Manifestazions atuales speziales

Data

07 de agost 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 7 de agost
Conzert »Romance del diablo«
I solisć dl’Orchestra Filarmonica Italiana cun le saxofonist Marco Albonetti píta n conzert particolar ai 9 d’agost, tla Val dl’Ert a San Martin
Le festival »Transit« de Badiamusica vá inant en domënia ai 9 d’agost dales 17:00 tla Val dl’Ert a San Martin de Tor (sce al é bur’ tëmp sön paiun d’Al Plan). Ara se trata de n conzert en omaja al tango de Astor Piazzolla, che compliss tosc 100 agn. Tl program él preodü l’esecuziun di toc plü rapresentatifs dl tëmp danter le 1965 y le 1974: dales »Cuatro Estaciones Porteñas«, ala suite dl Diablo cina ai toc che l’á fat deventé conesciü sura döt le monn sciöche »Libertango e Oblivion«. I aranjamënc é gnüs curá da Marco Albonetti söla basa dles partitöres originales dl maestro y tol ince ite toc fora dl proiet »Summit« cun le saxofonist jazz conesciü Jerry Mulligan. Le conzert vëgn organisé en colaboraziun cun le festival SMACH.


Incuntades leterares
Tl’Alta Badia vëgnel pité dai 9 ai 21 d’agost la 17ejima ediziun de »Un libro, un rifugio«: incuntades leterares cun auturs taliagn
La manifestaziun leterara »Un libro, un rifugio. Incontri con l’autore« curada da Gianna Schelotto röia chësc isté ala 17ejima ediziun. Dai 9 ai 21 d’agost vëgnel tigní de plü incuntades cun personaji dla leteratüra taliana, ti salf dles manifestaziuns dl’Alta Badia. Tratan les presentaziuns gnarál traté temesc d’atualité y n valgügn apuntamënc gnará abelis dales melodies de Simona Bondanza y Michi Loesch. Dötes les incuntades mët man dales 17:30. Chisc é i apuntamënc:

09.08.: »Fino a quando« de Linus a La Ila
11.08.: »Crisi climatica: una sfida possibile?« de Miria Pigato Cottarelli, cun Luca Mercalli a Corvara
13.08.: »Todo cambia: cronache di paure e di ardimenti« de Gianna Schelotto, cun Alberto Faustini a Corvara
14.08.: »Quando c’è la salute. Storie vere o supposte: curiosità, miti e dicerie della medicina« de Michele Mirabella y Sandro Settimj a La Ila
17.08.: »All’inferno e ritorno ovvero un anno vissuto pericolosamente« de Carlo Cottarelli a Corvara
21.08.: »Il lavoro dello spirito« de Massimo Cacciari a La Ila
Les incuntades vëgn metüdes da jí tl respet dles regoles preodüdes y i posć por tó pert é limitá.


Mostra »L’Alcôve« de Sophie Eymond
La giaurida ie tla sënta dla Lia Mostra d’Ert/Circolo a Urtijëi n vënderdi ai 14.08. dala 20:30. La ntroduzion unirà fata da Peter Senoner, mujiga de Veronika Mayr y Ariel Trettel
L’artista prejënta si criazions nueves che conta dla belëza dla vulnerabltà. La delicatëza, che romp nosta sozietà massa cunzentreda sun la ulentà y la forza, ie una dla carateristiches plu beles dla jënt. Ne n’iel pa nia chëla che nes lascia pro de unì tuchei dala grazia?
La mostra »L’Alcôve« de Sophie Eymond resterà davierta nchin ai 31.08., uni di 16:00-19:00 y 20:00-22:00.


60 ani de mpëni per Gherdëina
L Museum Gherdëina cumplësc ai 7 de agost 60 ani da si giaurida
Pervia dla situazion covid ne pòssen danz fé deguna festa chësc fin dl’ena. L Cunsëi y la Direzion dl Museum Gherdëina tol perchël l’ucajion tres La Usc per ti sentì gra de cuer a duc si cumëmbri, sustenidëures tres dunazions, mprësć, cunlaurazion y nfruscedes de ulentariat, y cuntribuc finanziei per avëi judà pea a arichì l Museum, valorisé l’arpejon culturela y slargé ora l’atività a bën dla cumenanza ntiera.
Nfurmazions n con’ de duta la ufiertes per l aniverser ntan l mëns de agost pòssen nriescer sun la plata internet dl Museum www.museumgherdeina.it o per telefonn: 0471 797554.
Orares de giaurida dl Museum Gherdëina tla Cësa di Ladins: da lunesc nchin vendërdi, 10-13 y 14-18.


Prejentazion dl proiet Zënter Iman-Pana/Ciandevaves
Tl Zënter Iman vëniel n juebia ai 13 de agost dala 20:30 prejentà n proiet nuef dla ferata che va da iló demez nchin su sun Pana/Ciandevaves
La firma Sunpana srl à dat ju te Chemun de Santa Cristina n proiet per realisé na trassa nueva de na ferata–schiche chëla che ie per jì su sun Resciesa–che pëia via da Iman y va su nchin sun Pana/Ciandevaves. Leprò iel nce l proiet de na nfrastrutura moderna for iló da Iman.