Manifestazions atuales speziales

Data

07 de fauré 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 7 de fauré
Get Ready!
Co sona pa n cuntrabas o na ukulele? Co vëgn pa soná i stromënc y ci storia él pa doía?
A chëstes domandes ti dunse na resposta al curs de musiga »Get Ready«. Elemënc fora dla formaziun ritmich-musicala y jüc: döt chësc ti dá na basa musicala ai mituns y ales mitans ti pröms agn de scora y dess ince ester ince n invit a ciafé fora ciun che é le stromënt che plej y passenëia deplü.
Le curs é ponsé por mituns y mitans dla 1a – 2a elementara y vëgn tigní le mertesc domisdé por 8 iadi dai 25 de forá ai 14 d'aurí a Al Plan. Le curs vëgn organisé da Badiamusica y tigní da la musizista Esther Videsott.
Por informaziuns y iscriziuns scrí n SMS al numer 333/9161652 o mené na mail ala misciun: esther_vide@hotmail.com

Garejeda de pudejé »Downhill« sun Mont de Pana
N dumënia ai 09.02. dala 10:30 tl zënter de schi nordich
L Schi Club Gherdëina Raiffeisen mët a jì n dumënia na garejeda de pudejé sun Mont de Pana a S. Cristina, che valerà per l zircuit Südtirol Cup.
L se trata de n format do la rata puech cunesciù ma scialdi spetaculer. La garejeda »downhill« vën fata sun n percurs de 2,5 km cun sauc, slalom y gobes desvalives. N pëia via sai »Palusc« y ruva ju tl zënter de pudejé. Per i plu pitli iel na trassa scurteda de 1 km, che pëia via puech sëura l lech de Pana y ruva ju tl zënter. La manifestazion mët man cun l start di plu pitli dala 10:30.
Nvion duc a unì a ti cialé a chësta garejeda scialdi spetaculera.

»Furmazions de culëures« de Carlo Mussner
Giaurida dla mostra n juebia ai 13.02. dala 18:30 te cësa de chemun a Laion
Per »Kunst im Gange« ie Carlo Mussner de Urtijëi unì nvià a mëter ora si pitures, che se dà ju ala semea cun cuntredes y luesc. Ma chësta grupes de cëses y frabicac ie per l artista mé l pont da ulache l pëia via per si furmazions cromatiches. Cun vares bën pensei svilupéiel, tres na scemplificazion y modulazion dla sperses, cuntredes da culëures che da na sort de n mosaich va nchin tla astrazion. L culëur ie duminant te si pitures, depëntes per la gran pert a uele. Ne se lascian nia nfluenzé da tendënzes dl mumënt costruësc Carlo Mussner la realtà da nuef y descëida nsci pra l usservadëur mprescions otiches fines y emotives, datrai nce mpue critiches y de nchersciadum de viers de si ncësa.
Duc ie nviei ala giaurida n juebia che vën y nce a unì a ti cialé ala mostra, che resta davierta nchin ai 15 de mei, tl orar canche l Chemun ie daviert: lu-ve 8:00-12:00 y juebia nce 16:00-18:30.

Gran festa da Carnescià per i 20 ani dla scola de schi Saslong
N juebia grassa dala 17:45 sun l purtoi Palmer a Urtijëi
N juebia grassa, ai 20 de fauré, festejea la scola de schi Saslong si 20 ani dala fundazion. Per scumencé la sëira, puderàn udëi i maestri che fej na show cun i schi n mascra y na bela defileda cun i chentli mpiei.
Da dedò uniràl premià la mascres plu urigineles. Perchël ie duc nviei a se lascé tumé ite velch de blòt y unì n mascra per avëi la ucajion de vëncer de beliscimi pesć.
Ntan duta la sëira ve aspieta japé dl purtoi la Ape dla Forst plëina de buandes, ulache n giaperà da bever, na panicia y da pestlé, dut acumpanià da mujiga per scumencé bën la sëira de juebia grassa y jì pona a festejé inant duc deberieda tl luech.
Duc ie nviei de cuer a unì a cialé pro y festejé deberieda cun la scola de schi Saslong.

»Welcome Home« – mostra de Adolf Vallazza
Giaurida ncuei vënderdi 07.02. dala 20:00 te Tublà da Nives te Sëlva
Adolf Vallazza (Urtijëi, 1924) ie na figura iconica tl panorama dla scultura sibe naziunela che nternaziunela d'al didancuei. Sustenidëur da ardimënt y rigurëus dl ziplé, àl dedicà si vita a na tecnica che nchin su per i ani '50 univa rateda bona mé per i lëures artejanei, y la à auzeda a denità artistica, ti giaurian nsci la streda a doi generazions de artisć de Gherdëina. Da na idea de Tobia Moroder y Ivan Senoner, n cunlauraziun cun l »Archivio Vallazza« y cun l sustëni dl Chemun de Urtijëi, gëura l Tublà da Nives la portes al gran artist Adolf Vallazza, 50 ani do si ultima mostra te Gherdëina. L titul ne po' nia vester n auter che »Welcome Home«.
La mostra ie da udëi nchin ai 15.03. uni di dala 16:00-19:00, de dumënia nce dala 10:00-12:00; de lunesc ie l Tublà da Nives stlut.

Danmesdì de cunsulënza per patrons di mejes de Gherdëina
N vënderdi ai 21.02. dala 10:00 ala 12:00 tla Cësa de Cultura a Urtijëi (pitla sala dla cunferënzes)
Tl cuntest dl proiet y dla mostra »MEJES de Gherdëina, La memoria de na cuntreda« vëniel metù a jì n danmesdì de nfurmazion y cunsulënza per patrons nteressei di vedli frabicac da paur.
N puderà damandé do y se lascé cunsië da esperc y tecnics desferënc n con' de cuestions che reverda la dertureda, cunservazion y/o scunanza de si vedla cësa da paur o tublà storich.
L sarà a despusizion per dé nfurmazions persones cumpetëntes dla Repartizion Bëns culturei
- dl Ufize provinziel per la Planificazion dl paesaje
- dl Ufize per l Frabiché y l ambolt de Urtijëi Tobia Moroder.
Per njenië ca miec l'ancunteda vëniel cunsià de dé sëura danora l numer dla parzela y de tò pea pra la ancunteda sce n cajo nce dessënies y fotografies dl frabicat n cuestion.
Chësc servisc de nfurmazion ai patrons di mejes nteressei vën pità debant.
Persones nteressedes possa se lascé nuté su nchin ai 19 de fauré tl Museum (da lunesc nchin vënderdi, 9:00-12:00 y 14:00-18:00) o cherdé su l numer de tel. 0471 797554, o mandé na e-mail a:
info@museumgherdeina.it .

Finissage dla mostra »MEJES« cun cunvëni daviert al publich
N vënderdi ai 21.02. dala 14:00 ala 18:00 tla Cësa de Cultura a Urtijëi, tla sala dla mostra »Mejes«
L Museum Gherdëina nvieia al cunvëni de stude n ucajion dla finissage dla mostra »Mejes de Gherdëina. La memoria de na cuntreda« tla Cësa de Cultura.
La ntreda ie liedia.
Tl zënter dla manifestazion iel mo n iede la mpurtanza dl mantenimënt di mejes y si valor culturel.
Program avisa sun www.museumgherdeina.it.
Nfurmazions: Museum Gherdëina, Cësa di Ladins, tel. 0471 797554.
Pervia dl gran nteres resta la mostra »Mejes« davierta mo nchin ai 23 de fauré 2020, me. – ve. 15:00-18:00, ve. y sa. 10:00-12:30, ai 23 de fauré 10:00-12:30.

Workshop da cujiné sann
Ti cujiné spëisa sana ai mituns. Te na sëra de workshop a La Ila pón ciafé informaziuns y förtli de valüta. Ai 19 de forá
Ci é pa na alimentaziun sana y ci pói pa iö ti cujiné a mi mituns? Ai 19 de forá dales 17:30 vëgnel tigní, en colaboraziun cun le Consëi de Formaziun Badia, tl Zënter SaJ.un a La Ila na sëra de workshop y informaziun sön le cujiné sann por geniturs, cun la dra. Ivonne Daurú Malsiner.
Le cost é de 15,00 € a partezipant y les prenotaziuns vëgn tutes sö te Sorvisc ai Jogn Val Badia anter i 17 de forá al 0474 523070.
Aste vëia da imparé n mistier nü?
Tla scora por laurs soziai »Hannah Arendt« vëgnel pité de plü formaziuns por operadus sozioassistenziai y operadus soziosanitars
Sce t'as vëia da imparé n mistier nü, tol l'ocajiun y scriete ite a öna de chëstes formaziuns:
– formaziun a tëmp plëgn da operadëssa sozioassistenziala, che vëgn tignida sides a Porsenú, che a Balsan y a Maran;
– formaziun a tëmp plëgn da operadëssa soziosanitara, che vëgn tignida sides a Porsenú, che a Balsan y a Maran.
Les iscriziuns é davertes cina ai 15 de forá pro la scora por i laurs soziai »Hannah Arendt«.
Lapró vëgnel pité na formaziun a mez tëmp da operadëssa sozioassistenziala, che vëgn tignida a Porsenú. Les leziuns de teoria é 3 iadi al'edema danmisdé.
Les iscriziuns é davertes por porsones dai 25 agn insö, cina ai 13 de merz pro la scora por i laurs soziai »Hannah Arendt«.
Informaziuns plü menüdes sön les formaziuns ciafon pro la scora al 0471 973494 o sön www.sozialberufe.berufsschule.it

N mistier por le dagní
A Picolin él na serada de informaziuns sön le mistier da operadus soziosanitars y operadus sozioassistenziai
Chi che á interes da ciafé de plü informaziuns sön i mistiers dla cura y assistënza, plü avisa sön le mistier de operadú/dëssa soziosanitar/a y operadú/dëssa sozioassistenzial/a, pó les ciafé pro na serada aposta, che vëgn tignida en mercui ai 19 de forá dales 19:30 tla sënta dl Raiun soziosanitar a Picolin. Tratan la sëra gnarál dé informaziuns sön i mistiers, sciöche ince sön la Ciasa de Palsa, le sorvisc de Assistënza a Ciasa dl Raiun Sozial y le Zënter Sozial La Spona.