Manifestazions atuales speziales

Data

18 de otober 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 18 de otober
Nvit ala ancunteda publica
Artejanat artistich de Gherdëina – vijions per l daunì.
Duman sada danmesdì ai 19 de utober a Urtijëi
Duman sada danmesdi, ai 19 de utober 2019, dala 8:30 nchin la 12:00 tla gran sala dla cësa de cultura Luis Trenker a Urtijëi.
1. pert: tanc y chi ie pa nosc artejans? Analisa dl mumënt... l lëur, i jëuni...
2. pert: ideies, dialogh, descuscion te de mëndra grupes. Prupostes per l daunì.
La doi lies La Vëta y Lia Artejanat Artistich Ve nvieia a chësc danmesdì.

Batadù di maestri de schi
N dumënia ai 20 de utober tla ustaria Mont de Sëuc
L ie na bona ucajion per se urté n iede danter maestri de schi de duta la valeda, jëuni y manco jëuni, atives y che à bele lascià, ëi y ëiles sambën, per s'la ciaculé, s'la carté y passé n blòt di deberieda.
L batadù scumëncia dala 10:00 tla ustaria da Ali sun Mont de Sëuc. Cialon de ruvé su per tëmp y ëura y a uni moda dan la 9:45.
Per mëter a jì dut sciche l toca prions bel de se scrì ite danora, tla Scola de Schi de Urtijëi (0471 796153) o tla Scola de Schi de Sëlva (0471 795156), nchin n vënderdi ai 18.10. dala 18.00. Da paië ite iel 17,00 € + 7,80 € per la furnadoia. Tl priesc iel laite la marënda, ma nia la buandes.
L sarà de biei pesć da vëncer y fajeron nce na lotaria. Ulon finé via dala 17:00.
Per nfurmazions pudëis cherdé su Flavio 335 204278 o Georg 335 8410160.
Unide duc a fé pea!

Steinegg Live a Stanecia
Nchin ai 26 de utober saràl manifestazions desferëntes a Stanecia/Steinegg
Danter mujiga d'uni sort, cabaret y teater saràl per uniun y uniuna zeche de blòt leprò. Da maië y da bever ne manceràl nia. Duc ie nviei de cuer!
Granda ie la tradizion dl Festival Steinegg Live, bele dai ani. La formula ie tucheda, chëla dl cumité de urganisazion cun a cë Konrad "Conny" Mahlknecht, cun mujiga rock y pop, blues, jazz, mujiga da paur, mujiga tradiziunela, cabaret, teater, ntratenimënt per mutons.
Dl maië se cruzia coche uni ann la umans de Stanecia, che cujina sambën bon, coche a cësa. Nce pra la buandes iel da giapé cualità, sambën pra la mujiga y la reprejentazions d'uni sort. Trëi manifestazion iel bele stat l ultim fin dl'ena. La va pona inant cun la majera pert dla manifestazions da ncuei vënderdi ai 18 de utober nchin n sada ai 26 de utober.
L program dai 18 nchin ai 26 de utober
Ncuei vënderdi sona i Rising Stars & Local Heroes, praticamënter talënc jëuni de uni sort de mujiga, che vën da Stanecia y ntëurvia.
N dumënia ai 20 de utober, festa Steinegg Live cun i »South Brass«, i »Alpenoberkrainer« y per i pitli saràl Bobby l'afa. »Frühschoppen« tradiziunel cun bal domesdì via.
N merdi ai 22 de utober sëira de cabaret cun l cabaretist cunesciù dl Bayern Martin Frank.
N mierculdi ai 23 de utober »Ina Regen & Band«, la ciantarina che à abù n gran suzes ultimamënter y ie l prim iede da audì te Südtirol. Program danora de Michael Aster.
N juebia ai 24 de utober sona »The Yellowjackets« cun la lijënda jazz-fusion Bob Mintzer.
N vënderdi ai 25 de utober Blues Night cun: Marcus Bonfanti y Band (UK), Raphael Wressnig & The Soul Gift Band feat. Giselle Jackson (A/I/USA), Strutzer Combo, Blues Jam Session.
N sada ai 26 de utober: party Steinegg Live cun VinoRosso, Rocket Monkeys, Oldie-DJ y d'autri.
Chertes giàpen tla sëntes dla Casses Raiffeisen de Südtirol, pra l Athesia-Ticket y pra cassa da sëira.
Plu nfurmazions sot a www.steinegglive.com

»Pultredes dl dejenuefcënt«
L dejenuefcënt te Sëlva y a S. Cristina
Tl »Tublà da Nives« vëniel giaurì n sada ai 26 de utober 2019 na mostra drët nteressanta de fotografies bonamënter mo mei ududes. L se trata de na culezion de pultredes fates tl scumenciamënt dl 1900 tl raion de Ruacia y Plan da Tieja. L fotograf y i persunajes sun la fotografies ne n'ie nia cunesciui. Chësta abineda ie unida sëurandata dal Museum Palais Mamming de Maran al Museum Ladin »Ciastel de Tor«.
Pra la giaurida, che sarà ai 26 de utober dala 5 domesdì, rujeneràl l diretëur dl Museum Ladin, dr. Stefan Planker y Elmar Gobbi dl Palais Mamming.
La mostra resterà davierta nchin ai prim de dezëmber 2019, uni di (ora che de lunesc) dala 15:00 nchin la 18:00; de dumënia sarà la mostra davierta nce danmesdì dala 10:00 nchin la 12:00.

L material naturel lën y si nuzeda ti seculi
Referat tl cuntest dla mostra »Mejes de Gherdëina – La memoria de na cuntreda«, n juebia ai 24.10.
»Rohstoff Holz und seine Nutzung durch die Jahrtausende«, referat cun dr. Hans Reschreiter n juebia ai 24 de utober 2019, dala 20:00, tla cësa de cultura a Urtijëi, tla sala dla mostra di mejes.
L referat prova a tlarì la gran pusciblteies de nuzamënt che l lën à abù ti seculi/mileneies. L lën ie nchinamò l material plu mpurtant tla storia dla umanità y nes à cumpanià nchin a iló ulache son śën. Y tl lën iel mo n gran potenzial per l daunì.
L referënt lëura tla sezion preistorica dl »Naturhistorisches Museum« de Viena, ie spezialisà tla archeologia dla montes y tecniches artejaneles storiches.
Referat tla rujeneda tudëiscia. La ntreda ie debant.
Mostra »Mejes« davierta de utober y nuvëmber: juebia 15:00-18:00, vënderdi y sada 10:00-12:30.

Daurí edli y cör ala Fede
La Unité Pastorala Val Badia inviëia ala Edema dla Fede, dai 19 ai 26 d'otober
L'edema mët man la sabeda ai 19.10. dales 20:00 tl salf dles manifestaziuns da San Ciascian, cun na Festa de adoraziun cun n grup de jogn da Verona. Ara é ponsada suradöt por jonëza, adöm cun düc chi che á interes. La domënia vëgnel festejé le »De de fede« te vigni ploania. Le lönesc ai 21.10 dales 20:00 s'abinon te salf dles manifestaziuns d'Al Plan por na sëra cun dias sön la natöra y pinsiers fora di salms. Le mertesc ai 22.10. él dales 20:00 tla Ciasa Runcher a Badia n referat cun Johanna Brunner – direturia dl ofize diozejan familia y matrimone. Ara baiará dl tema: »La familia aldedaincö – na odlada ala realté cun speranza por le dagní. Le mercui ai 23.10. dales 20:00 él te salf dl Istitut Ladin a San Martin na sëra cun siur Ulrich Fistill dal tema: »Le wellness dla Fede, che dá spirit y vita«. Le vëndres ai 25.10. sarál te vigni ploania na ora de adoraziun (cun sü orars), por stlü jö spo la sabeda ai 26.10 cun le »De dles misciuns – Festa dla fede« a Oies. En chël de röiel alerch ince n pelegrinaje diozejan. An s'incunta dales 14:30 a San Linert por la prozesciun cun Staziuns cina sö Oies. Lassö él dales 16:00 la mëssa cun le Vësco Ivo Muser y düc i pelegrins.

Sëra ladina a Schabs
Ai 26 d'otober dales 18:30, tla cornisc dla iniziativa »Kultur in der Fabrik«
Le Cor de Dlijia da San Martin de Tor y le jonn Armin Dasser cun sü orghi da man é i protagonisć dla »Sëra Ladina«, che vëgn metüda a jí en sabeda ai 26 d'otober dales 18:30 tla hala de produziun dla firma Zingerle AG a Schabs, str. Förche 7. Le conzert vëgn a s'l dé tla cornisc dla iniziativa »Kultur in der Fabrik«, y dedô sarál n renfrësch cun spezialités ladines, pité dales Patrones de Badia y da La Val. L'entrada é por na spënora de buna man y ci che vëgn ite jará a fin de bëgn.