Manifestazions atuales speziales

Data

16 de auril 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes tla edizion dl 16 de auril
Pest per poejies ladines »Angelo Trebo«
Escrizion dla nona edizion. Termen per mené ite les poejies: 30 de auril 2021
Al é n concurs de poejies davert a duc chi che scriv per ladin (te vigni varianta y idiom), metù su dl 1997 a San Martin de Tor da l'union culturala y artistica EPL – Ert por i Ladins. Con l'edizion dl 2012 fova l pest trienal vegnù daurì a dutes les variantes ladines y i idioms ladins dl raion dles Dolomites, cie che à porté spo tles trei edizions suzessives a na maioura partezipazion da pert de autoures y autours. L'edizion nueva, segn daverta, é chela dl 2021. La premiazion é preveduda per l prum isté o auton 2021 – ence te na maniera virtuala, sce les condizions per les restrizions anti Covid – 19 ne dessa nia conzede na festa y enconteda de persona.
Criters y condizions
Da prejenté él – ence en chest iade – anter trei y cinch poejies. I prums trei posć é ciariés con pesć monetars de 500,00, 300,00 respetivamenter 200,00 euro. Per tó pert él da paié ite sun l cont bancar IBAN IT41H 08010 58830 000 304000455 intesté a l'EPL-Ert por i Ladins la comiscion de partezipazion de 20,00 euro.
Vigni autour/a prejenteia les poejies te cater copies, les contrassegneia con n pseudo­nim y ajonta laprò te na mendra cuverta scluta si dac anagrafics y l'atestazion dl versament dla comiscion de partezipazion. Sun la mendra cuverta scrivel/ela su si pseudonim.
La miscion per mené ite o dé ju a man l material per tò pert al concurs – anter l 30 de auril 2021 – é:
EPL-Ert por i Ladins
Pest »Angelo Trebo«
str. Stufles 20 - 39030 San Martin
de Tor/San Martino in Badia
BZ

»Multisport« y »Sport Week«: al vëgn daurí les iscriziuns
Dai 19 de aurí cina ai 31 de ma pón se scrí ite ai proiec da d'isté inviá ia da deplü uniuns sportives dl'Alta Badia
»Multisport« é n program de ativités sportives por i mituns y les mitans dla elementara (nasciüs danter le 2015 y le 2010). Adöm cun i alenadus Davide Moling, Emanuel Gravino y Andreas Forer podarái porvé fora de vigni sort de sporc sciöche p.ej. tennis, hockey, arpizé, roda da munt, palé y ii.
La novité da chësc isté é »Sport Week«, döes edemes de ativités sportives ponsades por i mituns y les mitans dla scora mesana. A »Multisport« pón se scrí ite sides a 3 co a 6 edemes a chësc link: https://forms.gle/8iYrTqP2cCZxbESeA.
Por ci che reverda »Sport Week« pón se scrí ite a öna n'edema. An podará tó pert ince ala secunda edema, ma sce al sará ciamó posć lëdi. Chësc é le link por se scrí ite a »Sport Week« https://forms.gle/2tQXvVo g3bGv meUh6.

KVW Patronat y KVW Service
L ufize a Urtijëi pieta tramedoi servijes y cunsulënza d'uni sort
Patronat KVW-ACLI per:
cunsulënza n con' dla rejon de jì n pension y la dumandes da fé, scioldi per nvalidità y scioldi per secudì, pension per fami­lieres dl/a defont/a, demi­scions tla forma tele­matica, cunsu­lënza y dumanda per fonds de pension sëura­prò, y truep deplù che à da n fé cun la prevenzion y prutezion soziela.
Per fé ora n terminn, da merdi nchin juebia, dala 15:00 ala 16:45, cherdé su l 0471 050780.
KVW Service per:
mëter ju la detlarazion dla chëutes Mod. 730 o Mod. Redditi per chiche ie n pension y per depen­dënc, scrì ora l Mod. RED y INVCIV, mëter ju la detlarazion EEVE y la dumanda per i scioldi ala families da pert dla Provinzia sciche nce mëter ju la detlazion ISEE, y per d'uni sort de dumandes che à da n fé cun cuestions de chëutes.
Fé ora n terminn dan­ora, online sot a www.mycaf.eu o cherdan su l 0471 941704.

Tublà da Nives: Cabaret online
De Fritz Grünbaum cun Carlo Emanuele Esposito, ncuei vënderdi ai 16.04. dala 20:30
Avisa dan 80 ani ie l cabaretist Fritz Grünbaum mort tl ciamp de cun­zentramënt de Dachau, ulache l ne à mei lascià de devertì i depurtei cun si monologs da humor.
L artist y muderadëur de Bulsan, Carlo Emanuele Esposito, lecorda chësc gran persunaje te n cabaret online metù a jì dal Tublà da Nives dal titul »Mein Kollege, der Affe!«.
Ncuei vënderdi ai 16 de auril 2021 dala 20:30 sun la plata facebook »Tublà da Nives« o tres l link sun internet www.tubladanives.it

Cunferënza online
La »cuntreda sunënta« sciche mesun de cunescënza y scuvierta dl paesaje
Ncuei vënderdi ai 16 de auril dala 6 da sëira, terza y ultima cunferënza online cun Martino Mocchi, filosof y architet.
Per ntënder miec la cuntreda culturela y nflu­enzé positivamënter si svilup, ne tléchel nia mé ti cialé cun i uedli. La cuntreda muessa unì sen­tida cun duc i sënsc.
Chësta tesa nueva vën spiegheda dal architet y filosof Martino Mocchi tla cunferënza online, che ie da pudëi scuté su ncuei vënderdi dala 6 da sëira.
La partezipazion sun l portal Zoom ie debant.
L link ie publicà sun la plata web dl Museum Gherdëina: www.museumgherdeina.it.
Cun chësta cunferënza stluj l Museum Gherdëina ju si prima lingia de cunferënzes online dedichedes ala cuntreda culturela alpina cun reflescions per pruspetives sustenibles.
Info: Museum Gherdëina, tel. al numer 0471 797554, info@museumgherdeina.it.