Manifestazions atuales speziales

Data

14 de mei 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes tla edizion dl 14 de mei
Isté cun la roda
Ince por chësc isté organisëia le Club dles Rodes Val Badia n isté sön la roda, por i mituns dai 6 ai 14 agn
Tratan l'isté imparon la tecnica, sciöch'al é da se comporté sön la roda te n gröm de situaziuns desvalies y an ne lascia nia demez le dever­timënt. An mët man ai 25 de ma dales 16:00 y an s'incunta a Badia sön la plaza dl lift da La Crusc, olach'al gnará fat i grups di mituns. An vá cun la roda vigni mertesc y jöbia cina ala fin d'agost. Tó pert pón debann, an mëss ma ester en regola cun le tesseramënt che costa 45,00€ por vigni möt/a y 15,00€ por un di geniturs. Cun le tesseramënt pón ciafé al cost de 60,00 € döta la mondur (cina che al é mosöres assá) da jí cun la roda cun malia da manies cörtes, braia cörta y malia da manies lunges. Por i mituns nüs vëgnel recordé che por fá le tesseramënt adoron: copia de na cherta d'identité, codesc fiscal, vijita dal dotur de familia cun ECG. I atlec bele scric ite l'ann passé mëss dé jö le zertificat dl dotur renové y paié ite la cuota por le tesseramënt dl ann 2021. Düc i mituns mëss avëi l'elm da jí cun la roda y i mituns ne dess nia gní cun na e-bike. Por plü infos él da cherdé sö Ilse al 338 7451577, do les 15:00.

De Internazional di Museums
Ai 16 de ma vëgnel metü a jí ince tl Museum Ladin ativités. Sëntes y ativités pón vijité debann
Vigni ann, dal 1977 incá, vëgnel festejé le De Internazional di Mu­seums; na ocajiun por düc canc da se dé jö cun aspec desvalis dl savëi y dla cultura. Ince le Museum Ladin Ciastel de Tor tol pert a chësta ini­ziativa. Por chësc ann, ince sce cun val' limitaziun, él odü dant ativités sides tla sënta da San Martin che a San Ciascian. Ai 16 de ma é les sëntes dl museum, sciöche ince les ativités metüdes a jí, da podëi vijité debann.
San Martin, 14:30 – Museum Ladin Ciastel de Tor
L'artist Manuel Riz nes cunta la storia y l'evoluziun dla cari­catöra. Le referat vëgn tigní tl salf dla mostra temporana »Depot. Y al é gnü la löm!«. La dorada é de zirca 45-60 menüc. Posć limitá y sön prenotaziun. Le referat gnará tut sö y sará da odëi sön le canal Youtube dl Museum dai 20 de ma inant. Orars de daurida: dales 14:00 ales 18:00.
San Ciascian, dales 10:00 y dales 11:00 – Museum Ladin Ursus ladinicus
Vijites menades por descurí la storia dles Dolomites y dla laurs di andri. La vijita döra zirca 45 menüc. Posć limitá y sön preno­taziun. Orars de daurida: dales 10:00 ales 18:00.
Por deplü informaziuns y preno­taziuns cherdé sö le nu­mer dl Museum Ladin Ciastel de Tor 0474 524062.

É mi möt ciamó normal, o adorel aiüt?
En mertesc ai 18 de ma dales 19:30 vëgnel tigní n referat online dal titul »Die Welt dreht sich anders – ist mein Kind noch normal? Oder braucht es trotzdem Hilfe?«
Le Sorvisc ai Jogn, adöm cun le Consëi de Formaziun de Badia, inviëia geniturs, inse­gnanc y interessá a tó pert al referat dal titul »Die Welt dreht sich anders – ist mein Kind noch normal? Oder braucht es trotzdem Hilfe?« cun la dra. Irene Berti, doturia spezia­lisada sön la psicoterapia cun mituns y jogn. En mertesc, ai 18 de ma dales 19:30 portarára dant infor­maziuns y respognará a domandes sön la tema­tica, tres la plataforma Zoom. Le link é https://zoom.us/j/94555508588. La serada é debann y al n'ó ester degöna preno­taziun.

»Armunia y balanz«
Chësc ie l titul de na mostra che ie da udëi dai 15 de mei nchin ai 12 de juni tla galaria Vijion a Puntives, ulache l mët ora i artisć Elisa Alberti, Mirijam Heiler, Flavio Senoner y Egon Digon
La mostra vën metuda a jì n cunlaurazion cun la fiera d'ert Art Karlsruhe, che ie unida desdita. Duta la galaries che ëssa fat pea ie nviedes a mustré tla galaria la opres che n ëssa presentà a Art Karlsruhe dai 20 ai 23 de mei 2021.
La paroles »Armunia y balanz« descrij n pert cie che lieia la maniera de lauré de chisc artisć. Te si lëures lùnel ora l urdenamënt y spustamënt de linies y formes geometriches, che porta a na cunzentrazion y ntensificazion dl cuntenut. Chësc stil ritmich ne n'ie nia regulà da repetizions steriles, ma l gëura la pusciblteies a variazions y desviazions. L juech de linies y formes che comunichea deberieda nes pieta manieres nueves de perzezions.
La mostra ie davierta da lunesc nchin sada, dala 4 nchin la 7 domesdì o nce cherdan su l 338 2098697.

»Recordanzes«, presentaziun online
La presentaziun dl liber »Recordanzes de vita de n om de scora« de Lois Ellecosta gnará tignida online, en sabeda ai 15 de ma dales 16:00 inant
Ara desplej che an ne pó nia fá sön paiun d'Al Plan la presentaziun dl liber »Recordanzes de vita de n om de scora« de Lois Ellecosta, desch'al ê bele gnü anunzié sön »La Usc di Ladins«. Chësc por ne mëte nia al prigo la segurté dla jënt te chësc tëmp dles ries coies.
Mo porchël vëgn la presentaziun fata te internet, le medemo de, ai 15 de ma 2021 dales 16:00 inant, sön le canal Youtube »Dr. Lois Ellecosta«. Na presentaziun plajora cun manco parores y cotan de cianté. Al sará 4 grups musicai dër conesciüs che portará dant cianties de auturs desvalis, dötes sön parores de Lois Ellecosta. Chësc program resta spo te internet sön le medem canal Youtube, sot al link https://www.youtube.com/channel/UCsgYm43d3Ht6PkeD857Kf1g 
Vignöna y vignun pó s'al ciaré canch'al ó sön so computer. Le liber sará spo da ciafé tles botëghes »Mascotte« y »Botëga dal Sauter« d'Al Plan, tla botëga de Richard Mutschlechner a Longega, te Istitut Ladin »Micurá de Rü« a San Martin y te dötes les libraries Athesia de Südtirol, al prisc de 25,00€.

Di nternaziunel di Museums
Doi dis de »Porta davierta« n sada y dumënia ai 15. y 16.05.2021
L Museum Gherdëina tla Cësa di Ladins a Urtijëi gëura inò si portes al publich cun doi dis de »Porta davierta« ai 15 y 16 de mei per festejé deberieda l »Di nternaziunel di Museums«.
Orar de giaurida: sada 15 de mei dala 14 ala 18 y dumënia 16 de mei dala 10 ala 18.
Tramedoi dis iel nce daviert la Bilbioteca Ladina cun mëises de libri. L vën pità vijites menedes per pitli y granc cun persones de cumpetënza per cunëscer da daujin i pec che sta plu a cuer!
La ntreda y la vijites menedes ie debant!
Chiche ulëssa possa nce resservé la vijita danora cherdan su l 0471 797554 o tres e-mail a info@museumgherdeina.it.
L team dl Museum Ve aspieta y se ncunforta sun vosta vijita!
Plu nfurmazions sun www.museumgherdeina.it