Manifestazions atuales speziales

Data

21 de mei 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes tla ediziun dl 21 de mei
»GO BACK« de Anneliese Pichler
Mostra te Tublà da Nives cun giaurida n vënderdi ai 28 de mei dala 6 da sëira
L tëmp dla stluta d'ublianza pervia dla pandemia dl Coronavirus ie passà y pudon finalmënter inò jì inant cun nosta atività, nce sce sambën cun la mesures de segurëza che l sarà da tenì ite y respeté. L program de mostres njenià ca ie scialdi nteressant y speron de pudëi l tré tres tl respet dla regules, ma dant­aldut per l bën di artisć y dla ueia de duc de pudëi viver la cultura y l'ert dal vif y n prejënza.
Se ncunferton sun l instà de mostres y de pudëi ve udëi y ancunté tl Tublà da Nives.
La prima mostra vën giaurida ai 28 de mei 2021 dala 6 da sëira. L meterà ora la artista Anneliese Pichler de Ciavalëis (TN).
Ëila ie jita a fé l Lizeum d'Ert privat a Milan. Tl 1982 àla studià »Affresco e pittura murale« tla academia da d'instà cun l pruf. G. Hoke, plu inant àla stlut ju cun mperic particuleres l'academia nternaziunela da d'instà »Hortus Niger« y la »Hoke Schule«, n iede a Verteneglio (Istria) y pona a Halbenrain (Austria). Ti ani do àla abù na cunlaurazion longia cun la galaria Hosp de Nassereith tl Tirol. Si opres ie unides metudes ora sun la »Art Innsbruck«, a Dornbirn (A) y a Karlsruhe (D). Ntan l 2013 àla fat pea pra la mostra »Eis und Glut« tl Haus Tyrol Europa a Bruxelles tres n proiet dla Euregio y pra la »Art Fiera Verona« arjunjan la senialazion per l »Premio Icona«.
La artista se dà ju mascimamënter cun dessëni y pitura a tecnica mescededa sun papier metù sun telé, ma nce cun obiec d'ert de de mëndra mesures, draps, colajes, scultures de »cartapesta« y de bront.
Tl ziclus »Go Back« va la artista de reviers per crì l'identità tl labirint dl ie. Se pierder per abiné inò la streda de viers de cësa. Uni cheder ie la cësa dl ie per n pitl mumënt y pona per for. ... scialdi plu giut ie l ne vester nia presënc y ne se recunëscer nia giut alalongia, per n tëmp da stramp lonch... Uni cheder descëida te mé la rëssa y la gheneda de si uriginalità, de chëla che ie ne me rendove ntant nia plu cont.
La ntroduzion artistica unirà fata da Elio Vanzo. Danterite sunerà Martin Holzknecht sun l marimba. Duc ie nviei.
Nfurmazions sot a www.tubladanives.it 

L Museum Gherdëina inò daviert regularmënter
Dal lunesc al vënderdi domesdì y dala fin de juni cun orar slungià
L Museum Gherdëina tla Cësa di Ladins a Urtijëi ie dal ultim fin dl'ena inò daviert regularmënter ai vijitadëures dal lunesc al vënderdi, for dala 2 nchin la 6 da sëira.
Dala fin de juni unirà l orar slargià ora dal lunesc ala sada, dala 10 nchin la 1 domesdì y dala 2 domesdì nchin la 6 da sëira.
Per vijites ora dl orar reguler y vijites menedes pòssen cherdé su danora l 0471 797554.
Nosta sales y la mesures de segurëza che on njinià ite, garantësc de pudëi fé na vijita tres l museum tl respet de duta la normatives anti-Covid.
Per jì ite tla mostra iel debujën de unì cun l CoronaPass y l mascherot FFP2.
L nes fej dassënn plajëi a pudëi ti presenté inò a nosc vijitadëures la culezions de marueia y de valor n con' dla stroia, l'ert y la richëzes naturalistiches de Gherdëina.
Deplù nfurmazions sun www.museumgherdeina.it

Sentì na cërta segurëza nce te tëmps nia segures
Referat cun l psicologh y psicoterapeut dr. Edmund Senoner
L KVW de Urtijëi nvieia n juebia ai 27 de mei dala 20:00 te sala de calonia a Urtijëi a unì a scuté su l referat cun l psicologh y psicoterapeut dr. Edmund Senoner, che rujenerà de »Stabilität auch in instabilen Zeiten erfahren«.
Melsegurëza, festide per l daunì y ne savëi nia co la pië, dut chësc nes vën ados di per di tres i media desferënc. Sciche reazion naturela iel – tëma. Per l prim iede tla storia dl'umanità cuer chësta tëma coche n slaier che n ne vëija nia, do y do, dut l mond. La situazion de stress unida a s'l dé, nes mët dan a na ndesfideda, la ie nce n gran pëis, che possa nes purté a ativism, nervojism, melsegurëza nchin a na paralisa persunela. Tl referat vëniel dat mpulsc coche pudon fé a sustenì nosta stabiltà psichica te tëmps de stress, acioche pudonse mpo avëi na vita de cualità.
Pra la sëira pòssel mé vester prejëntes 15 persones, les muessa avëi l »CoronaPass« y l mascherot FFP2. L ie da se nunzië danora nchin ai 26.05. cherdan su l 0471 796739 (do la 19:00).

Isté cun la roda
Ince por chësc isté organisëia le Club dles Rodes Val Badia n isté sön la roda por i mituns dai 6 ai 14 agn
Tratan l'isté imparon la tecnica, sciöch'al é da se comporté sön roda te n gröm de situaziuns desvalies y an ne lascia nia demez le devertimënt. An mët man ai 25 de ma dales 16:00 y an s'incunta a Badia sön la plaza dl lift da La Crusc, olach'al gnará fat i grups di mituns. An vá cun la roda vigni mertesc y jöbia cina ala fin d'agost. Tó pert pón debann, an mëss ma ester en regola cun le tesseramënt che costa 45,00 € por vigni möt/a y 15,00 € por un di geniturs. Cun le tesseramënt pón ciafé al cost de 60,00 € döta la mondur (cina che al é mosöres assá) da jí cun la roda cun malia da manies cörtes, braia cörta y malia da manies lunges. Por i mituns nüs vëgnel recordé che por fá le tesseramënt adoron: copia de na cherta d'identité, codesc fiscal, vijita dal dotur de familia cun ECG. I atlec bele scric ite l'ann passé mëss dé jö le zertificat dl dotur renové y paié ite la cuota por le tesseramënt dl ann 2021. Düc i mituns mëss avëi l'elm da jí cun la roda y i mituns ne dess nia gní cun na e-bike. Por plü infos él da cherdé sö Ilse al 338 7451577 (do les 15:00).