Manifestazions atuales speziales

Data

14 de fauré 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedesi ai 14 de fauré
Gran defileda da Carnescià a Urtijëi
N juebia grassa ai 20 de fauré dala 3 domesdì. La plu bela mascres vën premiedes
N juebia grassa, ai 20 de fauré, mët la Lia dl Turism de Urtijëi inò a jì la gran defileda da Carnescià. Duc i mutons y la mutans, coche nce i granc, ie nviei de cuer a fé pea la defileda tres Urtijëi, che pierà via dala 3 domesdì dal hotel Madonna (dlongia l Despar), passerà tres l raion da jì a pe y jirà inant nchin sun Plaza de Dlieja. Tlo uniràl fat na pitla festa cun mujiga DJ y partì ora de bon crafons.
Fé pea nce tu cun ti cumpanies – la plu bela mascres unirà premiedes! Chiche ulëssa fé pea cun na gran grupa o n carët dëssa, per rejons de urganisazion, prëibel se lascé nuté su tla Lia dl Turism, mandan na e-mail a ortisei@valgardena.it o cherdan su l 0471 777600.

Vivanda tl'ena de Carnescià a S. Cristina
N juebia grassa y n merdi de Carnescià
Per i dis de Carnescià nvieia la Lia dl Turism de S. Cristina n juebia grassa ai 20 de fauré a se maië na bona panicia sun plaza de chemun dala 10.00 danmesdì inant. I mutons y la mutans dla scolina y scola elementera de S. Cristina fajerà n valgun bai y cianterà n valguna cianties. Unide mascarei su a sté n cumpania pra de bela mujiga da druch.
N merdi de Carnescià ai 25 de fauré puderàn se lascé depënjer l mus dala 9 nchin la 11 danmesdì tla bibliotech Tresl Gruber y per finé via nvion ala »skishow« de Carnescià sun Plan da Tieja dala 5 domesdì cun i maestri dla scola de schi de S. Cristina.

Danmesdì de cunsulënza per patrons di mejes de Gherdëina
N vënderdi ai 21.02. dala 10:00 ala 12:00 tla Cësa de Cultura a Urtijëi (pitla sala dla cunferënzes)
Tl cuntest dl proiet y dla mostra »MEJES de Gherdëina, La memoria de na cuntreda« vëniel metù a jì n danmesdì de nfurmazion y cunsulënza per patrons nteressei di vedli frabicac da paur.
N puderà damandé do y se lascé cunsië da esperc y tecnics desferënc n con' de cuestions che reverda la dertureda, cunservazion y/o scunanza de si vedla cësa da paur o tublà storich.
L sarà a despusizion per dé nfurmazions persones cumpetëntes
- dla Repartizion Bëns culturei
- dl Ufize provinziel per la Planificazion dl paesaje
- dl Ufize per l Frabiché y l ambolt de Urtijëi Tobia Moroder.
Per njenië ca miec l'ancunteda vëniel cunsià de dé sëura danora l numer dla parzela y de tò pea pra la ancunteda sce n cajo nce dessënies y fotografies dl frabicat n cuestion.
Chësc servisc de nfurmazion ai patrons di mejes nteressei vën pità debant.
Persones nteressedes possa se lascé nuté su nchin ai 19 de fauré tl Museum (da lunesc nchin vënderdi, 9:00-12:00 y 14:00-18:00) o cherdé su l numer de tel. 0471 797554, o mandé na e-mail a info@museumgherdeina.it.

Finissage dla mostra »MEJES« cun cunvëni daviert al publich
N vënderdi ai 21.02. dala 14:30 ala 18:00 tla Cësa de Cultura a Urtijëi, tla sala dla mostra »Mejes«
L Museum Gherdëina nvieia al cunvëni de stude cun ghesć de gran caratura n ucajion dla finissage dla mostra »Mejes de Gherdëina – La memoria de na cuntreda«, cun referac y descuscion. Tl zënter dla manifestazion iel mo n iede la mpurtanza dl mantenimënt y l daunì di mejes y si valor culurel.
La ntreda ie liedia.
Program avisa sun www.museumgherdeina.it. Nfurmazions: Museum Gherdëina, Cësa di Ladins, tel. 0471 797554.
Pervia dl gran nteres resta la mostra »Mejes« davierta mo nchin ai 23 de fauré 2020, me.–ve. 15:00-18:00, ve. y sa. 10:00-12:30, ai 23 de fauré 10:00-12:30.

Gran festa da Carnescià per i 20 ani dla scola de schi Saslong
N juebia grassa dala 17:45 sun l purtoi Palmer a Urtijëi
N juebia grassa, ai 20 de fauré, festejea la scola de schi Saslong si 20 ani dala fundazion. Per scumencé la sëira, puderàn udëi i maestri che fej na show cun i schi n mascra y na bela defileda cun i chentli mpiei. Da dedò uniràl premià la mascres plu urigineles. Perchël ie duc nviei a se lascé tumé ite velch de blòt y unì n mascra per avëi la ucajion de vëncer de beliscimi pesć.
Ntan duta la sëira ve aspieta japé dl purtoi la Ape dla Forst plëina de buandes, ulache n giaperà da bever, na panicia y da pestlé, dut acumpanià da mujiga per scumencé bën la sëira de juebia grassa y jì pona a festejé inant duc deberieda tl luech.
Duc ie nviei de cuer a unì a cialé pro y festejé deberieda cun la scola de schi Saslong.

Emanuil Ivanov
Cunzert cun l pianist che à venciù l pest »Busoni«, n mierculdi ai 19.02. dala 20:30 tla cësa di cungresc a Urtijëi
I Jëuni de Mujiga de Gherdëina à l plajëi de pudëi pité te si program de cunzerc na sëira cun l pianist che à venciù l ann passà l prim pest pra l cuncors Ferruccio Busoni. L jëunn Emanuil Ivanov, nasciù tl 1998 tla Bulgaria, à nce zënza mo venciù de plu prim pesć pra cuncorsc renumei y danter l auter l segondo pest pra l cuncors Chopin a St. Petersburg. L à mparà pra de gran pianisć y à sunà sciche solist y cun orchestres tla Bulgaria, Franzia y Polonia y pona nce pra l festival Moscow meets friends. Tla proscima doi sajons sarà Ivanov da audì sciche solist y te recital ti zëntri de mujiga dla ziteies plu mpurtantes dl'Europa y dl'Asia.
Tl cunzert a Urtijëi lasceràl audì Sies Variazions, op. 34 de L. Van Beethoven, Miroirs de Maurice Ravel y Chedri de na Mostra de M.P. Mussorgsky.

»Velozité y füch«
Chësc é le tema che caraterisëia la show söi schi, che la scora de schi da Calfosch tëgn en lönesc ai 17 de forá
Dales 18:00 sarál i maestri dla scora de schi che fej na desmostraziun sön la pista »Colfosco«, tl zënter dl paisc. Ince le grup de freestyle »Pirates«, metü adöm da jogn dl post apascioná dl schi y dla brëia, mostrará cun tröpa adrenalina y aziun salc y acrobazies tl'aria. Te chësta ocajiun ti gnarál mostré al publich le laur dla preparaziun dles pistes, fat vigni sëra dai iac dala nëi, por pité ai sciori de bones condiziun da jí cun i schi. Al ne manciará sambëgn nia musiga dal DJ y tröp devertimënt.

Carnescé tl'Alta Badia
Deplü é i apuntamënc tratan les edemes da Carnescé, da na ciacia al tesur sön pista cina al Carnival Cup y acrobazies
En ocajiun dles edemes de Carnescé vëgnel organisé tl'Alta Badia deplü festes y defilades. Ai 20 de forá, dales 14:30 inant, vëgnel metü da jí a Calfosch dlungia le punt tl zënter dl paisc na festa sön pista cun musiga y animaziun de clowns por pici y gragn.
Ciacia al tesur sön pista
La domënia de Carnescé podará düc tó pert ala ciacia al tesur da Carnescé sön les pistes dl raiun dai schi dl'Alta Badia. Dales 10:00 inant, jon cun i schi da n punt al ater y se architan pro la staziun a munt dl Piz Sorega, Piz La Ila y la staziun a val dl Boé y La Crusc, pón cöie adöm deplü toc por mëte adöm la maschera y ciafé na picera scincunda.
Carnival Cup a Badia
Le medemo de vëgnel tigní a Badia la tradizionala Carnival Cup. La gara en maschera jödapé dla pista da La Crusc mët man dales 14:00 y düc é inviá da tó pert cun val' meso de trasport particolar.
Defilada y acrobazies a Corvara
Le mertesc ai 25 de forá dales 14:30 él söl program na festa cun defilada dles mascheres jödapé dla pista »Col Alt« a Corvara. Na juria premiará la maschera plü bela y originala y i mituns á ince la poscibilité da se lascé depënje sö le müs. Dedó vëgnel metü da jí l'acrobatic show adöm cun le Freestyle Team Pirates Alta Badia.
Animaziun a San Ciascian
Ince tl zënter dl paisc da San Ciascian sarál le mertesc ai 25 de forá dales 14:30 inant tröpa animaziun cun jüc, musiga y magia. Al gnará ince dé fora canifli da Carnescé y pizza.

Cunzert di sculeies che fej pea pra l cuncors »Prima la Musica« 2020
N vënderdi ai 21 de fauré dala 17:30 tla gran sala dla Cësa de Cultura a Urtijëi
»Prima la musica« ie n cuncors de mujiga resservà ai jëuni de duta l'Austria y dl Südtirol. Dantaldut se tràtel de jëuni/ jëunes che studieia tla universiteies de mujiga, tl cunservatore o tla scoles de mujiga.
Dut jëuni da talënt, danter 8 y 24 ani, i muessa vester al'autëza de lascé audì n program de livel aut che dëssa duré n 12-15 menuc y sëuraprò sambën suné o cianté dant a na giuria de esperc.
Chëst ann, a Schwaz tl Tirol, saràl nce na bela cumpëida de sculeies dla Scola de Mujiga de Gherdëina che fajerà pea pra chësc cuncors.
Per chësta manifestazion de mpurtanza se àl njenià ca bën 14 sculeies:
- Trio BEAT Tamine, percuscions: Filip Bassetto, Matias Gomez Biamón, Gabriel Perathoner
- Kevin Mauroner, tlavier solist
- Drumdisaster4, percusions: David Moroder, Nicky Schmalzl, Patrick Thaler, Marco Zambon
- Maria Gasslitter, vidula solista
- Duo Kerschholz, percuscions: Diego Kerschbaumer, Martin Holzknecht
- Linda Rungger, tlavier solista
- Tanja Comploi, ciantarina solista
- Timea Kaslatter, ciantarina solista

N muessa bën dì che chisc sculeies à talënt per la mujiga y se proa dassënn ntan l ann y sona o cianta a cësa cun lezitënza feter uni di. I ie bele da n valgun mënsc incà tl lëur de mparé ite plu pec, a na moda che i sibe boni de i suné y cianté bën, metan ite si sentimënc y emuzions tla mujiga.
Chisc sculeies ie unic nseniei ju dala maestra Judith Piccolruaz (tlavier), Erika Mussner (cianté), Georg Malfertheiner (percuscions) y Christian Ploner (vidula).
Per chësta ucajion vëniel metù a jì n cunzert, che à nce la funzion de na gran proa generela, per lascé audì bele danora ai genitores y parënc, ma sambën nce a duc i pasciunei cie che i à njenià ca.
Ve nvion duc a unì a scuté su.