Manifestazions atuales speziales

Data

09 de messel 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes tla ediziun dl 09 de messel
»Somonzes«
Cërtl cultural de ert, leteratöra y musiga tles Cupoles tl zënter d’La Pli de Mareo, sön iniziativa dl’EPL – Ert por i Ladins y cun le sostëgn finanziar da pert dl Assessorat Ladin dla Provinzia da Balsan, dai 16 de messé ai 12 d’agost 2021
Ince La Pli s’arjigna ales manife­staziuns culturales da d’isté, söl moto »somonzes«.
9 artistes / artisć mët fora
Tles döes cupoles (döes de gran tëndes a forma de cops) mostra deplü artistes y artisć dla Val Badia sü laurs te mostres personales che döra otedé porom: Mattia Maldonado, Margareth Forer, Davide Brandlechner, Jutta Valentini, Helmut Pizzinini, Giulia Bortolini, Georg Erlacher, Irina Tavella y Gabriele Grones sciöche »artist ghest«.
4 staziuns leterares
Cater é les manifestaziuns leterares preodüdes tratan le mëis de »somonzes«: la manitée dedicada a »Les Ëres de Fanis« dla scrituria südtiroleja Anita Pichler (te trëi lingac) en domënia ai 18 de messé dales 10:00, la premiaziun dla IX ediziun dl Pest de poesies Angelo Trebo en vëndres ai 23 de messé dales 18:00, la letöra cun auturies y auturs dla Ladinia en jöbia ai 29 de messé dales 18:00 y la serada dedicada al epos »Das Fanneslied« de Karl Staudacher en mercui ai 4 d’agost dales 21:00.
»Musiga ladina te plaza« cun mostra »Ert de ciasa«
En vëndres ai 6 d’agost 2021 dales 18:00 se mostrará i artisć dl tëmp lëde y les ëres creatives de Mareo cun sü laurs tradizionai, dlungia a chësta mostra y le marcé portará dant dales 20:00 inant sis grups de ciantauturs y ciantau­turies dales vals ladines sües cianties originales.
La daurida ofiziala de döt le cërtl cultural »somonzes« é söl program te otedé, en vëndres ai 16-07 dales 18:00 tles Cupoles a La Pli.
L’azes ales manifestaziuns gareta cun le »green pass« y tl respet dles regoles anti-covid atuales!

La Bira te Fascia
L’event se sparpagna fora con desvalives apuntamenc sul tegnir de Ciampedel dai 15 ai 23 de messèl
Chest istà se pel endò endrezèr vèlch event e ence »La Bira te Fascia« se à enjignà. Tel respet de la precauzions chest an no sarà l gran Festival te tendon de Ischia, che con la limitazions anti Covid fossa senester da gestir, ma na lingia de evenc, sparpagné fora dai 15 ai 23 de messèl te lesc desferenc sul tegnir del comun de Ciampedel, per viver na esperienza che conjobia la bira col teater, la natura e la cojina. Chest event vegn endrezà en colaborazion con la sociazion Comunicarea, l’Apt de Fascia e l Comitat manifestazions de Ciampedel.
En jebia ai 15 – La bira te utia
Da les 19.30 al Refuge Micheluzzi cena con degustazion e abinament anter bira artejanèla e magnères da mont con l’espert Renato Nesi. Prenotazions al 334 5023878.
En vender ai 16 – A spas co na bira
Da les 11.00 te Val Duron taca la raida con degustazion vidèda de bires da mont e prodoc de Fascia. Se cogn se prenotèr a: labiratefascia@gmail.com.
En domenia ai 18 – Cena co la bires de Fascia
Da les 19.00 al Rampeèr, ostaria e laboratorie da birèr de Ciampedel (strèda Dolomites 24) bires artejanèles de Fascia e rezetes da mont. Info e prenotazions a rampeerdolomiti@gmail.com o al 339 4033901.
Se jirà inant ai 22 de messèl te tendon de Ischia da les 21.00 con »L gran spetacol de la bira« de e con Renato Nesi e Stefano Santomauro, musega de Filippo Chiocchetti e ai 23 con »A spas co na bira« sun Duron.
Info: www.labiratefascia.com.

Na munt de emoziuns
Alpinisć conesciüs a livel internazional cuntará de sües esperiënzes tles munts
La seria de referac cun i alpinisć y personaji liá ales munts dal titul »Na munt de emoziuns« vëgn organisada ince chësc isté tl’Alta Badia. Le pröm apuntamënt vëgn tigní en lönesc ai 12 de messé dales 21:15 tl salf dles manife­staziuns a La Val adöm cun Maurizio Giordani. Te so referat »Le mie montagne« cunta Giordani de sües aventöres sön pizes manco conesciüdes. Ai 26 de messé sarál Ezio Marlier che cunta tratan la serada »Free way« dla liberté da podëi chirí fora süa strada sides tl alpinism sciöche ince tla vita da vigni de. L’incuntada é preodüda tl salf dles manifestaziuns da San Ciascian dales 21:15.
Simone Moro y süa spediziun plü prigorosa
Ai 6 d’agost podarán tó pert al’incuntada cun Simone Moro, che cunta dla spediziun plü prigorosa de süa vita sön la munt Gasherbrum. L’incuntada vëgn tignida dales 10:30 tl pre sura la staziun a munt dl lift »La Crusc1«. Ai 23 de agost dales 21:15 gnarál presenté tl salf dles manifestaziuns da San Ciascian le proiet »Arrampicande«.
David Niederkofler y sü 11.000 km söla roda
La iniziativa vá a piz ai 6 de setëmber cun l’incuntada adöm cun David Niederkofler, che á arjunt le ciamp basa dl Everest cun süa roda, do 11.000 km. Chësc apuntamënt vëgn tigní tl salf dles manifestaziuns da Corvara dales 21:00.
Dötes les serades é por talian, adinfora dl’ultima incuntada che gnará tignida por todësch. Döt gareta tl respet dles regoles preodüdes.

Vins alaleria
Degustaziun di mius vins de Südtirol amesa la natöra
Do le suzes dl ultim ann vëgnel metü a jí ince en chësc isté l’iniziativa »Vins alaleria«. En ocajiun di nü apuntamënc söl program da messé cina setëmber á i partezipanc la posci­bilité da ciarcé i mius vins de Südtirol adöm cun n sommelier che ti spliga les carateristiches di vins amesa na contrada particolara.
Vigni apuntamënt é dediché a na tematica particolara sciöche i vins blanc, cöci, spumanc, i vins biologics y biodinamics, i vins duc y pro un n apuntamënt gnará la degustaziun de vins acompagnada da ciajos. Implü sarál un n apuntamënt dediché ai destilá y un al gin. Por tó pert ala manifestaziun mësson se scrí ite ti ofizi turistics dl’Alta Badia, olache an ciafa le program cun dötes les informaziuns. Le pröm apuntamënt vëgn tigní ai 16 de messé a La Crusc dales 14:30. L’iniziativa vëgn metüda a jí da Alta Badia Brand en colaboraziun cun le Consorz di vins de Südtirol y l’Uniun di Sommelier de Südtirol, tl respet dles regoles preodüdes.

N trio baroch da energia
Le festival »Badiamusica« deura la sajun musicala cun »Vallerotonda & I Bassifondi« – musiga baroca dl 17. y 18. secul
En jöbia ai 15 de messé mët man ofizialmënter le festival »Badiamusica«. Dales 21:15 sarál da aldí tl salf dles mani­festaziuns da Corvara n con­zert de musiga baroca cun »Valle­rotonda & I Bassi­fondi« – trio baroch metü adöm da Simone Vallerotonda (liut, chitara baroca, direziun), Gabriele Miracle (percu­sciuns) y Stefano Todarellio (stromënc tradizionai).
L’ensemble portará dant musiga dl 17. y 18. secul, sot al titul »Roma ’600«, olache ai esplorëia i aspec popolars presënc tla musiga romana. Al sará da aldí operes de Hieronymus Kapsberger, Ferdinando Valdambrini, Giovanni Paolo Foscarini, Athanasius Kircher y d’atri.

Presentaziuns de libri por mituns
Sot al titul »Il libro nella roccia« vëgnel metü a jí fora por l’isté deplü presentaziuns de libri cun n laboratore didatich por mituns, tl zënter di paisc dl’Alta Badia
Ince chësc isté vëgnel tigní tl’Alta Badia la iniziativa »Il libro nella roccia«, dedicada ai libri por mituns.
La seria de incuntades, che é caraterisada dal tema »Scatola delle meraviglie«, mët man le vëndres ai 16 de messé pro le paiun a La Ila. Te chësta ocajiun vëgnel presenté le liber »Per un pugno di ghiande« de Papik Genovesi y Sandro Natalini. Tratan le laboratore podará i mituns porvé fora l’ativité de »scribing«.
»Banksy« cun Fausto Gilberti
Ai 13 d’agost sarál l’autur Fausto Gilberti che presentëia so liber »Banksy« y le laboratore sará dediché a operes d’ert conesciüdes. La presentaziun vëgn tignida pro le paiun tl zënter da Corvara.
Mile ciases, mile stories
En ocajiun dl ultim apun­tamënt, le lönesc ai 23 d’agost a San Ciascian, vëgnel presenté le liber »Mille case, mille storie« de Mauro Bellei. Tratan le laboratore gnarál pastelné na skyline cherian ciases de vigni sort. Düc trëi i apuntamënc mët man dales 17:00
La iniziativa »Il libro nella roccia« é gnüda  ideada da Orietta Berlanda y vëgn metüda a jí dal’Assoziaziun Turistica Alta Badia. Por tó pert ales incuntades mësson se prenoté pro un di ofizi turistics dl’Alta Badia al prisc de 5,00€. Les incuntades vëgn tignides tl respet dles regoles preodüdes.

Cujiné te ütia
Tratan la sajun da d’isté vëgnel metü a jí deplü manifestaziuns liades ala gastronomia. Öna de chëstes é »Cujiné te ütia«
Ara se trata de n curs da cujiné, che vëgn tigní tles üties dl’Alta Badia a 2.000m. Le cogo dla ütia presentará na rezeta de na spezialité tradizionala, mostran la preparaziun dl taí a vigni partezipant, che á la poscibilité da cujiné y arjigné ca instës so taí. Le pröm apuntamënt é preodü por le mertesc ai 13 de messé tla ütia de Bioch, olache an pó imparé da fá i cajincí t’ega. La manifestaziun gnará ciamó metüda a jí ai 3 de agost pro la ütia de Bioch y ai 27 de messé y ai 24 d’agost por la ütia »I Tablá«, olache al ti gnará insigné ai partezipanc da fá bales da spinot. Le curs mët man tres dales 14:30. An mëss se scrí ite anter le de denant ti ofizi turistics dl’Alta Badia. L’iniziativa vëgn metüda a jí tl respet dles regoles preodüdes.

»Dolomites Yoga Days«
Dai 15 ai 18 de messé vëgnel metü a ji tl’Alta Badia n program cun deplü workshops y cursc de yoga por prinzipianc y progredis
L’insegnant Egon Castlunger da La Ila mostrará les ativités focalisan sön les posiziuns fisiches, la dërta respiraziun y la pert meditativa dl yoga. La jöbia ai 15.07. dales 10:00 vëgnel presenté le program, tl pre dlungia l’implant »Gardenaccia« a La Ila. Te chësta ocajiun gnarál ince mostré le tecniches prinzipales dl »hatha yoga«. Le vëndres ai 16.07., do na cörta escurjiun che pëia ia dales 10:00 dala staziun a munt dl implant »La Crusc1«, vëgnel tigní na leziun defora dedicada al »pranayama« y ala medi­taziun. La sabeda é le »Asana Flow« protagonist dla leziun pro la ütia Planfistí sura Ciaulunch, che mët man do na cörta spazierada che pëia ia dales 10:00 dal ju de Ciaulunch. I »Dolomites Yoga Days« vá a piz la domënia ai 18.07. cun na sesciun completa de yoga al Sas Dlacia. An s’incunta dales 10:00 tla plaza da parché dl Sciaré por jí a pe cina al Sas Dlacia. Iscriziuns ti ofizi turistics dl’Alta Badia anter le de denant. I »Dolomites Yoga Days« gnará ciamó tignis n iade d’agost y n iade de setëmber. La manifestaziun vëgn metüda a jí tl respet dles regoles preodüdes.

Inauguraziun de SMACH a Picolin
En sabeda ai 10 de messé vëgnel inauguré la cuinta ediziun dla mostra internazionala alaleria SMACH tla Ciasa dl Maier a Picolin
La cuinta ediziun de SMACH, mostra alaleria de Land Art, che á sciöche tema »FRAGILE«, vëgn inaugurada en sabeda ai 10 de messé dales 18:00 tla Ciasa dl Maier a Picolin.
La mostra gnará presentada dai organisadus dla manifestaziun, Michael Moling, Gustav Willeit y Katharina Moling. Ala inauguraziun sarál ince le mëmber dla iuria y curadú dla mostra MET de New York, Guus van den Hout. Le Dj Set Veloziped se cruziará dla cornisc musicala y la Uniun dles Patrones da San Martin tenará sö n bun aperitif ladin. Les 10 operes de SMACH, é gnüdes metüdes  fora ti comuns da San Martin, Mareo, La Val y Badia y an podará jí a ti ciaré fajon n percus a anel dla dorada de trëi dis, cun la poscibilité da sté suranöt te ütia.
Les operes sará da odëi cina ai 12 de setëmber 2021.

L Itiosaur de Secëda revenësc virtualmënter
L’atrazion nueva tl Museum Gherdëina: la Virtual Reality (VR) lascia revenì virtualmënter l gran saur, da mez lugio inant
Per plu de 100 milions de ani à n tier, nchin a 10 metri lonch, mez pësc y mez lingiola, duminà l mer preistorich de Tethys ne lascian tan che deguna fusties. I sëui resć de chësc gran saur dl mer ntan l tëmp dl Ladinicum ie unic abinei dl 1968 sun Secëda. Śën ie chësta criatura revenida y chël tla forma de na »virtual reality« che ti vën piteda ai vijitadëures dl Museum Gherdëina a Urtijëi da mez lugio inant.
La Realtà Virtuela dl itiosaur y si habitat tl mer primurdiel Tethys ie da sperimenté l prim di debant n ucajion dl di dla porta davierta n vënderdi ai 16.07. dala 14:00 nchin la 20:00. Per dé spligazions saràl presënt l paleontologh Andrea Tintori.
Per fé l’esperienza virtuela vëniel cunsià de se nuté su danora tl Museum Gherdëina, tel. 0471 797554.
Info: www.museumgherdeina.it, mail: info@museumgherdeina.it

Se scrì ite al FC Gherdëina
Duc i nteressei a fé pea possa śën se scrì ite
L FC Gherdëina fej al savëi che duc i nteressei, mutons y mutans nasciui dan l 2015, che ulëssa gën pratiché l sport dl juech dala codla ie nviei a se lascé scrì ite pra l club.
La iscrizions ie da fé online. N à mé drë de jì ite sun la homepage dl club www.fc-gherdeina.com (FC Gherdëina Ein­schreibungen), ulache l ie pona da scrì ora l for­muler de iscrizion y vëija nce tant che l ie da paië ite y coche l ie da paië ite l cuntribut de iscrizion.
Per plu nfurmazions pòssen nce cherdé su Christof Rifes­ser, al numer 370 7003788.

Festa 50 agn Crusc Blancia Alta Badia
La Crusc Blancia Alta Badia inviëia düc sü volontars ala festa de 50 agn che vëgn tignida ai 31 de messé 2021 a Badia
Te chësta ocajiun vëgnel presenté le liber cun la storia dla seziun y so svilup dal mëteman cina aldedaincö. La seziun Alta Badia é gnüda metüda sö sciöche cuinta seziun dla provinzia ai 10.12.1970. Cun le passé di agn s’á la forma­ziun mioré tres deplü y la seziun se á svi­lupé a na seziun de bëgn 70 volontars. Por rengrazié dl impëgn fat Ves inviëia la Crusc Blancia Alta Badia a tó pert ala festa ai 31 de messé dales 17:00 a Badia. Al Ves aspeta na sëra plëna de recorc, na bela compagnia y n pice renfrësch acompagné dal grup musical »Lu&Me«. Speran da podëi Ves saludé, Ves periunse por motifs organisatifs da confermé Osta presënza tres la e-mail: altabadia.dl@)wk-cb.bz.it (azes ala festa cun green-pass)