Manifestazions atuales speziales

Data

16 de agost 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 16 de agost
Ensemble »Delirio«
Cun n conzert de musiga baroca vá a piz le festival Badiamusica 2019. L’ensemble »Delirio« sona ai 19 d’agost Badia
Le festival Badiamusica stlüj jö süa sajun cun le ensemble »Delirio« che portará dant n program baroch, cun na spazierada da süd a nord, passan fora por i zëntri plü importanc dl monn todësch: da Heinrich Franz Biber a Johann Heinrich Schmelzer, Johann Shop y Samuel Scheidt. Le conzert vëgn tigní en lönesc ai 19 de agost, dales 21:15, tla Ciasa Runcher a Badia.

Ert sön strada pro la »Jöbia de Corvara«
Protagonisć dl cuinto apuntamënt ai 22 de agost sará i artisć de strada
En jöbia ai 22 d’agost él indô la »Jöbia de Corvara«, tla zona pedonala dl paisc, stlüta al trafich dales 17:00 ales 22:30. Al gnará pité animaziun y tröp devertimënt, adöm cun artisć sön iames de lëgn, animadus che fej esibiziuns spetacolares cun aní, vëtes y de vigni sort de injins da zircus, sciöche ince clown. Al ne manciará nia musiga dal ví cun le grup »Cartoon Jazz«. L’animaziun fora por le zënter de paisc vëgn tignida dales 17:15 ales 19:15 y dales 21:00 ales 22:15. Pici y gragn é dër bel inviá a tó pert. La manifestaziun »Jöbia de Corvara« gnará ciamó metüda a jí dui iadi chësc isté: ai 29 de agost dedicada ai mituns y ai 5 de setëmber ala musiga tradizionala.

Iluminaziun dl Sassongher
Gran festa a Corvara, en vëndres ai 23 d’agost dales 21:15, tl zënter dl paisc
Sciöche al é oramai tradiziun, vëgnel ince en chësc ann metü a jí a Corvara l’iluminaziun dl Sassongher. La manifestaziun gnará tignida en vëndres ai 23 d’agost. Por l’ocajiun sarál la Müjiga da Calfosch-Corvara che abelësc la serada cun l’ingres dales 21:00 fora por le zënter de Corvara; dales 21:15 tignarára n pice conzert, sön paiun dla plaza de Comun. An podará aldí les plü beles melodies fora dl repertore rich dla Müjiga. Tratan le conzert sarál spo n valgügn mëmbri dl Aiüt Alpinisć Alta Badia che iluminará le Sassongher, le crëp simbol dl paisc. Incër les 22:00 podarán amiré n spetacul de löms a laser tl scür dla sëra. Sce al ess da ester bur’ tëmp, vëgn le conzert tigní daite, deperpo che l’iluminaziun y le spetacul de löms vëgn desdit.

Poesies de Mattia Maldonado
En vëndres ai 16 de agost dales 18:00 él tl Istitut Ladin Micurá de Rü a San Martin de Tor la presentaziun dl liber de poesies de Mattia Maldonado, cun ilustraziuns de Silvia Baccanti. Lapró la daurida dla mostra
L’Istitut Ladin Micurá de Rü inviëia dër bel ala presentaziun dl liber de poesies de Mattia Maldonado »INSCIÖ-COSÌ« cun ilustraziuns de Silvia Baccanti. Mattia scrí da plü agn y chësc liber é na ocajiun da mëte adöm sü pinsiers. Silvia Baccanti ti á spo dé na forma visiva tres les ilustraziuns, na tle de letöra implü, che i odun tl liber y ince tla mostra tl salamënt dl Istitut.
La mostra sará spo daverta dai 17 de messé inant cina al 1. de setëmber 2019, vigni de dales 10:00 ales 12:00 y dales 15:00 ales 19:00.

Saús dl bosch
En mertesc ai 20 d’agost vëgnel metü a jí la manifestaziun gastronomica »Saus dl bosch«, tla cornisc particolara dl parch dai tiers a Calfosch
Sis strotöres dl post, anter chisc le Berghotel Ladinia, la pension Garden, i restoranc Stria, Salvan, Mesoles y Mathiaskeller arjigna ca dales 11:30 ales 17:00 de vigni sort de spezialités gastronomiches locales. Le grup »Haderkrainer« se cruziará dl intratignimënt musical dales 12:00 ales 16:00 y dales 14:00 inant podarán aldí ince les melodies di grups »Louis & the Space Travellers« y »El Dorado«. I amanc dla munt y dla gastronomia á la poscibilité da passé n domisdé n pü’ atramënter, fajon na roda fora por le parch dai tiers y ciarcian les spezialités gastronomiches pro les piceres üties. I plü pici podará se devertí tla ciasa di mituns cun jüc desvalis, ti fajon aicia ai tiers tl parch y sön les tors de lëgn, olache al sará dales 15:00 inant ince n clown che fej de vigni sort de animaziun por mituns.

»Apostoli« de Pierre Auzias a Urtijëi
Vernissage dla mostra tla sënta dla Lia Mostra d’Ert ncuei vënderdi ai 16 de agost. La mostra resta davierta nchin ai 1. de setëmber
Pra la mostra d’ert dal titul »Apostoli« dl franzëus Pierre Auzias, che ie tla sënta dla Lia Mostra d’Ert – Circolo sun Plaza de Sant Antone a Urtijëi, iel da udëi n pert scultures y n pert nstalazions, mez per sort, n con’ dla tematica dl’ert sacrela y dla trascendënza.
La vernissage ie ncuei vënderdi ai 16 de agost dala 20:30. Dutes y duc ie nviei de cuer ala giaurida, ma pona nce a ti cialé ala mostra, che ie da udëi mo passa doi enes alalongia, dai 17 de agost nchin ai 1. de setëmber, orares de giaurida: uni di dala 16:00 nchin la 19:00 y dala 20:00 nchin la 23:00.

Pierre Auzias y dut l Cunsëi dla Lia Mostra d’Ert se ncunforta sun Vo y Ve rengrazia bele danora sce pudëis Ve tò dl’aurela de unì ala vernissage y a ti cialé ala mostra.


»Exodus et adiemus«
Ai 24 y 25 de agost: gran cunzert cun l’Orchestra Sonoton Gherdëina, l Cor di Jëuni Gherdëina y la Singakademie Chemnitz
L’Orchestra Sonoton Gherdëina, l Cor di Jëuni Gherdëina y la Singakademie Chemnitz Ve nvieia de cuer al cunzert n sada ai 24 de agost y n dumënia ai 25 de agost, for dala 20:30, tla palestra dla scola elementera de Urtijëi.
Ntan chësc cunzert audirëis la operes cunesciudes “Symphonic Adiemus” de Karl Jenkins y “Exodus” de Wojciech Kilar.
I dirighënc ie Matthäus Crepaz per l’Orchestra Sonoton, Samuel Runggaldier per l Cor di Jëuni Gherdëina y Andreas Prabst per la Singakademie Chemnitz
Chertes de ntreda iel da giaté tl Ufize per l Turism de Urtijëi y dan l cunzert dala 19.30 inant. I mujizisć y i ciantarins se ncunforta sun Vosc unì!

Film alaleria a La Crusc
En mertesc ai 20 de agost él na proieziun de film alaleria, tla culissa particolara sot Sas dla Crusc a Badia
Tl scür dla sëra gnarál mostré le film por talian »Fino alla fine dell’Everest« dl alpinist Davide Chiesa, che sará ince presënt ala sëra. La proieziun mët man dales 21:15 y denant podará i partezipanc se gode n aperitif cun val’ da mangé pro les üties Nagler y Lee, tratan le jí jö dl sorëdl. Sce le tëmp dëida, podarán ince amiré le spetacul dl’inrosadöra sön i parëis de Sas dla Crusc. Dales 18:30 gnará l’implant portamunt daurí por jí sö y ala fin dla proieziun podarán l’anuzé por gní jö te paisc.
La manifestaziun, organisada da pert dl’Assoziaziun Turistica Badia en colaboraziun cun i implanc portamunt La Crusc, la ütia Nagler y la ütia Lee, é gnüda reconesciüda sciöche »Going green event«, n evënt pro chël che an ciara da ti dé ince na gran importanza ala sostenibilité y al’ecologia.

Sëra a löm de ciandëra
A San Ciascian vëgnel metü a jí na sëra te chëra che le zënter dl paisc gnará iluminé ma da chentli y ciandëres, por podëi se gode i corusc dl cil plëgn de stëres
Le lönesc ai 19 de agost podarán s’la spaziré fora por le zënter stlüt al trafich y zënza iluminaziun eletrica, se relassé y ascuté sö les melodies acustiches dl grup JEMM Music Project. En ocajiun dla »…sëra a löm de ciandëra«, che mët man dales 21:30, gnarál dé fora spezialités gastronomiches, arjignades ca zënza anuzé l’eletrizité: sciöche taís frëic, spezialités ladines y val’ duciaria. La serada gnará ince animada da plü artisć: Miss Monik y Miss Paola tëgn n spetacul de füch, i spodafüch Mr. Skizzo y Mr. G sön les iames de lëgn lasciará le publich zënza fle cun sües esibiziuns, y Mr. Rubino tëgn n conzert cun i goti de cristal. Düc i abitanc da San Ciascian é inviá da tó pert ala manifestaziun, ince destodan les löms dales 21:30 ales 23:30 y iluminan les ciases ma cun ciandëres. La manifestaziun dess ince ester n pice contribut ala natöra, cun sparagné energia y smendrí le pëis visif y acustich por l’ambiënt. Por chësc motif é la manifestaziun ince gnüda reconesciüda sciöche »going green event«.

»La Follia«
En lönesc, ai 19 d’agost, dales 21:00, presentëia le duo Angela Palfrader (vidora) y Ruggero Livieri (orghe de dlijia) te dlijia d’Al Plan le CD »La Follia«
Avenn a desposiziun le bel orghe dla dlijia de Sant Antonio Abate a Padoa, costruí dal organar Zanin, á le duo ponsé da tó sö toc sides por i stromënc susc co ince scric por trami. Mo nia ma, sön le cd, él ince da aldí i dui conzerc (BWV 1041 y BWV 1042) de J.S. Bach che foss pordërt originai por vidora y orchestra, »metüda adöm« te chësc caje dal orghe, che fej insciö fora de chëstes döes operes na interpretaziun particolara. Ala pert él ince »La Ciaccona« BWV 1002 por vidora sora tres dl medem autur y desco confrunt la ciacona te e-moll BUXWV 160 de D. Buxtehude scrita por orghe.
Implü ciafon ince la sonata te D-Dur op.1 de G.F. Händel y »La Follia« de A. Corelli, le toch che ti dá ince l’inom al cd.