Manifestazions atuales speziales

Data

06 de dezember 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 6 de dezember
La Ila: 3. Boulder Event
Incö vëndres, ai 6 de dezëmber, tl local da boulder SaJ.un a La Ila
Pro le Boulder Event se tratera de na manifestaziun olache al stá al pröm post le devertimënt. Danter les staziuns che gnará arjignades ca, sarál plü problems boulder de dificolté desfarënta.
Scomenciamënt é dales 19:00 y al jará inant cina dales 22:00. Al sará döes categories: öna por i ëi y öna por les ëres, tres dai 16 agn insö. Alplü pó tó pert 25 partezipanc y par­tezipantes. Le cost d'iscriziun, cun lapró na boanda y la poscibilité da tó pert a na lotaria, é de 10,00€. Les iscriziuns vëgn tutes sö al 335 5400890.
Dales 21:00 sarál musiga dal ví cun Tracy Merano y le grup JEMM Music Project de Max Castlunger da San Martin de Tor. Düc é bel inviá da tó pert ativamënter o a ciaré pro!

1.st.friday.live.session@saj.un
Incö ai 6 de dezëmber cun le »JEMM Music Project« y Tracy Merano
Le conzert de chësc vëndres ai 6 de dezëmber te SaJ.un gnará daurí dales 21:00 da Tracy Merano y jará dedô inant cun »JEMM Music Project« cun Max Castlunger. Dal stil pop passarán a stromënc africans, fac cun lëgn y sciuroc de vigni sort. Al ves aspeta tröp ritm, mans che bat, usc che cianta y n »groove« rich de emoziuns. L'entrada é sura dai 16 agn insö y debann.

»Te vigni cör él na lerch«
Conzert d'Advënt en domënia, ai 15 de dezëmber dales 17:oo, tla dlijia de Badia
I sëis düc canc inviá da gní al conzert d'Advënt che vëgn tigní en domënia ai 15 de dezëmber dales 17:00, tla dlijia de Badia. Al sona y cianta chisc grups:
»Cor Kerygma« sot la direziun de Agnes Irsara;
»Terzet Sintonia« cun Sylvia Irsara, Jule Frenner, Monica Nagler y le ciantadú baritonn Hubert Adang
»Herum« cun Harald Dapunt y Matthias Thaler ala trombëta, Robert Anvidalfarei ala possauna, Ulrich Pizzinini ala tuba, Philipp Agreiter al corn.
Milio Terza portará dant tesć meditatifs
»Te vigni cör él na lerch, vignun pó ti pité alberch a Crist che vëgn...« y al depënn da vignun de nos sce i nes dauriun tres indó danü ala bela noela, aspetan cun ligrëza la festa da Nadé.

Sëra d'informaziun sön les Scores Altes da La Ila
Poscibilité da se informé söles scores y la manira da lauré, ai 10 de dezëmber
Suradöt i geniturs di scolars y dles scolares dles secundes y terzes mesanes é inviá en mertesc, ai 10 de dezëmber 2019 dales 20:00, tla sënta dles Scores Altes a La Ila, a na sëra d'informaziun sön les Scores Altes da La Ila. Al vëgn presenté les trëi sorts de scores che é a La Ila: Istitut Tecnich Economich, Lizeum Linguistich y Lizeum Sciënzes Umanes. La direturia Elena Pellegrini ti dá adöm a scolars y scolares le bëgngnü a düc chi che á interes da gní a imparé da conësce damí nostes scores cun sües strotöres y a se fá na idea sciöche al vëgn lauré. Scolars y scolares é sambëgn ince bëgngnüs ala sëra d'informaziun.

Salaputia Brass
Cunzert di Jëuni de Mujiga de Gherdëina, ncuei vënderdi ai 06.12. dala 20:30 te dlieja de Sëlva
Ve sà pa bela la mujiga suneda cun strumënc de banda? Pona ie chësc l cunzert per vo, ajache ai jëuni virtuëusc dl Salaputia Brass ne ti sà nia massa rie. L ensemble cun tumbrëtes, corn, posaunes, tuba y strumënc a percuscion lascerà audì pra l cunzert te dlieja de Sëlva n program adatà ala sajon y bele l titul »Merry Christmas, joyeux Noël, frohe Weihnachten« dij truep. Daujin a pec de mujiga tlassica de Bach, Händel, Claude Gervaise Holborne y Humperdinck, saràl da audì pec tlassics dl Nadel franzëus y cianties tradiziuneles da Nadel che cunescion bele coche »macht hoch die Tür o fröhliche Weihnacht überall, süßer die Glocken nie klingen« y n.i. da pudëi danter l auter nce cianté pea.

Cunzert d'Avënt
La Comunanza Ladina a Bulsan nvieia a n bel cunzert, n juebia ai 12 de dezëmber dala 18:00
L cunzert d'Avënt sarà tla dlieja »Tre Santi«, streda Duca d'Aosta a Bulsan, n juebia dala sies da sëira. Ntreda debant.
L sarà da scuté su pec de Mozart, Verdi, Debussy, Bera Zenz da Fëur, nterpretei da Martina Rifesser (erpa), Regina Maderthaner (flaut) y Sabina Willeit (usc). Marta Senoner lijerà dant na storia da Nadel scrita da d'ëila.
Nscila sun la notes dla mujiga y di biei pensieres, pra na buanda ciauda y zeche de dëuc da pesslé, ulons daldò te calonia se mbincé n »Bon Nadel«!
La Comunanza Ladina a Bulsan se ncunforta sun Vosc unì!

L linëus dl Avënt
L Cor di Jëuni Urtijëi y l Cor de Dlieja nvieia de cuer a n cunzert d'Avënt, n sada ai 14 de dezëmber dala 20:00 te dlieja de Urtijëi
Sot ala bachëta de Felicitas Schweizer (Cor de Dlieja), Tanja Comploi y Laura Stuffer (Cor di Jëuni Urtijëi) à i ciantarins mparà ite cianties adatedes per l tëmp d'Avënt.
La desferënzies ie richëza. Chëla ne mancia nia canche l se anconta plu generazions y ujes d'uni sort, a lascé audì na gran varietà de meludies y ritms, dala ciantia populera al pez african, dut y deplù saràl da audì... y da udëi.

Pest d'architetura Südtirol 2019
Mostra itineranta cun giaurida n sada ai 14.12. dala 18.00 tla sënta dla Lia Mostra d'Ert a Urtijëi
L pest de architetura de Südtirol che vën metù a jì uni ann dala Fundazion d'Architetura de Südtirol, premieia y prejentea frabicac realisei te nosta Provinzia che se lascia udëi per si idea y costruzion coerënta. Per l pest d'architetura de Südtirol 2019 à na iuria nternaziunela cris ora 26 proiec y de chisc n iel unì premià set, uniun te n'autra categuria. I proiec vën mustrei te na mostra itineranta, śën tla sënta dla Lia Mostra d'Ert- Circolo, ulache l sarà da udëi nce l proiet per l ciulé dal vin nuef Elena Walch dl architet de Urtijëi David Stuflesser, che ie unì premià tla categuria lëur y turism.
Pra la giaurida ai 14.12. rujenerà l arch. Igor Comploj y l ambolt de Urtijëi Tobia Moroder. L sunerà danterite: Ariel Trettel, Andreas Mayr Kondrak y Marion Moroder.
La mostra resterà davierta nchin ai 05.01.2020, da merdi nchin sada 10.00-12.00 y 16.00-19.00.

L Schi Club Gherdëina se prejënta
Ncuei vënderdi ai 06.12. dala 18:00 sun Plaza Stetteneck a Urtijëi
L Schi Club Gherdëina nvieia de cuer ala prejentazion dla scuadres y dl cudejel nuef 2019/20 cun l program dla proscima sajon, articuli d'uni sort, truepa nfurmazions nteressantes y sam­bën i sponsores che ie de gran mpur­tanza per la lia.
I atlec y traina­dëures unirà n defileda da Plaza de Sant Antone nchin sun Plaza Stetteneck, ulache n prejenterà duta la grupes y i atlec dl schi club, atlec dla scuadres naziuneles y duc i trainadëures.
L cunsëi dl Schi Club Gherdëina cun si 210 atlec y 32 trainadëures se ncunforta sun vosc unì!

Stories de vita y cianties d'Avënt
L Museum Gherdëina nvieia ncuei vënderdi ai 06.12. dala 16:00 tla cësa de cultura a Urtijëi, sala dla mostra »Mejes«
Persones che à vivù sun n luech da paur conta de lecurdanzes de si nfanzia sun n mesc, de coche i passova l inviern y l tëmp da Nadel. L sarà da audì stories da rì y da pensé do.
Danterite cianterà l »Trio dl'ëiles de Gherdëina« cun Otto Dellago. La ntreda ie debant!
Ntan dut l Avënt ie l liber cun la bela fotografies di mejes storics da giapé a miëur priesc cun leprò mo na cherta de ntreda tl Museum a Urtijëi da scinché.