Manifestazions atuales speziales

Data

08 de november 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 8 de november
Rina: »Usc y sonns s'incunta«
Conzert particolar a Rina. Musiga y cors cun gragn y pici sön paladina, te n conzert che sará ai 9 de novëmber dales 20:00 te dlijia
En sabeda ai 9 de novëm­ber dales 20:00 él te dlijia da Rina n conzert dal titul »Usc y sonns s'incunta«, cun n grup dla Musiga, le Cor de Dlijia cun mëmbri dl Cor di Ëi, ciantarines da Rina y foradecá y le Cor di Mituns. Danter i toc él »Introitus Brevis« de Klaus Strobl, »Gott segne Dich« de Kathi Stimmer, »Iö sun pro os« de U. Willeit, »Gabriellas Sang« de Stefan Nilsson, »Pie Jesu« de A. L. Webber y la »Ode an die Freude« de Beethoven. Düc é dër bel inviá da gní a d'ascuté sö.

I »Bad Jokers« te Saj.un
Le grup da Türesc é da aldí tl zënter cultural Saj.un a La Ila, incö ai 8 de novëmber
Incö vëndres ai 8 de novëmber dales 21:00 sonará te Saj.un a La Ila le grup »Bad Jokers«. Le grup é nasciü tl ann 1992 y é formé da cater sonadus che vëgn da Türesc. Les cianties rock cun tesć todësc tira le publich bele da n gröm de agn. Adöm cun la band Frei.Wild, ési ti ultims agn stá da aldí sön de plü paladines europeiches y á de fora n valgügn CDs, danter l'ater »Alte Rituale« y »Da kommen wir her«. L'entrada é sura i 16 agn y debann.

Marcé dl cufer a Corvara
En domënia ai 17 de novëmber dales 10:00 ales 17:00
La Uniun dles Ëles da Corvara organisëia indô le marcé dl cufer, cun mostra y poscibilité da cumpré patüc fat a man. Le marcé vëgn tigní en domënia ai 17 de novëmber dales 10:00 ales 17:00, tl salf dles manifestaziuns da Corvara. Al sará ince n pice renfrësch, cun spënora lëdia che jará a bëgn dl'assoziaziun Peter Pan.

Iconografia di angeli
Le Consëi de Formaziun Badia inviëia a n referat interessant cun Danila Serafini, en vëndres ai 15 de novëmber dales 20:00 tla Ciasa J. B. Runcher a Badia
Le tema di Angeli se tira fora por döta la storia dla porsona y tol ite n pinsier sot sön le raport danter l'umanité y ci che vá sura sües conescënzes fora, o coche Talmud dij, danter »chi jö dessot« y »chi sö dessura«. Tl referat dal titul »Iconografia di angeli« vëgnel splighé coche i angeli é gnüs rafigurá ti secui desvalis, coche chësta sort de rafiguraziun é gnüda condizionada dala storia y dala religiun.

»Calënder Ladin 2020«
Presentaziun en jöbia, ai 14 de novëmber 2019, dales 18:00, al Ostí Nicl a San Martin de Tor
Le Calënder Ladin vëgn fora chisc dis, al gnará indó venü da ciasa a ciasa y tles botëghes Market a Longega y Mascotte a Al Plan – dagnora al prisc de 13,00 €. Al é le numer 59 tla storia di »calëndri ladins« dla Val Badia.
En chësc ann ti ára toché al artist Simon Rubatscher da realisé le cuertl y abelí i dodesc mëisc che contëgn – sciöche al é tradiziun – i dis fora por l'ann cun les festes, les lönes y i planëc. L'ann 2020 sará indó n ann barest da 366 dis (forá ará 29 dis).
Deplü sará indó les cunties y stories, les biografies, les poesies, y i retrac vedli che an ciafará tl calënder. Düc i colaboradus y interessá é de cör inviá ala picera festa de presentaziun a San Martin de Tor!

»Rais de nüsc tëmps«
Presentaziun a Al Plan chësta domënia ai 10 de novëmber 2019
dales 16:00 tl Salf dles manifestaziuns dla CD di grups jogn Gasubi (Gabi Mutschlechner & co.), Music Ways (Bruno Irsara & co.) y Daniel Willeit
L'UCL-Uniun Ciantuaurs Ladins inviëia ala presentaziun dla CD nöia dal titul »Rais de nüsc tëmps«, tuta sö tl Stüde de registraziun de Beni Valentin a Badia. La CD ti é gnüda dedicada ai trëi grups/ciantauturs ladins jogn chiris fora en gaujiun dl concurs metü da jí dan dui agn a La Pli de Mareo. La CD tol ite 10 cianties originales ladines, scrites dai comonënc instësc di grups.
Le domisdé a Al Plan é ince l'ocajiun por aldí val' deplü söi artisć jogn y le contignü y significat de sües cianties, y al sará ince l'ocajiun por cumpré la CD nöia y sté adöm a fá aurela cörta y se bëre y mangé val'.

»De surices y persones«
Teater do n romann de John Steinbeck cun »Premiere« ncuei vënderdi ai 8 de nuvëmber dala 20:00
La grupa dl Teater de Urtijëi se à resià permez a una dla cunties plu cunesciudes de John Steinbeck (pest Nobel per la leteratura) dal titul »Von Mäusen und Menschen«. N pez grandiëus da sensibltà, tristëza, nchersciadum y che te pëia ite.
Te chësc pez de teater se tràtela dla gran amezizia danter i doi cumpanies Lennie, n jëunn drët ghert ma mentalmënter mpue desturbà, y George che sà da se deriejer drët bën tla vita. I doi lëura tla campanies per se davanië n trëi dassec. Si gran sëmi ie de avëi n di o l auter na si farm, ulache i possa se zidlé si cunici cun gheneda. Ma a Lennie ti sàl tan bel a »smilé« cians, surices y pitli tieres y nsci ruva tramedoi tla stauscia. I muessa for inò se crì danuef da lëur y George se dessëna cun Lennie, ma ne n'ie mpo no bon de l lascé. Canche Lennie scumëncia pona a »smilé« la patrona dl luech da paur, vëniela zariëusa. La storia fej referimënt ai ani '30 tla California.
L pez tla rujeneda tudëscia ie unì mparà ite sot ala regia de Luis Mahlknecht y
i atëures che sarà da udëi chëst iede sun palch ie Samuel Kasslatter, Martin »Buldy« Moroder, Mario Falchi, Albert Kasslatter, Moritz Ploner, Martina Holzknecht, Pauli Rabanser, Karl Gustav Mahlknecht, Patrick Perathoner y Raoul Moroder.
L teater unirà purtà dant tl Typak Center a Runcadic for dala 8:00 da sëira:
n vënderdi ai 8.11.
n sada ai 9.11.
n merdi ai 12.11.
n vënderdi ai 15.11.
n sada ai 16.11.
Chertes danora iel da giapé tla butëiga »Scudela« a Urtijëi, tel. 0471 797298.

La cuntreda culturela dla Elpes
Si svilup, mantenimënt y valor storich culturel. Referat cun l antropologh Annibale Salsa n lunesc ai 11.11. dala 20:00 tla cësa de cultura de Urtijëi, tl cuntest dl proiet »Mejes« dl Museum Gherdëina
Coche la cuntreda culturela alpina ie unida crieda, coche la possa unì mantenida y tan de mpurtanza che la ie per l'arpejon dl patrimone Dolomites UNESCO, tlarësc l antropologh Annibale Salsa te na cunferënza tl cheder dl proiet »Mejes de Gherdëina – la memoria de na cuntreda«, n lunesc sëira ti salamënc dla mostra.
Referat tla rujeneda taliana. La ntreda ie debant.

Turnoi de ping pong de Gherdëina
N dumënia ai 10.11. dala 13.30 inant tl tennis curì te Sëlva
L Tennis Club Gherdëina mët a jì l turnoi de ping pong per duc, tl tennis curì te Sëlva, n dumënia ai 10 de nuvëmber da mesa la doi domesdì inant.
Peles y codles vëniel metù a despusizion.
Per nfurmazions y per se scrì ite pòssen cuntaté Stefano Bassetto, tel. 340 9269085.
L unirà nce trat ora de biei pesć danter duc chëi che fej pea y fé pea possa sambën duc! Oradechël vëniel nce fat al savëi che la pizzeria tennis de Sëlva ie davierta uni di dala 4 domesdì nchin la 11 da sëira.

Raisc y ares, por ciafé nosc tru deboriada – geniturs y mituns
Mësa torona cun esperc sön le lian emozional danter geniturs y mituns, ai 14 de novëmber a San Martin de Tor
Le lian emozional danter geniturs y mituns é dal scomenciamënt insö dër sterch. Te so svilup emozional é i mituns fina a na certa eté daldöt dependënc da nos geniturs. Por impó mëssi ëi se destaché por ester bogn da arjunje süa independënza y autonomia. Chësc prozes plü o manco lunch rapresentëia na fasa dër zitia, olache i prighi sciöche dependënza, valurs falc, ries compagnies y i.i. é presënc y mëss gní tuc en conscidraziun.
Ci podunse pa nos sciöche geniturs fá por acompagné nüsc mituns, renforzan les raisc y ti don tl medemo tëmp les ares por che ai ciafes so tru? Co podunse pa i daidé por che ai röies a avëi na dërta autostima, na sozialisaziun sana, le dër respet por se instësc y i atri?
Respostes o almanco reflesciuns sön chësta tematica dess gní fora en chësta sëra, ai 14 de novëmber dales 19:30 te Istitut Ladin a San Martin de Tor adöm cun Sara Tauber – psicologa dl Forum Prevenziun, Veronica Clara – assistënta soziala tl Raiun Sozial Val Badia, Edmund Senoner – psicologh a Bad Bachgart, Walter Frontull – pedagogh sozial, y la moderaziun de Diego Clara. L'organisaziun é dl Grup Ecuiliber, le lingaz dla serada é todësch y ai insegnanc ti vëgnel reconesciü sciöche formaziun. Düc é dër bel inviá da tó pert.

Teater da rí a La Ila
L'Uniun Teater La Ila é tl laur da arjigné ca la comedia »Belëza, soius y bëgnsté« (titul original »Spa, Beauty & Dosenwurst«) de Pirmin Stern, la rejia é de Erika Castlunger
Sön paladina él da odëi: Ellen Alfreider, Manuel Crazzolara, Roland Flöss, Marco Moscon, Daniele Pescollderung, Andy Pizzinini, Daniele Pizzinini, Roland Pizzinini, Sabine Rudiferia, Susann Tavella y Cindi Vittur.
Les rapresentaziuns é indoman sabeda 9, domënia 10, mercui 13, vëndres 15 dales 20:30 y domënia 17 de novëmber dales 15:00, tla Ciasa de Cultura a La Ila. Prenotaziuns al 333 2525740.

La Ila: les Scores Altes deura les portes
De dla porta daverta tles Scores Altes da La Ila, ai 13 de novëmber
I Ves lasciun alsavëi che en mercui, ai 13 de novëmber, él dales 8:00 inant le De dla porta daverta dles Scores Altes da La Ila: Istitut Tecnich Economich, Lizeum Linguistich y Lizeum Sciënzes Umanes.
La direturia, i inse­gnanc y les insegnantes, les scolares y i scolars inviëia düc y dötes da gní a imparé da conësce damí nostes scores cun sües strotöres y a odëi sciöche al vëgn lauré.

Sëira de nfurmazion per i zitadins
N merdi ai 19.11. dala 20.30 tla cësa de cultura de Urtijëi
Coche uni ann d'autonn nvieia l Chemun de Urtijëi nce chëst ann duta la zitadines y duc i zitadins a na sëira de nfurmazion n con' dla atività dl Chemun.
L unirà prejentà da pert dl ambolt y di assessëures i majeri lëures stluc ju y chëi udui dant ti proscimi mënsc. L unirà nce dat lerch a ntervënc y a duman­des da pert dl publich.

Scincundes da Nadel, percie pa nia de segonda man
Marcià n dumënia ai 17.11. dala 14:00 ala 16:00 tla sala Raiffeisen a S. Cristina
L vën metù a jì n marcià ulache n possa danmesdì, dala 9:00-12:00, purté (chël che porta mët l priesc) y domesdì cumpré d'uni sort de bela roba che n à a cësa y che pudëssa deventé scincundes da Nadel! Roba da fé damat, roba da guant, per la cësa y cësadafuech, libri y DVDs, giuei y cosmetica. Smendron l cunsum mat che ie da Nadel scincan cosses de segonda man che ie mo beles y bones assé!
Sëuraprò uniràl mo dat cunsëies per n calënder d'Avënt al cuntrer, per lëns da Nadel auternatives y bonns per servijes y plajëies da dé coche scincunda da Nadel. Danterite y danterora cianterà »Tel Tipes«.
Per nfurmazions cherdé su l 338 5269906.
Metù a jì dala grupa de lëur sun ZeroWaste che se à ancuntà ntan la sëires daviertes #generazionTlima cun l sustëni dla Lia per Natura y Usanzes..