Manifestazions atuales speziales

Data

04 de otober 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 4 de otober
Pederü–storia, stories y svilup
Chësc le titul dl liber de Pablo Palfrader, che vëgn presenté en vëndres ai 11 d'otober dales 19:00, tla Ütia Pederü
Le liber cunta fostüs de storia sön le svilup dla Ücia da Pederü, sön i Pisching che l'á daorida y la manajëia ciamó incö, sön Pederü tl tëmp de vera, les manovres di soldas te munt y les discusciuns por rové al parch natural. Döt cant arichí cun coriosités y avenimënc sozedüs ite por la Val de Mareo, y abelí cun tröc retrac da zacan y d'alde-daincö. La presentaziun é en vëndres ai 11 d'otober ales 19:00 ta Pederü. Dedô pice renfrësch y musiga dal vi cun Alexander d'Al Plan y compagns.

»P... sciöche Patrimone«
Simon Kostner y la belijia de familia cun creaziuns culinares dl cogo Simon Tirel
Les Dolomites, patrimone de düc. L'apuntamënt é por en jöbia, ai 10 d'otober 2019, dales 20:00, te Ciasa dla Cultura a La Ila
Tl 2009 é les Dolomites gnüdes reconesciüdes sciöche Patrimone mondial dl'umanité UNESCO, por süa belëza y dantadöt por la geologia particolara y unica. Sëgn ch'al é passé 10 agn: savunse pordërt ci ch'al ó dí che les Dolomites fej pert dl Patrimone UNESCO? Ci comportel pa? Ci vantaji unse pa? Ci conseguënzes él pa? Ciüna é pa la pert rodosa dla medaia? Tan inant orunse pa fá conësce ciamó deplü nosc raiun che é bele tan conesciü?
Te so monologh porvará Simon Kostner da respogne a chëstes domandes y da nes motivé da ponsé do sön n valgönes chestiuns dër atuales. Ala fin podará düc ciamó ciarcé »les saus dles Dolomites«, n taí cherié dal cogo Simon Tirel, y na boanda de »Dolomieu«, döt arjigné ca cun produc che an ciafa te nosc raiun.
La sëra dess ester na bona ocajiun por s'incunté, sté adöm y baié dl dagní de nostes valades, ponsan dantadöt co fá da respeté la natöra ch'i un incër nos ia.
Por tó pert a chësta serada organisada dal Consëi de Formaziun de Badia ves periunse bel da ves prenoté pro Andrea Pizzinini, cherdan sö le numer de telefon 333 2525740 cina ai 5 d'otober. L'entrada é debann.

Proieziun söla storia dla fotografia
Cun Alfred Erardi, en jöbia ai 10 d'otober 2019, dales 20:30, tl Istitut Ladin Micurá de Rü a San Martin de Tor
Le Fotoclub Val Badia á le plajëi da invié en jöbia ai 10 d'otober, dales 20:30, tl Salf dl Istitut Ladin Micurá de Rü a San Martin de Tor, a na proieziun de fotografies dl fotograf Alfred Erardi. Por la festa di 20 agn dl Fotoclub Val Badia sarál Alfred Erardi che jará zoruch tla storia dla fotografia y se mostrará na proieziun dla titul »N vare zoruch tl analogh 6x7«. An podará odëi sciöche le monn dla fotografia s'á mudé y sciöche i fotografs se adatëia ala tecnica. Dan la proieziun sarál la lita dl consëi nü, düc é dër bel inviá! I presënc ciafará na scincunda dal Fotoclub Val Badia.

Oberlinger, Ghielmi & Ensemble
Cun chësc cunzert vëniel giaurì n vënderdi ai 11 de utober la 53ejima sajon di cunzerc di Jëuni de Mujiga de Gherdëina
L cunzert de chësc ensemble ie tla dlieja de S. Cristina y scumëncia dala 20:30.
Pra l cunzert de n vënderdi iel da audì chësc ensemble de musizisć, che se à metù adum per suné mujiga »antiqua«, ma uniun à nce na si atività ti ciamps plu desferënc dla mujiga.
Dorothee Oberlinger (flaut) ie una dla sunadëures plu cunesciudes de chësc strumënt, fej pert de Barockensembles ma nce de urchestres renumedes y se dà ju cun de plu proiec de mujiga antica. La pascion de Johanna Seitz ie l'erpa te duc si aspec, de chëi storics y per ucajions d'uni sort, nce de bal. Fabio Rinaudo (baga/Dudelsack) vel sciche un di virtuëusc de chësc strumënt y Fabio Biale sona l bodhràn, n strumënt a percuscion, ma oradechël nce truep d'autri strumënc y se dà nce ju cun stii de mujiga che va dal jazz, al rock y l pop. Ala fin iel mo Vittorio Ghielmi che sona la viola da gamba. Ël ie nce dirighënt y cumponist. Pra l cunzert saràl defati da audì daujin a cumposizions de mujiga antica de cumponisć dl 16ejim secul nce de teles de Vittorio Ghielmi o lauredes ora da d'ël.

Prejentazion dl romann de Roland Verra
N juebia ai 10 de utober dala 20:30 tla Cësa di Ladins a Urtijëi
»Jan sun l troi dla desmincënza«, »Jan sul sentiero dell'oblio«, chësc ie l titul dl romann scrit tla doi rujenedes, gherdëina y talian, dal autor Roland Verra y dat ora dal Istitut Ladin Micurà de Rü. La storia de Jan se dejëuj te n mond de sutroc y fauziteies, ulache l uel se ndesdì de fé pea la matiteies dla sozietà y mpo fé pert dl juech, ma Jan muessa udëi ite che si sëmies va ala nia, tla desmincënza.
L liber ie ilustrà cun pitures dl autor y unirà prejentà da Rut Bernardi.
L Istitut Culturel Ladin Micurà de Rü y la Union di Ladins de Gherdëina nvieia ala prejentazion n juebia ai 10 de utober da mesa la nuef da sëira tla bibliotech dla Cësa di Ladins a Urtijëi, ulache l cianterà danterite la grupa »Tel Tipes«.

Sanité y bëgnsté cun yoga
I cursc é gnüs sburlá de chinescdé! A San Martin de Tor: deplü cursc de yoga. Al é n tru por la sanité plëna, n tru por la belëza daite, relassamënt y armonia
Curs de yoga por prinzipianc
Cun Rakesh Nanda, 6 sëres indöt, n iade al'edema, 19:45 – 21:15, pröms apuntamënc:
vëndres ai 11.10. a San Martin
Yoga por ëres che aspeta
Cun Karin Nanda, 5 sëres indöt, n iade al'edema, 20:00 – 21:00, pröms apuntamënc:
vëndres ai 11.10. a San Martin
Por informaziuns y prenotaziuns
Tel. 0474 530547, e-mail: nandayoga@yahoo.de www.nandayoga.de facebook.com/RakeshNanda

1.st.friday.live.session@saj.un
The Blokes sará da aldí tl conzert da incö vëndres ai 4 de otober
Le grup »The Blokes«, metü adöm da cinch jogn de Ulten, é nasciü tl ann 2006. Ti ultims agn ési stá da aldí sön de plü paladines tl Südtirol, danter l'ater ince en ocajiun dla copa dl monn de biatlon ite en Antholz.
La band ti dá gran importanza al se presenté tla iesta y cun le ciapel a zilinder. I musizisć porta dant cun anima y cör cianties de Guns'n Roses, AC/DC, Green Day, Die Toten Hosen, y i. i.. Tolesse le tëmp y gnide incö ai 4 de otober dales 21:00 inant tl Zënter Cultural SaJ.un a La Ila a d'ascuté sö n conzert dediché al rock and roll! L'entrada é debann.

Festa y mostra te Ciasa de Palsa
Incö ai 4 d'otober dales 15:00 vëgnel festejé le De di seniors y dales 16:30 daurí na mostra che se dá jö cun le guern, la cura y la palsa
Incö vëndres ai 4 d'otober él festa te Ciasa de Palsa a San Martin. Dales 15:00 vëgnel festejé le De di seniors a chël che düc canc é bel inviá. Al sará aorela cörta, café y val' da mangé. Dales 16:30 gnarál spo daurí la mostra »Cun cura – stories de guern, cura y palsa«.
Le guern y la cura reverda vigni eté y vigni classa soziala. I vedli y i püri incunta guern y cura personalmënter, i jogn vigni iade che zacai dla parentela á debojëgn. La mostra é dedicada ales esperiënzes personales y ala memoria dla coletivité. Al é gnü realisé cotan de intervistes cun testemoni contemporans. Da chëstes intervistes él gnü trat fora les perts fondamentales dla mostra. La mostra originala é gnüda realisada dal Frauenmuseum Hittisau tl'Austria. Na pert é gnüda adatada por la Ciasa de Palsa da San Martin. La mostra vëgn fata en gaujiun di 120 agn dal at de fondaziun dla Ciasa. Ara sará da odëi cina ai 12 de jená 2020.

Les »Edemes dla sanité« vá inant
Ti paisc d'Al Plan de Mareo, La Pli y Rina cina ai 11 d'otober 2019
Le godimënt é lezit, mo tla dërta mosöra!
Incö vëndres, ai 4 d'otober 2019, dales 20:00, sarál a La Pli de Mareo tl Salf dles manifestaziuns, l'incuntada cun la consulënta por na vita sana Ruth Niederkofler che baiará dl tema »Genießen erlaubt, aber richtig! Wissen, verstehen und umsetzen!«
Demanco pó ester deplü
Referat dl professur y poet Christian Ferdigg en lönesc, ai 7 d'otober 2019, dales 20:00, a La Pli de Mareo tl Salf dles manifestaziuns.
Caos tl ce
En mercui, ai 9 d'otober 2019, dales 20:00, gnarál metü da jí a Al Plan tl Salf dla Cassa Raiffeisen le referat cun le Dr. Ivano Simioni söl tema »Chaos im Kopf – Depressive Verstimmung, Burn-out oder Depression«.
Dejintossiada – Regeneraziun – Tó jö pëis
La referënta Christine Pföstl jará ite en vëndres, ai 11 d'otober 2019, dales 20:00, a Rina tl Salf dles maniferstaziuns söl tema dla regeneraziun y dl jiné »Entgiftung – Regeneration – Abnehmen / Ist lntervallfasten wirklich die Lösung?«

N capitul de storia dl turism tl'alta Val Badia
Recorc, soms y pinsiers de Renate Kostner Pizzinini
Le liber, publiché tles verjiuns taliana y todëscia, gnará presenté en vëndres, ai 11 d'otober dl 2019 dales 18:00, tl gran salf dla Ciasa dla Cultura a La Ila.
Le liber che Renate Kostner Pizzinini, ostira conesciüda da Calfosch, á scrit deboriada cun Werner Pescosta, cunta na storia de passa cënt agn de svilup dl turism dl'alta Val Badia, de chëra che ëra instëssa fej pert, adöm cun tröc d'atri protagonisć, da mëte man dal pionier Tita Alton y dai dui fredesc Franz y Sepl Kostner. I libri vëgn dá fora dal'Uniun di Ladins Val Badia.