Manifestazions atuales speziales

Data

10 de jené 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 10 de jené
Curs de pudejé 2020
La Scoles de Schi de Gherdëina mët a jì chësc curs uni sada domesdì te Val te Sëla
L curs de pudejé scumëncia duman sada ai 11.01. dala 14:00 te Val y dura nchin la 16:00.
L curs ie per duc i mutons y la mutans dla scoles elementeres y mesanes de Gherdëina. L vën nsenià la tecnica de basa y la tecnica liedia per 8 sades alalongia, fajan juesc y vel' pitla jita te Val.
N puderà nce purvé a stlupeté tl ban' dal scies de biathlon!
Chëi che uel fé pea à mé drë de se prejenté n sada domesdì mpue dan la 2 te Val.
Nfurmazions plu avisa giàpen: per la Scoles de Schi de Gherdëina da Arnold Runggaldier 335 6600933 o da Karin Moroder 346 4121787.
Da paië ite iel 80 €, per mpresté l material da pudejé 40 €.

»Ski Caching« n juech per pitli y granc!
Fajëde duc pea n sada che vën, ai 18.01. pra l juech de jì a crì tl raion dai schi de Gherdëina
La Scola de Schi de Urtijëi mët a jì na sort de »ciacia al tesor«, ulache la va de jì a crì tofles sparpaniedes ora mpue sëura dut l raion da jì cun i schi de Gherdëina. N fej pea te scuadres da doi y canche n ruva pra chësta tofles iel da se fé na foto, cun tramedoi y la tofla da udëi. Dan pië via giàpen na cherta dl raion cun la lueges ulache l ie tofles. Sun uni tofla iel n numer, chisc ie i ponc che vën cumpedei adum ala fin.
N se urta n sada ai 18.01. dala 8:30 sun Pitla Plaza de S. Antone per pië via dala 9:30 cun i schi y la cherta tla man. Da ruvé de reviers sun plaza iel nchin la 16:00.
Fajëde pea, l sarà dessegur da se devertì! L possa fé pea jënt de uni età (nce categuries Junior y Senior). Se scrì ite pòssen tla Scola de Schi de Urtijëi, tel. 0471 796153, paian ite 30 € per scuadra.
I prims vënc n bonn da 400 € da cumpré ite tla butëighes de Urtijëi, chëi che dà ju l »selfie« plu uriginel fat pra i photopoints vënc n bonn da 250 € y pona vëniel mo trat ora de biei pesć danter duc, nce n bel pèr de schi Elan.

Cursc da jadiné
L'Ice Club Alta Badia organisëia cursc da jadiné por prinzipianc y progredis
L' Ice Club Alta Badia píta indó cursc da jadiné por mituns y mitans dai 4 agn insö. I cursc jará inant por zirca 3 mëisc.
Le curs por i mituns che sá bele n pü' da jadiné mët man ai 13 de jená dales 16:00 y jará inant vigni lönesc y/o vigni mercui dales 16:00 ales 16:45. Al é la poscibilité da fá un o dui iadi al'edema.
Le curs por i prinzipianc vëgn tigní un n iade al'edema. Por i plü pici (mituns dla scolina) mëtel man en jöbia ai 16 de jená y jará inant vigni jöbia dales 15:30 ales 16:15. I plü gragn, aladó dl numer de scric ite, gnará partis sö al lönesc o mercui dales 16:00 ales 16:45.
Le cost dl curs é de 110,00 euro por un n iade al'edema y 180,00 euro por dui iadi al'edema.
Düc i mituns y dötes les mitans che á vëia da jadiné dess s'anunzié. Por l'iscriziun y por informaziuns prëibel cherdé sö o scrí anter i 10 de jená, al 333 2930586 (Renate).

Ert sön pista
Tl raiun dai schi da La Crusc vëgnel metü da jí por le terzo iade la manifestaziun »Ert sön pista« – n concurs de scoltöres de nëi en colaboraziun cun la scora profescionala Cademia de Urtijëi
Dai 13 ai 15 de jená sarál 5 scuadres, metüdes adöm da scolars dla scora profescionala da Urtijëi, che tol pert al concurs y arjigna ca na scoltöra de nëi. Por le concurs él gnü chirí fora adöm al professur Andreas Tomasini le tema »Volumi«. Vigni scoltöra vëgn metüda fora dan da na ütia o jödapé dles pistes dl raiun dai schi da La Crusc, pian ia dala pista de Gherdenacia a La Ila cina pro les üties sön les pistes de Badia. A chësta moda pó i schiadus y i amanc dl'ert amiré les operes, jon cun i schi da na ütia al'atra, sides tratan la realisaziun dl'opera sciöche ince tles edemes dedó. Le concurs se stlüj jö le mercui ai 15 de jená y la plü bela opera gnará chirida fora diretamënter dal publich tres i canai social dl'Alta Badia.

Berlin Comedian Harmonists
Cunzert di Jëuni de Mujiga de Gherdëina, n merdi ai 14.01, dala 20:30 tla cësa di cungresc a Urtijëi
L ie stat l scumenciamënt de na storia de gran suzes tl 1997 canche sies ciantarins se à metù adum a Berlin per la prima reprejentazion mundiela de »Veronika der Lenz ist da–die Geschichte der Comedian Harmonists«. Sibe l publich che la stampa fova ntujiasmei y duc se ncunfertova y audiva gën chësta maniera deletëula de cianté cun devertimënt. Do l teater ie l ensemble de ciantarins unì damandà per cunzerc tla majera ziteies dl'Europa. L'atmosfera che vën a s'l dé pra si cunzerc ie carateriseda da na gra virtuosità y sensibltà per la mujiga, cun la ujes che se acorda defin y cun n śich de nchersciadum.
Sun si program ne màncel mei i pec cunesciui y tan bënului de si idoi coche »Mein kleiner grüner Kaktus«, »In der Bar zum Krokodil«, »Veronika, der Lenz ist da« y trueps d'autri. Te de pitla pertes conti la storia da ntlëuta di Comedian Harmonists, a na maniera da fé n pitl viac ndëur ti ani '20 y '30 dl centené passà.

Doi garejedes de slalom strënt FIS di jëuni
Sun Piz Sela chësta sada y dumënia ai 11. y 12.01.
L Schi Club Gherdëina mët a jì duman sada ai 11 de jené y n dumënia ai 12 de jené doi garejedes de slalom strënt FIS – Marlene Cup per jëuni dai 15 ai 21 ani, sun Piz Sela.
L vën pià via tramodoi dis dala 9:30 cun la prima manche y dala 12:00 cun la segonda.
La premiazion sarà ntëur la 14:00 sun Plan de Gralba.
L Schi Club Raiffeisen Gherdëina nvieia duc i apasciunei de schi a uni a ti cialé a chisc campions di proscimi ani.