Manifestazions atuales speziales

Data

26 de fauré 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes tla edizion dl 26 de fauré
Smach 2021: le concurs é davert
Escriziun de »Smach 2021« tla Val Badia cun le tema »fragilité«. Al é la cuinta ediziun por l'esposiziun tratan l'isté 2021. Le concurs internazional mët tl dialogh l'ert contemporana cun le patrimone de morvëia Unesco dles Dolomites
La bandida por la cuinta ediziun de Smach é publicada. I artisć y düc i creatifs interessá a na intervenziun in loco (i sic y posć predestiná é indöt diesc) o a na opera artistica á tëmp cina ai 28 de merz 2021 da mëte dant sües propostes y idees. Diesc é i sic por mëte sö i laurs y intervënc che ruvará ince en chësc ann adalerch da plü continënc, diesc é – de conseguënza – i pesć monetars scric fora. I sic por ideé y mëte sö les operes é: Le da Rina, Chi Jus, Pra de Pütia, Forcela de Furcia, Val dl'Ert, Tru di Lec, La Crusc, Armentara, Fanes y Pederü. Na novité da odëi fora é che por chësta ediziun él ince ala pert le raiun turistich dl'Alta Badia che tol ite i paisc da La Val y di comuns de Badia y Corvara.
Tema: la fragilité
Le tema chirí fora dai coordinadus dl proiet Smach 2021 é la »fragilité«. I viun te tëmps nia plü tan sigüsc por planifiché y fá sö, la porsona resta »picera« dan ala gran natöra y ala vita. I artisć y les porsones creatives vëgn inviá a na reflesciun sota y ampla söi aspec umans y soziai che i viun ti tëmps dla pandemia dl coronaviurs.
La giuria che chiriará fora en chësc ann i laurs da realisé y i mitënc locai, nazionai y internazionai da premié é metüda adöm da Julia Bornefeld (Bornech/Kiel), Gehard Demetz (Balsan), Guus van den Hout (Oosterhout), Giacinto Di Pietrantonio (Milan) y Giulia Ferracci (Roma).
Daurida ai 10 de messé 2021
I laurs y intervënc gnará metüs sö ti posć ai pröms de jügn 2021, por le de 10 de messé 2021 él preodü la vernissaja de Smach 2021. La bienela internazionala de intervenziun creatif-artistica tles Dolomites dla Val Badia dorará cina ai 12 de setëmber 2021. Le zënter dla gran esposiziun tla natöra sará la Val dl'Ert, olache al é da ciafé da dui agn incá deplü operes protagonistes de ediziuns de Smach di agn passá. Ince por chësta ediziun él preodü che val' laur o opera restes söl post.

Pest per poejies ladines »Angelo Trebo«
Escrizion dla nona edizion. Termen per mené ite les poejies: 30 de auril 2021
Al é n concurs de poejies davert a duc chi che scriv per ladin (te vigni varianta y idiom), metù su dl 1997 a San Martin de Tor da l'union culturala y artistica EPL – Ert por i Ladins. Con l'edizion dl 2012 fova l pest trienal vegnù daurì a dutes les variantes ladines y i idioms ladins dl raion dles Dolomites, cie che à porté spo tles trei edizions suzessives a na maioura partezipazion da pert de autoures y autours. L'edizion nueva, segn daverta, é chela dl 2021. La premiazion é preveduda per l prum isté o auton 2021 – ence te na maniera virtuala, sce les condizions per les restrizions anti Covid – 19 ne dessa nia conzede na festa y enconteda de persona.
Criters y condizions
Da prejenté él – ence en chest iade – anter trei y cinch poejies. I prums trei posć é ciariés con pesć monetars de 500,00, 300,00 respetivamenter 200,00 euro. Per tó pert él da paié ite sun l cont bancar IBAN IT41H 08010 58830 000 304000455 intesté a l'EPL-Ert por i Ladins la comiscion de partezipazion de 20,00 euro.
Vigni autour/a prejenteia les poejies te cater copies, les contrassegneia con n pseudo­nim y ajonta laprò te na mendra cuverta scluta si dac anagrafics y l'atestazion dl versament dla comiscion de partezipazion. Sun la mendra cuverta scrivel/ela su si pseudonim.
La miscion per mené ite o dé ju a man l material per tò pert al concurs – anter l 30 de auril 2021 – é:
EPL-Ert por i Ladins
Pest »Angelo Trebo«
str. Stufles 20
39030 San Martin de Tor/San Martino in Badia
BZ

»Guern de ciasa zënza refodam«
En mertesc ai 2 de merz dales 20:00 mët da jí le Consëi de Formaziun de Badia n referat online dal titul »Haushalt ohne Müll – bzw. Zero Waste«. Referënta é Maria Lobis Zanotti
»Zero Waste«, por ladin »degun refodam« – é na filosofia de vita, aladô de chëra ch'an proa da vire, sconan les ressurses le plü ch'ara vá y savon che chësta manira da vire é sostenibla.
La situaziun dl ambiënt sön le monn nes sforza tres deplü da mudé idea y da odëi les cosses atramënter, ince sce al é gonot ri da fá le pröm vare, deache tan tröpes cosses messass gní mudades.
Co ch'an pó indere fá, cun püc mudamënc de pinsier (»Mindsets«), da avëi na miú manira da vire ti confrunc dl ambiënt incëria, chël vëgnon alsavëi da tó pert a chësc referat.
I argomënc dl referat é:
  • i pröms vari devers de na vita sostenibla
  • söl iade
  • cumpré ite y consumé
  • te ciasadafüch
  • te bagn
  • fá le guern de ciasa (puzené)
  • cun i mituns
Le referat é por todësch y vëgn organisé dal Consëi de Formaziun de Badia. Por informa­ziuns: cf.badia@rolmail.net .
Le link por tó pert al referat sön Zoom é https://zoom.us/j/93289496218