejënt. Ël ie bele dai ani '80 che ti sta do ala Formula 1, ntlëuta coche jurnalista de »il Giornale«. Zapeloni ie danter l auter nce stat vizediretëur de „La Gazzetta dello Sport" y à nce scrit plu libri. Atualmënter àl na cunlaurazion cun plu zaites y cun »Sky« y »Mediaset« y scrij regulermënter sun l blog topspeed.blog.
La prejentazion mët man dala nuef dassëira. La ntreda ie debant.

Festa dla leteratöra a Longega
Cun la premiaziun dl »Pest de poesies Angelo Trebo 2018«
L'EPL – Ert por i Ladins inviëia ala festa dla leteratöra cun auturs ladins y ala premiaziun dl Pest Angelo Trebo 2018, al intern dla mostra ContainErt a Longega, en sabeda ai 10 d'agost 2019, dales 17:00 inant. I recordun che i pesć dla ediziun 2018 ti é güs assegná dala juria menada da Roland Verra a chisc auturs: Jasmin Ferdigg (1. post), André Comploi (2. post), Mattia Maldonado y Rut Bernardi (ex aequo 3. post).
Le pest vëgn scrit fora dal'EPL dal 1997 incá – cun tapa vigni trëi agn.

Hubert Dorigatti a ContainErt
Le ciantautur y chitarist blues d'ezeziun sonará a Longega adöm cun Fabrizio Poggi (blues harp) y Matteo Giordani (percusciuns)
Le conzert de Hubert Dorigatti sará en sabeda, ai 10 d'agost, dales 19:30 inant (do la festa dla leteratöra) tl areal dla mostra EPL-Ert por i Ladins »ContainErt« a Longega.
Entrada debann!

»Plajëis y duciaries« a Calfosch
En mertesc ai 6 d'agost vëgnel indô metü a jí la degustaziun de patüc duc sön plaza de dlijia
Sön plaza de dlijia a Calfosch vëgnel metü a jí dales 17:00 ales 22:30 na degustaziun de patüc duc y d'atres spezialités tradizionales. Al tol pert plü eserzizi dl post: le hotel Gran Ciasa, le Jägerhof adöm cun la Ütia Edelweiss, la botëga de patüc da mangé Costa, le restorant y pizzeria Salvan, le Berghotel Ladinia, la pension Garden, le restorant Stria, la botëga Arte Costa y la ütia Mesoles. La manifestaziun vëgn abelida cun musiga di grups Annika Borsetto, Louis & the Space Travellers, Burggräfler Buam y El Dorado. Por i plü pici vëgnel ince metü a jí animaziun, olache ai pó sé lascé depënje le müs o soghé cun les figöres de palons.

Marcé por n bun fin
A La Val vëgnel organisé n marcé di pöresc, por daidé fá sö na scora tl Camerun. Al sará dai 18 ai 25 de agost
Chësc ann vëgnel recordé i 20 agn dala mort de siur Heinrich Videsott. Por recordé so gran ejëmpl de vita, süa desponibilité de y nöt por i atri, sües mans y so cör tres daverc por düc, orunse daidé cun nostes ofertes fá sö na scora tl Camerun. Te chësta tera de misciun á lauré y pordiché la parora de Dî por tröc agn le nu de siur Videsott – siur Hans Kronbichler. Por cöie adöm ofertes vëgnel fat n marcé di pöresc a La Val, dai 18 ai 25 de agost, vigni de dales 8:00 ales 11:00 y dales 16:00 ales 19:00. Al vëgn perié do cosses de secunda man, che pó gní condütes tl pice salf a La Val, en vëndres ai 16 d'agost dales 9:00 ales 12:00 y dales 14:00 ales 17:00. Por informaziuns plü avisa pón cherdé sö le 331 2719213. Dilan a düc dl aiüt.

Sonns y liëndes te Fanes
Pro la Ücia Lavarella él ai 11 d'agost l'evënt »The Fanes saga & his modern sound«, cun Simon Kostner, Lucia Kastlunger & la band dimonic, y Hubert Dorigatti
En domënia ai 11 d'agost, danter les 2 y les 5 domisdé, sarál dan la Ücia Lavarella tla bela contrada de Fanes n conzert daldöt particolar, cun la musizista Lucia Kastlunger y süa band »dimonic« y le chitarist Hubert Dorigatti. Fora por le conzert condujará l'atur Simon Kostner, che tolará ispiraziun dala musiga por cunté dl raiun de Fanes y de sües liëndes. L'evënt vëgn invié ia dai patruns dla ütia, por festejé i 10 agn dles Dolomites UNESCO.

Jöbia de Corvara
Ai 8 d'agost animaziun por pici y gragn tl zënter da Corvara
»La jöbia de Corvara« söl program ai 8 de agost ti vëgn dedicada ai mituns. Dales 17:15 ales 19:15 y do cëna dales 21:00 ales 22:15 sarál fora por le zënter da Corvara de vigni sort de animaziun cun clowns, strinadus, face paiting y jüc. I grups »Pamstiddn Kings« y »El Dorado« se cruziará dl intratignimënt musical y i mituns á insciö poscibilité da passé n domisdé y na sëra cun tröp devertimënt.
La manifestaziun cun animaziun por mituns gnará ciamó n iade metüda a jí ai 29 de agost. Pro vigni »Jöbia de Corvara« vëgn la strada prinzipala da Corvara stlüta al trafich dales 17:00 ales 22:30.

Conzert de clavier tla natöra
Le »pianista fuoriposto« Paolo Zanarella sona tles contrades dolomitiches: ai 5, 6 y 7 d'agost
Paolo Zanarella é n musizist particolar: al porta dant conzerc de clavier te posć nia da vignidé: tla natöra, sön plazes y strades te cités, sön punc y barches a Aunejia y tröc d'atri ambiënc. Süa filosofia é chëra de porté la musiga indlunch, ince te posć olache an ne se l'aspeta nia. Porchël s'al dé inom »Il pianista fuoriposto« – le pianist viandant. En chësc iade él la bela contrada dles Dolomites che i fej da cornisc a sü conzerc. En lönesc ai 5 de agost sonarál a La Crusc a Badia (sce al é bur' tëmp tl zënter da San Ciascian); mertesc ai 6 d'agost gnará i pra da Rit animá dal sonn dl clavier (sce al é bur' tëmp tl zënter da La Val); l'ultim apuntamënt é en mercui ai 7 de agost ti pra sot ales cascades de Pisciadú a Calfosch (sce al é bur' tëmp sön plaza de comun a Corvara). Düc i amanc dla musiga y dla natöra é inviá ai conzerc, che mët man dales 10:00 y jará tres döt le de cina ales 17:00.

»Peter Pan – en jore de soms«
Musical te cater lingac metü a jí dal Sorvisc ai Jogn Val Badia en colaboraziun cun le Cor di Jogn ProVoXis, adöm cun mituns y mitans dla Val Badia. Premiera incö vëndres ai 2 d'agost
La direziun musicala é de Sofia Pisching, la rejia y coreografia de Barbara Comploi Rottensteiner, i costüms de Maria Frenner, la scenografia de Ursula Tavella, l'assistënza ala rejia de Nadia Gerstl, la coordinaziun de Stefanie Kaneider y les traduziuns por ladin de Pablo Palfrader.
Sön palch sarál da odëi i protagonisć: Arico Elisa, Bacher Aylin, Clara Luianta, Clara Moltina, Costabiei Aylin, Costalunga Marcus, Ferdigg Anna, Kostner Emily, Lezuo Mattia, Mohr Maximilian, Pescollderung Roman, Sogorka Emma, Ties Jan, Ties Andre.
Da pert dl Cor di Jogn ProVoXis: Canins Greta, Costalunga Miriam, Costalunga Tobias, Costner Christin, Dapoz Johanna, Frenademez Sara, Garriga Sivila Gemma, Kaneider Nicole, Pescollderungg Maddalena, Rottonara Luca, Tavella Ines, Tolpeit Daniel, Videssot Ilenia.
Band: Moling Matthias, Pedevilla Patrick, Willeit Daniel, Palfrader Marion, Verginer Peter, Kaneider Stefanie, Pisching Sofia.
Les rapresentaziuns é incö vëndres ai 2 d'agost dales 19:30, indoman sabeda ai 3 d'agost dales 18:00 y en domënia ai 4 d'agost dales 15:00 y dales 20:00, dagnora te Ciasa dla Cultura a La Ila. Les prenotaziuns vëgn tutes sö tres SMS al nr. 335 5400890. Al é da dé dant inom, cognom y numer de posć. Al gnará dé conferma sce la prenotaziun é apost. Le cost dla cherta é de 12,00€ por i adulc, 7,00€ por mituns cina 12 agn. I mituns cina 2 agn pó jí ite debann. Entrada n'ora dan le mëteman.
La produziun é dl Sorvisc ai Jogn Val Badia, cun le sostëgn finanziar dla Regiun Autonoma Trentin Südtirol, Cassa Raiffeisen Val Badia, Alta Badia, le Comun de Badia y le Comun de Corvara.

La Grupa Helios te Fascia
En domenia ai 4 de aost i portarà dant l conzert »Feel the beat« te La Gran Ciasa a Soraga
L grop cognosciù de ciantarins e musizisć Helios de Ortijei rua per la pruma outa te Fascia en domenia ai 4 de aost. »Feel the beat« l'é l titol del conzert che i joegn de Gherdena portarà dant te la sala de La Gran Ciasa a Soraga da les 21:15. L conzert é stat endrezà da la Comiscion cultura de la parochies de Fascia en colaborazion con l Comitat Manifestazions de Soraga tel chèder de la rassegna »Ispirazions d'istà 2019«.
La Grupa Helios portarà te Fascia sia gaissa e sie entusiasm te n conzert endrezà per chesta ocajion olache no menciarà la cianties per ladin che é states regoetes ence tel nef CD dal titol »Suvier« dat fora del 2017 ma ence toc de musega rock e pop. Na ocajion da no perder tant per ghesć che jent del post che podarà cognoscer e aprijièr la musega e la cianties de chest grop da talent.

L »Saslonch« de Vinzenz Senoner
La pitures dl artista da Fussel ie da udëi nchin ala fin dl mëns tla sënta dla Cassa Raiffeisen a S. Cristina
N ucajion di 150 ani dala prima arpizeda storica dl Saslonch, mët Vinzenz Senoner da Fussel ora si pitures che reprejënta nosc crëp simbul tla galaria dla Cassa Raiffeisen a S. Cristina.
La pitures ie unides realisedes dal artista n pert da Plesdinaz, dal meje de Fussel, via de viers dl Saslonch, ma nce da d'autra perspetives danter la plu beles te Gherdëina.
»Uni di che n ti cëla al Saslonch iel autramënter. Datrai iel daduman mpue' fat ite cun nibl da bata, da mesdì via mpue' da plueia y da sëira via luna inò tres l surëdl cun culëures cuecenins. Sambën che l Saslonch se muda nce aldò dla sajons, se furnian uni iede mpue' autramënter. Y plu che n ti cëla, y plu bel che l ie!« nscila Vinzenz Senoner.
N possa jì a ti cialé ala pitures dla mostra »Saslonch« nchin ai 30.08. ntan i orares de giaurida dla banca.

Al Plan: trëi dis de festa
Dai 2 ai 4 d'agost sarál gran festa a Al Plan. La domënia ince cun la gran defilada dl Rëgn de Fanes
Te chësc fin dl'edema lunch dal vëndres ai 2 d'agost ala domënia ai 4 á la Musiga d'Al Plan le plajëi da invié a trëi dis de festa cun musiga y alegria, sön plaza dl paiun de paisc. Le vëndres dales 21:00 inant sonará la partyband »The Jam'son«, la sabeda dala medema ora jará sön paladina la »Blaskapelle Gehörsturz« dal Tirol.
N program rich él spo ince la domënia. An mët man dales 11:00 cun le conzert dla musiga da Kaltern, por passé spo dales 14:00 ala gran defilada dles liëndes, che se sleria incër paisc. Dales 15:30 sonará la musiga da Luttach y dales 17:00 la Musiga da Rina. Dales 19:00 inant él spo musiga cun »Die Bergdiamanten«.

Conzert dl trio »Treboton«
Le trio metü adöm da Alex Trebo, Max Castlunger y Marco Stagni sona ai 9 d'agost tla curt dl Museum Ladin Ciastel de Tor
Le »Treboton Trio« inviëia a n conzert cinematich, eletro-acustich, en vëndres ai 9 d'agost dales 21:30 tl Museum Ladin Ciastel de Tor. Tla curt dl ciastel podarán aldí composiziuns de Alex Trebo, che sonará le clavier acompagné da Max Castlunger ales percusciuns/fabló, y Marco Stagni al cuntrabas. Les melodies cun elemënc eletronics y acustics ará ince contegnüs jazz y dla musiga »ambient«. La sëra vëgn tignida en colaboraziun cun l'Assoziaziun Turistica Al Plan/San Martin y le Museum Ladin Ciastel de Tor.

Mostra »Mejes – Memoria de na cuntreda«
La giaurida dla mostra dl Museum Gherdëina tla gran sala dla Cësa di Cungresc a Urtijëi ie n dumënia ai 4 de agost dala 10:00
L Museum Gherdëina à l plajëi de Ve nvië ala giaurida dla mostra »Mejes de Gherdëina–Memoria de na cuntreda« doduman dumënia ai 4 de agost dala 10:00 tla gran sala dla Cësa di Cungresc a Urtijëi.
La paroles de salut unirà purtedes dai assessëures Daniel Alfreider y Manfred Vallazza, dal ambolt Tobia Moroder y dala presidënta dl Museum Marie Theres Thaler.
La mostra unirà prejenteda dai autores Wolfgang von Klebelsberg, Paulina Moroder y Václav Šedý, cun reflescions de Annibale Salsa per la Fundazion Dolomites Unesco.
Curnisc mujighela dl Cor »Sasslong«.
Do la giaurida ufiziela n chësc di resta la mostra davierta nchin la 16:00 cun ntreda debant.
Orar de giaurida dai 05.08. inant: da lunesc nchin sada dala 15:00-18:00, de dumënia dala 10:00-12:30.
La mostra sarà da udëi nchin ala fin de jené dl 2020, dan che la unirà meneda ncantëur tla Elpes.