Manifestazions atuales speziales

Data

11 de jugn 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes tla ediziun dl 11 de jugn
Dolomites Bike Day
En sabeda ai 19 de jügn vëgnel metü da jí la cuarta ediziun dl Dolomites Bike Day
I jus de Ciaulunch, Falzares y Valparora sará i prota­gonisć dla cuarta ediziun dl Dolomites Bike Day, en program la sabeda ai 19 de jügn. Le percurs dl Dolo­mites Bike Day, a forma de anel, pëia ia dal'Alta Badia sura Ciaulunch cina a Reba y passa fora por i paisc de La Pli da Fodom y Cerna­doi. Da chiló van spo sön le ju de Falzares y Valparora por rové zoruch ti paisc dl'Alta Badia y stlü jö insciö la roda. Pié ia pon sambëgn ince dai paisc de Reba o La Pli y lascé le ju de Ciaulunch sciöche ultim. Le percurs á na lunghëza totala de 51 km cun n dislivel de 1.370 m. Dales 08:30 ales 14:30 gnaral en chësc de stlüt les strades al trafich mo­torisé, insciö da ti lascé lerch ales rodes y ti pité plü segurëza tres döt le percurs. Al vëgn aconsié da fá la roda en direziun antiorara. Düc i amanc dla roda é dër bel inviá da tó pert ala manife­staziun, a chëra che an ne mëss nia se scrí ite. La manifestaziun gnará tignida tl respet dles regoles preodüdes y i par­tezipanc é periá da mantigní les destanzes de segurëza y da se vistí le mascherot canche an ne é nia sön roda. Deplü informaziuns ciafon sön la plata internet www.dolomitesbikeday.it .

50 ani Lia per Natura y Usanzes
Festa duman sada ai 12.06. tla Cësa de Cultura a Urtijëi
La Lia per Natura y Usanzes nviea duc de cuer ala festa di 50 ani da canche l ie unì metù su la Lia.
La sarà duman sada ai 12 de juni 2021 tla Cësa de Cultura »Luis Trenker« a Urtijëi, dala 3 domesdì inant.
Per abelì la festa saràl leprò i balarins dla Grupa de Bal populer, la Lia dal guant dala gherdëina y Kevin Mauroner al tlavier.
Duc i prejënc muessa se tenì ala normes de segurëza scrites dant per l Coronavirus.

Mostra y prejentazion de Nadia Rungger
Duman sada ai 12.06. dala 18:00 tla sala dl Circolo/Lia Mostra d'Ert a Urtijëi sun Plaza S. Antone
La Lia Mostra d'Ert nvieia ala giaurida dla mostra »spielereien. collagen und gedichte«. L sunerà danterite, Anna Maria Parteli.
Crëps, sëur da canela y n pitl lën da odla: Nadia Rung­ger prejënta poejies y colajes te si prima mostra. La paroles y cosses ie te cuntesć nueves y chël che minon de savëi se muda cun si ntëurvia nuef. Cie pudons'a nëus mparé da n suiaman? Can ne sons'a nia cunzentrei? Cie sà pa la nëif de nëus? Nadia Rungger ­chier la respostes tl juech.
Nadia Rungger, *1998, ie chersciuda su te Gherdëina, la studieia rujeneda y lete­ratura tudëscia a Graz. Si cunties y poejies per tudësch y ladin ie unides premiedes y publichedes te zaites lete­reres. Tl 2020 àla publicà si prim liber.
Ntreda mé cun n green pass. L vën prià bel de resservé na lerch: tel. 377 5936350, info@circolol.eu .
La mostra ie da udëi nchin ai 27.06.2021, uni di dala 10:00-12:00 y 17:00-19:00.

3. edizion dl Saslonch Half Marathon
Duman sada ai 12 de juni 2021 sun Mont de Pana, S. Cristina
Duman sada pieràl via dala 8:30 i prim atlec, da Ciandevaves demez per sauté ntëur ala grupa de Saslonch, sun n percurs de 21 km cun n deslivel de 900 m.
Bën 600 atlec se à scrit ite, da 15 nazions y 52 regions dla Talia. I pierà via te grupes da 200, de viers dl Comici, ntëur Saslonch y Sasplat via y da Cunfin ora, cun i prim atlec che ruverà bele mpue do la 10:00 te travert.
L sarà leprò per l prim iede atlec coche Khalid Jbari dl Marocco ma da cësa urmei a Bulsan, Xavier Chevrier y Luca Cagnati, atlec d'elite dla Talia dl sauté da mont su, l trentin Stefano Gardener che ova venciù la ultima edizion, i atlec de cësa Georg Piazza, Daniele Felicetti y Luca Clara. Pra l'ëiles uderàn inò la favorita Petra Pircher, ma nce Edeltraud Thaler che ie for ruveda ti plaza­mënc plu dancà.
Pervia dla normes de segu­rëza iel da schivé amudla­mënc de jënt, ma dessegur saràl mpo mesun ti cialé ala garejeda y sustenì i atlec sun ëur dl percurs y cun la destanzes aldò.

»Erbes de Börz«: saus y curiosités dles erbes da munt
Ia por l'edema dai 19 ai 27 de jügn 2021 saral sön Börz da ciarcé derzades tles üties da munt y pié do te deplü manifestaziuns informaziuns desvalies söles erbes y saus
I corusc y la varieté di pra da munt i plej a tröpa jënt, mo tröc ne conësc nia plü i inoms y les proprietés de erbes, ciüfs y lëgns che crësc chiló da nos. Insciö él gnü ponsé al'edema "Erbes de Börz", cun jites menades y derzades che dess fá conësce les erbes da munt. I interessá podará tó pert a 3 ativités cun esperc dl setur, sciöche ince ciarcé les erbes ti taís pitá te bëgn 10 üties y restoranc a Antermëia/Börz y incëria. Deplü informaziuns ciafon pro la Cooperativa Turistica Al Plan-San Martin. Les iscriziuns por les ativités vëgn tutes sö cina le de denant (tres i ofizi dla Cooperativa Turistica).
21.06.21: I mituns descür la botanica
N domisdé por mituns, olache an pó imparé tres jüc fora por la natöra da mëte averda a döt ci che crësc en ur de tru. Orar: 15.00-17.00 – Antermëia
22.06.21 – Le pice lersc – n lëgn por le clima
Pro chësta ativité, ponsada suradöt por families, podaran jí adöm a n verdabosch fora por pra y bosć. Ala fin gnaral senté deboriada de pici lersc, por curí le öt lasce zoruch dai lëgns tomá tla tempesta Vaia. Orar: 9.30-13.00 – Pe de Börz
24.06.21 – La natöra che varësc
Adöm a na esperta de erbes coiarunse deplü erbes y ciüfs che an pó adoré te taís desvalis, mo ince sciöche medejina. Chiló gnaral ince mostré co podëi adoré les erbes y saurs, y les lauré inant canche ares é coiüdes. Orar: 15.00-17.00 – Börz