Manifestazions atuales speziales

Data

27 de setember 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 27 de setember
1.st.friday.live.session@saj.un
The Blokes sará da aldí tl conezert dl vëndres ai 4 de otober
Le grup »The Blokes«, metü adöm da cinch jogn de Ulten, é nasciü tl ann 2006. Ti ultims agn ési stá da aldí sön de plü paladines tl Südtirol, danter l'ater ince en ocajiun dla copa dl monn de biatlon ite en Antholz.
La band ti dá gran importanza al se presenté tla iesta y cun le ciapel a zilinder. I musizisć porta dant cun anima y cör cianties de Guns'n Roses, AC/DC, Green Day, Die Toten Hosen, y i. i.. Tolesse le tëmp y gnide ai 4 de otober dales 21:00 inant tl Zënter Cultural SaJ.un a La Ila a d'ascuté sö n conzert dediché al rock and roll! L'entrada é debann.

Fotoworkshop cun Theo Bosboom

Ai 5 d'otober án la poscibilité da tó pert a San Martin a n workshop cun n fotograf de pëis internazional
I sëis dër bel inviá al fotoworkshop cun Theo Bosboom, ai 5. d'otober dales 9:00 ales 12:00, tl Istitut Ladin »Micurá de Rü« a San Martin de Tor. La manifestaziun vëgn organisada dal Fotoclub Val Badia adöm cun le fotoclub »Strix«. Por düc i interessá al monn dla fotografia él na bela ocajiun da odëi tla Val Badia n fotograf che á davagné concursc a livel internazional. Pro le workshop gnarál dé consëis por mioré la composiziun tla fotografia.
Bele ai 4 d'otober dales 20:30 sarál Theo Bosboom che tignará n referat tl Auditorium Erika Volgger (Schwesternau 1) a Porsenú.
Düc chi che é interessá, pó ciafé informaziuns y se lascé scrí ite al workshop sot al numer 0474 565177, info@strixnaturfoto.org

»P... sciöche Patrimone«

Simon Kostner y la belijia de familia cun creaziuns culinares dl cogo Simon Tirel
Les Dolomites, patrimone de düc. L'apuntamënt é por en jöbia, ai 10 d'otober 2019, dales 20:00, te Ciasa de cultura a La Ila
Tl 2009 é les Dolomites gnüdes reco­nesciüdes sciöche Patrimone mondial dl'umanité UNESCO, por süa belëza y dantadöt por la geologia particolara y unica. Sëgn ch'al é passé 10 agn: savunse pordërt ci ch'al ó dí che les Dolomites fej pert dl Patrimone UNESCO? Ci comportel pa? Ci vantaji unse pa? Ci conseguënzes él pa? Ciüna é pa la pert rodosa dla medaia? Tan inant orunse pa fá conësce ciamó deplü nosc raiun che é bele tan conesciü?
Te so monologh porvará Simon Kostner da respogne a chëstes domandes y da nes motivé da ponsé do sön n valgönes chestiuns dër atuales. Ala fin podará düc ciamó ciarcé »les saus dles Dolomites«, n taí cherié dal cogo Simon Tirel, y na boanda de »Dolomieu«, döt arjigné ca cun produc che an ciafa te nosc raiun.
La sëra dess ester na bona ocajiun por s'incunté, sté adöm y baié dl dagní de nostes valades, ponsan dantadöt co fá da respeté la natöra ch'i ún incër nos ia.
Por tó pert a chësta serada organisada dal Consëi de Formaziun de Badia ves periunse bel da ves prenoté pro Andrea Pizzinini, cherdan sö le numer de telefon 333 2525740 cina ai 5 d'otober. L'entrada é debann.

Edemes dla sanité

Ti paisc d'Al Plan de Mareo, La Pli y Rina dai 30 de setëmber ai 11 d'otober 2019
»Zero Refodam«
Le cërtl de incuntades y referac söl tema dla sanité mët man en lönesc, ai 30 de setëmber 2019, dales 20:00, cun le referat tl Salf dla Cassa Raiffeisen a Al Plan da pert de Maria Lobis Zanotti söl titul »Zero Refodam«/«Zero Waste«, o »na ciasa d'abitaziun zënza refodam, é chësc poscibl?«
Mituns »borjá fora«
En mercui, ai 2 d'otober 2019, dales 20:00, gnarál a Rina tl Salf dles manifestaziuns la psicologa y psicoterapeuta Angelika Pezzi a baié dl tema »Burn-out Kids / Na sozieté menada dala mania da arjunje döt« (»Eine Gesellschaft im Optimierungswahn?«).
Le godimënt é lezit, mo tla dërta mosöra!
En vëndres, ai 4 d'otober 2019, dales 20:00, sarál a La Pli de Mareo tl Salf dles mani­festaziuns, l'incuntada cun la consulënta por na vita sana Ruth Niederkofler che baiará dl tema »Genießen erlaubt, aber richtig! Wissen, verstehen und umsetzen!«
Demanco pó ester deplü
Referat dl professur y poet Christian Ferdigg en lönesc, ai 7 d'otober 2019, dales 20:00, a La Pli de Mareo tl Salf dles manifestaziuns.
Caos tl ce
En mercui, ai 9 d'otober 2019, dales 20:00, gnarál metü da jí a Al Plan tl Salf dla Cassa Raiffeisen le referat cun le Dr. Ivano Simioni söl tema »Chaos im Kopf – Depressive Verstimmung, Burn-out oder Depression«.
Dejintossiada – Regeneraziun – Tó jö pëis
La referënta Christine Pföstl jará ite en vëndres, ai 11 d'otober 2019, dales 20:00, a Rina tl Salf dles maniferstaziuns söl tema dla re­generaziun y dl jiné »Entgiftung – Regeneration – Abnehmen / Ist lntervallfasten wirklich die Lösung?«

Cun l KVW a Montegrotto Terme

Dai 20 nchin ai 27 de utober 2019
Coche l ie usanza da ani, pieta l KVW de Sëlva inò n'ena per paussé y se curé te de bona eghes ciaudes a Montegrotto Terme tl hotel Augustus ****, da n dumënia ai 20 de utober nchin a n dumënia ai 27 de utober 2019.
N possa se lascé nuté su y giapé nfurmazions plu avisa pra Rudolf Mussner, cherdan su l numer de tel. 335 6380973.

Sparagné energia te ciasa y tla dita: consëis pratics y informaziuns

Referat cun Christine Romen en vëndres, ai 4 d'otober 2019, dales 20:00, te Ciasa de cultura a La Ila
Sparagné energia é la miú sconanza dl ambiënt. Te na ciasa y te na dita pón tó en conscidraziun tröpes cosses por sparagné energia y arbassé i cosć. Gonot n'án bria da investí gnanca n euro su.
Ciodí pa sparagné energia? Ci consüma pa deplü energia te na ciasa y tla dita? Co pón pa sparagné concretamënter energia y scioldi? Cun chësc referat porvarán da dé respostes a chëstes domandes y da dé informaziuns che á da nen fá cun chësc argomënt. L'organisaziun é dl Grup de laur Comun Tlima Badia, en colaboraziun cun le Consëi de Formaziun Badia.

Sonns y saus de Armentara

Chësta domënia, ai 29 de sëtember, vëgnel metü da jí dal'Assoziaziun Turistica la La Val la manifestaziun plajora
La manifestaziun mët man cun la Santa Mëssa dales 11:00 sön Col de Valacia, ciantada dal cor dles ëres Raiëta. La festa jará inant cun musiga dl grup »Sunnberg Musi­kanten« da Terenten y de vigni sort de spezialités gastronomiches tradizionales, che vëgn dades fora da pert di ustis, dales patrones, y dai Stödafüch da La Val. Al ne manciará nia jüc y animaziun por mituns sciöche ince jüc por families cun pesć. Les iscriziuns pó gní fates en chël de söl post. Ai partezipanc ti vëgnel ince dé la poscibilité da porvé fora rodes electriches. En cajo de burt tëmp vëgn la manifestaziun desdita.

Conzert söl orghe nü

Tla dlijia da La Ila en domënia, ai 6 d'otober 2019, dales 17:00
L'uniun culturala y musicala Badiamusica mët da jí en ocajiun dla benedisciun y in­auguraziun dl orghe de dlijia nü a La Ila n conzert cun le organist Franz Comploi.
Le conzert gnará tigní en Segra dal Rosare, domënia ai 6 de otober dales 17:00, te dlijia a La Ila. Al é na bona ocajiun por ascuté sö le stromënt nü y n bel conzert.