Manifestazions atuales speziales

Data

25 de jugn 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes tla edizion dl 25 de jugn
Marcia de Gherdëina
N dumënia ai 4 de lugio te Sëlva
La Lia di Ciambonfs fej al savëi cun legrëza che l vën inò metù a jì la marcia de Gherdëina te Sëlva, cun pië via y travert dala Plaza de Chemun nueva, ulache la Lia dajerà nce ora da maië y da bever.
L sarà inò mesun crì ora danter n percurs da 5 km o da 10 km, che va dut ntëur Sëlva y ulache l unirà, sun l percurs, nce metù su la lueges de restorazion.
L nvit da pert dla Lia di Ciambonfs ti va nce a duc chëi de Gherdëina de fé pea. Chël che unirà trat ite jirà a fin de bën.
Pië via pòssen danter la 8:00 y la 12:00 danmesdì y da ruvé iel nchin la 16:00.
Per fé pea pòssen se scrì ite al mumënt, mé la grupes muessa se nunzië nchin ai 01.07.2021.
Nfurmazions plu avisa giàpen da Oswin, tel. 335 6558633 o oswin.senoner@gmail.com, o scenó nce tla Lia dl Turism de Sëlva, tel. 0471 777900.

»Art and Textiles« – artisć de Lottozero
Ncuei 25 de juni dala 6 da sëira vëniel giaurì tla galaria Vijion a Puntives na mostra cun opres dl lauratuere dl drap Lottozero
Chësta mostra ie na bela ucajion per udëi la pusciblteies dl'ert cuntemporana, de lauré cun fil y drap. Tlo saràl da udëi plu manieres de lauré cun l drap tres scultura, fotografia, ceramica, nstalazion y pitura. I artisć che mët ora vën reprejentei y sustenii dal lauratuere dl drap Lottozero, che ie unì metù su da Arianna y Tessa Moroder, a Prato tl ann 2016. L à l fin de ti dé la puscibltà a chëi artisć che uel se dé ju cun l material fil o drap, de se studië ora tecniches, materiai o cunzec per si lëur. Tl'ert cuntemporana vëniel for inò tëut ca chësc material cun la particularità de vester na ert mujela, for n muvimënt.
Tla mostra iel da udëi lëures di artisć nternaziunei Roland Barth, Marie Ilse Bour­langes, Robin-Darius Dolatyari-Dolatdoust, Stefanie Kägi, Elena Khurtova, Claudia Losi, Anna M. Rose, Farkhondeh Shahroudi, Luca Vanello y Virginie Rebetez. Davierta resta la mostra nchin ai 04.08., da lunesc nchin sada danter la 4 y la 7 domesdì.

»Paredlé. Strutture convergenti«
Giaurida dla mostra de Christine Runggaldier n vënderdi ai 02.07 dala 20:30 tla sala dla Lia Mostra d'Ert a Urtijëi, Plaza S. Antone
Natura, minerei, macrocosmos y microcosmos, sortes de tieres y plantes, vëines sciche canai davierc a n mond plu grant, l fuià blanch y n ciapel de n fonch... Sce n ti cëla al repertore de formes te na pruspetiva plu lergia, pona se giàten ora plu culegamënc de chël che n se aspieta.
Christine Runggaldier prejënta si ultimi lëures de scultura, che tol ispirazion dal corp dla persona, pian via dal dedite. Tla pratica artistica de Runggaldier vën l nteres per la persona, che fej da for pert dla scultura, tratà a n livel plu sot, jan permez a organs, strutures desfrëntes y osc: duta chëla pertes che metudes adum, fej funziuné l organism. Stratificazions che n ne vëija nia a uedl, stabiles ma nce delicates, mostra su ponc de cuntat cun l mond dla plantes y la natura n generel.
La mostra vën acumpanieda da n test de Gabriele Salvaterra che fajerà nce la ntroduzion pra la giaurida.
La mostra sarà da udëi nchi ai 18.07.2021, uni di dala 10:00-12:00 y 17:00-19:00, de vënderdi y sada nce dala 20:00-22:00. Lunesc stlut.

Tublà da Nives: »dialogh« de Roland Perathoner
La giaurida dla mostra sarà n vënderdi ai 2 de lugio 2021 dala 6 da sëira
La lia culturela »Tublà da Nives« cëla de ti dé for inò la puscibltà ai artisć de Sëlva de mëter ora tl zënter culturel. Chëst ann ie l scultëur Roland Perathoner da Lech anjenià cun na mostra che à l titul »Dialogo«. Per chësta ucajion àn nce dat ora l catalogh curà tl aspet grafich da si fra Benno, cun tesć de Marco Forni.
Roland à fat la scola d'ert, da dedò iel jit pra n moster a Urtijëi y te Sëlva. Ël à fat pea pra de plu mostres culetives ti Paejes Tudësc, tl'Austria, Svizra, tl Colorado (USA). L à fat pea pra cuncorsc de scultura n ven­cian nce doi de chisc. Oradechël ie Roland stat per 10 ani ani sëurastant dla Lia per l artejanat artistich de Sëlva y 7 ani iel stat presidënt dl'Unika.
Pra la giaurida fajerà Marco Forni la ntroduzion artistica; danterite sunerà l duo »Moritz & Julian«. La mostra resterà davierta nchin ai 28.07., uni di dala 16 nchin ala 19, de du­mënia, merdi, mierculdi y vënderdi nce da sëira dala 20:30 nchin ala 22:00.

»Pentaklang«
Cunzert n juebia ai 1. de lugio dala 20:30 tla Cësa de Cultura a Urtijëi
Te chësc cunzert di Jëuni de Mujiga de Gher­dëina saràl da audì n ensemble de strumënc a fla, cun dut musicisć jëuni che ie tl lëur de se fé streda tl mond dla mujiga. Cun si ideies mujigheles frësces se provi de ntujiasmé for n majer publich per la mujiga di cuintec de strumënc a fla tipics de Viena.
Dl cuintet metù su tl 2014 tla Università privata de Mujiga y Ert de Viena, féjel pert Eva-Maria Frandl (flaut), Felix Hagn (oboe), Andreas Stocker (fagot), Max Pichler (corn) y Andrea Götsch (tlarinet).
Andrea Götsch, na jëuna dl 1994 de Lana, ie leprò pra chësc cuintet bele dal scumen­ciamënt incà. L talënt jëunn de mujiga de Südtirol à pudù pië do plu pesć y nce suné pea cun plu urchestres. Dan doi ani iela unida tëuta su pra i Wiener Philharmoniker.
Cun l »Quintett Geknister« lascerà l ensemble Pentaklang audì a Urtijëi n progam drët liegher y da vivanda.

»Poetry slam« tl Museum Ladin
Set auturies y auturs ladins lasciará aldí sü pinsiers, en sabeda ai 26 de jügn dales 17:00, tla curt dl Ciastel de Tor a San Martin
En sabeda ai 26 de jügn mët a jí le Museum Ladin Ciastel de Tor, en colauraziun cun l'Union di Ladins de Gherdëina y cun la partezipaziun dla Uniun Ladins Val Badia, n poetry slam tla curt dl ciastel. Dales 17:00 sarál 7 auturies y auturs che nes lasciará aldí sü pinsiers: Rut Bernardi, Antonietta Crepaz, Stefen dell'Antonio, Simon Kostner, Silvia Murer, Nadia Rungger y Daniel Zardini. Martina Iori fistidiará por l'acompagnamënt musical.
I posć é limitá y al vëgn damané do le greenpass o n zertificat de n test negatif. Por prenotaziuns cherdé sö le numer 0474 524062 o scrí ala misciun info@museumladin.it . Sce al ess da ester bur' tëmp, vëgn la manifestaziun desdita.