Manifestazions atuales speziales

Data

15 de november 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 15 de november
»Sön porta de dlijia«
Serada cun presentaziun dl liber »Sulla soglia della Chiesa« de Christian Ferdigg y mësa torona cun plü ghesć: ai 22 de novëmber a Al Plan
La Unité Pastorala Val Badia mët da jí na serada de reflesciun dal titul »Sön porta de dlijia«, en vëndres ai 22 de novëmber ales 20:00, te salf de calonia d'Al Plan.
Impröma él Carlo Suani che presentëia le liber »Sulla soglia della Chiesa« de Christian Ferdigg. Dedô mësa torona cun i ghesć siur Klaus Sottsas – ploan, Annamaria Fiung – ëra laica y presidënta dla Unité, Fabian Fistill – professur de filosofia y Christian Ferdigg – autur dl liber y poét. Al moderëia Pablo Palfrader.

Marcé dl cufer a Corvara
En domënia ai 17 de novëmber dales 10:00 ales 17:00
La Uniun dles Ëles da Corvara organisëia indô le marcé dl cufer, cun mostra y poscibilité da cumpré patüc fat a man. Le marcé vëgn tigní en domënia ai 17 de novëmber dales 10:00 ales 17:00, tl salf dles manifestaziuns da Corvara. Al sará ince n pice renfrësch, cun spënora lëdia che jará a bëgn dl'assoziaziun Peter Pan.

»Chill down« y »Bad Jokers« a La Ila
I dui grups da Türesc sona le vëndres ai 22 de novëmber da sëra tl Saj.un
Le conzert cun i »Bad Jokers« tl SaJ.un a La Ila é gnü sposté dai 8 ai 22 de novëmber por gauja dl burt tëmp. Porchël sonará en vëndres ai 22 de novëmber dales 21:00 le grup »Chill down«, na band rock metüda adöm da n valgügn jogn da Türesc. Ai scialdará ite le palch por ti lascé spo lerch al grup di »Bad Jokers«. Les cianties rock cun tesć todësc, tira le publich bele da n gröm d'agn incá. Adöm cun le grup Frei.Wild ési ti ultims agn stá da aldí sön de plü palcs europeics y á de fora n valgügn CDs, danter l'ater »Da kommen wir her«. L'entrada é debann!

Baiun de dislessia
»Boom delle diagnosi di dislessia: perché e cosa fare?« é le titul de n referat che vëgn tigní en vëndres ai 22 de novëmber dales 20:00, te scora mesana da La Ila
La dislessia n'é nia na maratia y gnanca »na moda«. Ara se trata de n desturb tl svilup neurologich di mituns, che reverda l'ester bogn da lí, da scrí y da fá cunc, snel y tla dërta manira. Gonot ne vëgn chisc mituns nia capis, mo ëi pó gní daidá cun de piceres cosses (na scritöra plü grana, adoré dessëgns impede parores por se recordé plü saurí les cosses, scritöres cun deplü corusc y d'ater). La neuropsichiatra por mituns, Susanna Negrin, gran esperta te chësc ciamp, spligará chësc fenomen y dará consëis por daidé chisc mituns che se stënta a scora.
Le referat é por talian y vëgn tigní en vëndres ai 22 de novëmber dales 20:00, te scora mesana da La Ila. Organisaziun: Consëi de Formaziun Badia.

Cianta cun nëus!
L Cor de Runcadic nvieia a cianté pea l cunzert d'Avënt ai 8.12.
Nvion de cuer duc i nteressei a cianté pea l cunzert d'Avënt n dumënia ai 8 de dezëmber 2019 dala 17:00 tla dlieja de Runcadic.
La prima proa sarà n merdi ai 26.11. y i dis do ai 27. y 29.11. pona inò ai 3. y 6.12. for dala 8 da sëira tl self dla Scola Elementera de Runcadic. L unirà mparà ite de blòta cianties saurides per duc, nce per chëi che ne à mo mei ciantà pra n cor.
Per plu nfurmazions pudëis cherdé su l 380 3782188 o unì diretamënter ai 26.11. ala prima pro.
L Cor de Runcadic se ncunforta sun vosc unì!
N ucajion de S. Zezilia cianta l Cor de Runcadic, acumpanià dal'urchestra, la »Dukatenmesse« de Mozart n dumënia ai 24.11. dala 10:00 tla dlieja de Runcadic.

Prejentazion dl romann de Roland Verra
N juebia ai 21 de nuvëmber dala 18:00 a Bulsan tl Vedl Chemun
»Jan sun l troi dla desmincënza«, »Jan sul sentiero dell'oblio«, chësc ie l titul dl romann scrit tla doi rujenedes, gherdëina y talian, dal autor Roland Verra y dat ora dal Istitut Ladin Micurà de Rü. La storia de Jan se dejëuj te n mond de sutroc y fauziteies, ulache l uel se ndesdì de fé pea la matiteies dla sozietà y mpo fé pert dl juech, ma Jan muessa udëi ite che si sëmies va ala nia, tla desmincënza.
L liber ie ilustrà cun pitures dl autor y unirà prejentà da Rut Bernardi.
L Istitut Ladin Micurà de Rü y la Consulta Ladina de Bulsan nvieia ala prejentazion n juebia ai 21 de utober dala 6 da sëira tl self dla cunferënzes tl segondo partimënt dl Vedl Chemun de Bulsan, Laubes 30, ulache l cianterà danterite la grupa »Tel Tipes«.

Cunzert de S.Zezilia dla Mujiga de Urtijëi
N dumënia ai 24 de nuvëmber dala 5 domesdì tla cësa de cultura a Urtijëi
Cun l cunzert tradiziunel de S. Zezilia fina via l ann mujighel dla Mujiga de Urtijëi. L dirighënt Egon Lardschneider à cris ora nce chëst ann n program drët nteressant, danter l auter cun la marcia »Orient et Occident Op. 25« de C. Saint-Saëns, la »Children's Suite« de G. Salnikov y la »Jazz Suite 2« de D. Shostakovic de chëla che l unirà purtà dant la marcia y l Walzer 2. L publich puderà oradechël audì l pez per solo »Czardas« de V. Monti sunà da Egon Goller cun la tuba. Tla segonda pert jiràla inant cun pec plu moderns coche meludies ora di films »Harry Potter« y »The Greatest Showman«. Stlut ju vën l cunzert cun l pez cunesciù »Conga del Fuego Nuevo« de A. Marquez y la marcia »Ungarns Kinder«.
Nvion i cumpanies dla mujiga a unì a scuté su l cunzert de S. Zezilia dla Mujiga de Urtijëi.

Sepp Messner Windschnur
N vënderdi ai 22 de nuvëmber te Tublà da Nives te Sëlva
L ciantautor plu de tëmp de Südtirol ie for mo ncantëur cun si chitara. Y l ie nce drët atif: iust da permò àl finà de tò su 14 cianties nueves y nscila dajeràl nce ora na CD. Ntan chësc cunzert lasceràl audì cianties da plu da giut da pudëi cianté pea, ma l nes prejenterà nce si »songs« nueves, for cun la medema ironia y satira.
Ncunfertëve sun na sëira mpue autramënter!
Te Tublà da Nives te Sëlva, n vënderdi ai 22 de nuvëmber dala 20:00.
Davia che l ie mé 90 lueges da garat Ve prions bel de apusté la lerch danora scrijan a info@tubladanives.it (mob. 333 7166471).
Ntreda: 10 €; cumëmbri 8 €.

Sëira de nfurmazion per i zitadins
N merdi ai 19.11. dala 20.30 tla cësa de cultura de Urtijëi
Coche uni ann d'autonn nvieia l Chemun de Urtijëi nce chëst ann duta la zitadines y duc i zitadins a na sëira de nfurmazion n con' dla atività dl Chemun.
L unirà prejentà da pert dl ambolt y di assessëures i majeri lëures stluc ju y chëi udui dant ti proscimi mënsc. L unirà nce dat lerch a ntervënc y a duman­des da pert dl publich.

Na bona marënda per nosta jënt de tëmp
La Lia Sarëinn nvieia duta la jënt sëura i 60 ani de Gherdëina a se nuzé de chësc servisc a Urtijëi, a S. Cristina y te Sëlva
Nviei ie duc chëi che à la residënza te Gherdëina y à passa 60 ani. Chësta scumenciadiva ne n'ie nia mé per i pueresc, ma per duc i seniores, che à ueia de se maië n bon cëif n cumpania.
Uni merdi possa la jënt de tëmp jì te un di trëi luesc de Gherdëina a maië da marënda:
a Urtijëi tla pitla sala dla Cësa de Cultura Luis Trenker, a S. Cristina tla sala Raiffeisen te cësa de Chemun o te Sëlva te stua di seniores sun calonia.
N se urta for dala 12:00. L priesc per la marënda ie de 5,00 € per persona.
Chiche uel jì a marënda muessa se lascé scrì su almanco nchin al di dant do marënda, cherdan su:–per Urtijëi l numer 335 1031751 – per S. Cristina l numer 333 1499949 – per Sëlva l numer 335 6558633.

Reuniun generala dla Lia da Munt Ladinia Val Badia
La Lia da Munt Ladinia tëgn en vëndres ai 22 de novëmber dales 19:30 süa reuniun generala tl salf dles manifestaziuns a San Martin de Tor
Al é indô passé n ann, y la Lia da Munt se abina por fá le bilanz sön l'ativité desfirada tratan l'ann. Sce an ciara zoruch, pón bëgn dí che al é gnü realisé tröpes iniziatives y porté inant proiec de gran importanza.
Un de chisc é le Junior Ranger, organisé adöm cun le Parch Natural Fanes-Senes-Braies. Le travert de chësc proiet é chël de sensibilisé y apascioné i mituns por la natöra, ti fá conësce le monn di tiers y dles piantes de nüsc raiuns, y al ti vëgn insigné da tigní n comportamënt responsabl sö por munt y tla natöra.
A Corvara él gnü realisé n ater proiet. Al é gnü daurí le salf da arpizé y da boulder, n secundo gnará spo ince daurí a Al Plan. Por se alené é chësc parëi dër ideal. Por arpizé daite n'él degun limit de eté, implü pón le pratiché da vigni tëmp y ince da sëra, canche al é scür alaleria.
Tratan la reuniun podarán constaté che la Lia da Munt é na gran assoziaziun; ara tol ite döta la Val Badia, ara é rapresentada te vigni comun. Tl ann 2019 ára albü 1762 iscric, cun n aumënt de 129 respet al ann passé. Ci che fej plajëi, é che ince le numer di jogn fina 18 agn crësc; al n'é 324, bëgn 52 deplü co l'ann da denant.
Al ordin dl de él ince la presentaziun dl program dles ativités por l'ann 2020.
Chësc ann él ince les lítes por renové le consëi dla Lia da Munt. Al foss bel sce valgügn se metess ciamó a desposiziun por fá pert dl diretif, y por colaboré adöm cun i atri por realisé proiec nüs. Por informaziuns plü avisa pón contaté i rapresentanc dla lia.
La reuniun jará spo inant cun na buna cëna, arjignada ca dala Uniun Patrones da San Martin. Cun l'estraziun di numeri dla lotaria se stlüj jö chësta incuntada.
Düc i amisc dla Lia da Munt é dër bel inviá da tó pert a chësta sëra de informaziuns y aorela cörta.