Manifestazions atuales speziales

Data

16 de messel 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes tla edizion dl 16 de messel
»Bach y la Talia«
Ismaele Gatti lascia aldí sön l'orghe de Badia operes de Johann Sebastian Bach
Le festival »Badiamusica« vá inant en lönesc ai 19 de messé dales 21:15 te dlijia de Badia, olache Ismaele Gatti lasciará ringhiní sön l'orghe de Badia operes de Johann Sebastian Bach. Le titul dl conzert é »Bach & Italy«. Cun i toc che gnará portá dant, ón mostré sö la gran influënza che la musiga taliana y sü componisć á albü sön le stil de Bach. Le program vëgn daurí cun le »Toccata, adagio e fuga« en c – dur, partida ite te trëi perts, ci che é n sëgn dl'influënza dl conzert ala taliana. Dedô gnarál soné la »Fuga in do minore su tema di Legrenzi«, por jí inant cun la ultima dles sis »Trisonates« realisades da Bach por le möt W. Friedemann. Le conzert vëgn stlüt jö cun le »Preludio e fuga« en d – dur.
L'orghelist Ismaele Gatti é nasciü dl 1998 a Como. Al á soné sön paladines tlaianes y sura­confin, sciöche solist o mëmber de ensëmbli o orchestres; dl 2019 ál davagné dl 2. pest pro le »Gottfried Silbermann Orgelwettbewerb« da Freiburg.

Tango y nia ma
Le festival »Badiamusica« pîta en mertesc ai 20 de messé le conzert »Tango y algo más«, sön paiun da San Martin
En mertesc ai 20 de messé dales 21:00 vëgnel pité sön paiun da San Martin de Tor le conzert »Tango y algo más«, che fej pert dl festival Badiamusica. Interprec dla serada é le duo »Vis à vis«, metü adöm da Sabino Gabriele Monterisi al saxofon y Sara Promberger (chersciüda sö tla Val Badia) al clavier.
La pröma pert dl conzert é dedicada al repertore original por saxofon. Le repertore vá da auturs classics sciöche Demersseman, por rové a chi plü moderns (Smith) y con­temporans (Iturralde) passan fora por deplü stils musicai. La secunda pert dl conzert é dedicada deplëgn al componist italo – argentin Astor Piazzolla, che é conesciü sura döt le monn por sü tanghi. Al vëgn porté dant n valgügn de sü toc plü rapresentatifs, aranjá por saxofon sopran/cuntralt y clavier.

Musiga de Mozart cun »Passo Avanti«
La Ciasa Runcher a Badia ospitëia en vëndres ai 23 de messé dales 21:15 n conzert dl cuartet »Passo Avanti«
»Bach ess albü gran ligrëza cun Passo Avanti, de chël sunse sigüsc«, él da aldí te reportajes de BR Klassik y NRD Kultur, che lalda le cuartet por la »müda di parameters musicai de toc esistënc te na novité y al vëgn fora n moscedoz ezitant danter musiga classica y jazz. Les metamorfoses é da umor y riches d'idees. Imprömadedöt vëgnel le devertimënt dl'aranjamënt y dl'improvisaziun y chësc se reporta sön chi che ascuta sö.«
Sëgn pón aldí chësc cuartet ince tla Val Badia, tla cornisc dl festival Badiamusica. L'apun­tamënt é por en vëndres ai 23 de messé dales 21:15, tla Ciasa Runcher a Badia. Le cuartet é nasciü dl 2011 y é metü adöm da Alexander von Hagke (clarinet, fabló), Julia Bassler (vidora), Lucas Campara Diniz (chitara) y Eugen Bazijan (violoncello). Ai portará dant operes de W. A. Mozart, Leopold Mozart y dl sonadú A. von Hagke.

Jöbia de Corvara
Aperitif cun l'ert ladina. Pröm apuntamënt ai 22 de messé
La Jöbia de Corvara de chësc isté sará dedicada deplëgn al'ert ladina. En ocajiun di dui apuntamënc preodüs sarál deplü artisć locai che presentëia sües operes d'ert, che sona o cianta melodies locales y che lî dant poesies. N domisdé rich de ert, te chël che an pó se gode n bun aperitif ti locai dl zënter de Corvara – stlüt al trafich dales 16:00 ales 22:30.
Pro le pröm apuntamënt ai 22 de messé podarán ascuté sö les poesies de Christian Ferdigg d'Al Plan y tó pert a n jüch de domanda y resposta cun Simon Kostner. Le duo »Gota Music« da La Val fistidiëia dl intratignimënt musical, l'artejan Hubert Pezzei da Lungiarü mostra l'ert dl ziplé le lëgn y le jonn Manuel Crazzolara da La Ila dessignará söl post retrac y caricatöres. La manifestaziun vëgn tignida dales 16:00 ales 19:30 y gnará metüda a jí ciamó n iade ai 19 d'agost, tres tl respet dles regoles preodüdes.

Joegn de Mendranza e Musega Jazz
Sie conzerc de calità sa mont e da sera l'enconter con i artisć a La Grenz. Ai 18 sun Ciampedie Fabrizio Bosso & Julian Oliver Mazzariello
Taca na neva edizion de l'aprijièda rassegna JMMJ, endrezèda da La Grenz col sostegn del Comun general, la Region Trentin-Sudtirol e la PAT. I conzerc é a l'averta da les 11.00 inantmesdì e da les 21.00 se pel tor pèrt ai encontres coi artisć a La Grenz de Moena prenotan a infolagrenz@gmail.com.
En domenia ai 18 de messèl sun Ciampedie i ghesć spezièi Fabrizio Bosso & Julian Oliver Mazzariello »Tandem«. Fabrizio a la tombra e Julian al pianofort con gran sintonia i ge dèsc lèrga a sia ledeza espressiva con standard USA, cianzon de la Tèlia, Brasil, temes de film, ballad che ciapa ite l publich.
Se jirà inant en domenia ai 25 de messèl a El Mas de Moena con la ciantarina de Mareo Anita Obwegs e sia band.

N spetacol... a duta bira!
»La Bira te Fascia« sporc apuntamenc degustatives anter natura, bon magnèr e teater
Te sie program spezièl studià fora per chest an la sociazion ComunicArea col sostegn de APT de Fascia e Comitat mani­festazions de Ciampedel sporc esperienzes senso­rièles e degustatives de­sfe­rentes.
En domenia ai 18 – Cena co la bires de Fascia
Da les 19.00 al Rampeèr, osta­ria e laboratorie da birèr de Ciampedel (strè­da Dolomites 24) bires artejanèles de Fascia e rezetes da mont. Prenota­zions: rampeerdolomiti@gmail.com o al 339 4033901.
En jebia ai 22 - La bira a teater
Da les 21.00 te tendon de Ischia »L gran spetacol de la bira« teater sensorièl con Stefano Santomauro e Renato Nesi, compagnament a la chitara de Filippo Chiocchetti. Se pel ite debant fin canche l'é post.
En vender ai 23 – A spas co na bira
Da les 11.00 te Val Duron taca la raida con degustazion vidèda de bires da mont e prodoc de Fascia. Se cogn prenotèr a: labiratefascia@gmail.com.
Info: www.labiratefascia.com.

Poesies söl lech
Ai 21 de messé vëgnel presenté pro le Lech da Sompunt le liber nü de Elisabeth Oberbacher
La maestra en ponsiun Elisabeth Oberbacher da Corvara á publiché en chësc ann so secundo liber de poesies, che porta le titul »Gotes d'ergobando«. Ara se trata de na racoiüda cun 65 componimënc olache ara nen vá de esperiënzes, sentimënc y emoziuns. Le liber é gnü dé fora tres l'Istitut Ladin Micurá de Rü y ti vëgn sëgn presenté al publich. L'apuntamënt é por en mercui ai 21 de messé dales 17:00, pro le Lech da Sompunt a Badia. La cornisc musicala vëgn pitada dal duo »Gota Music«.

Nos dales bales
La manifestaziun vëgn ince chësc isté organisada sot a forma de »roda dles bales« tl paisc de Badia
En mertesc ai 20 de messé pón ji a pe o cun la roda do a n percurs che liëia les strotöres che tol pert ala manifestaziun y che arjigna ca por l'ocajiun bales te dötes sües variaziuns. La manifestaziun vëgn tignida dales 12:00 ales 17:00 y an podará storje pro ti hotí »San Leonardo, Miraval, Gran Ander, Gardenazza, Pension Rungg y Ustaria Posta« a ciarcé les bales sarades, y pro la pastizeria »I Dolci di Ricky« y i hotí »Cavallino« y »Melodia del Bosco« a mangé les bales duces. Pro vigni variaziun de bala gnarál aconsié dal ostí n bun gote de vin. La manifestaziun vëgn abelida dal grup musical »Pippi's Friends« y Mattia Demetz. Implü pón dales 13:00 vijité le parch dai cerf a Sompunt adöm cun Lukas y dales 14:00 ales 16:00 podarán imparé deplü sön les erbes aromatiches cun Helga tla localité Murin. Por tó pert ala manifestaziun n'ól ester degüna prenotaziun y an pó cumpré les derzades diretamënter pro i eserzizi che tol pert. La manifestaziun vëgn metüda a jí tl respet dles regoles preodüdes.

»The Q Project« n unëur di Queen
Cunzert n sada ai 24.07 dala 20:30 (sce l ie bur' tëmp ai 31.07.) sun Plaza S. Durich a Urtijëi
La Lia Mostra d'Ert prejënta »The Q Project«, na grupa nueva, che ie unida metuda su tl 2020 coche hommage ala band de mujiga rock nglëija »Queen«. La particularità de »The Q Project« ie che duc i musicisć ie de Gherdëina y à bele esperienza tl ciamp dla mujiga. L se trata de: Jenni Perathoner prima ciantarina; Stefan Demetz, segondo ciantarin y chitara, Tobias Dellago bas, Günther Demetz chitara eletrica, Simon Rabanser tlavier y keyboard, Samuel Walpoth bateria, Carmen Pancheri, Nicol Senoner y Renate Senoner cor.
La »TQP« band ne nterpretea nia da nuef la cianties urigineles, ma ulëssa plu che auter tres l suné y cianté dl cover, ti scinché respet ala lijënda de mujiga di »Queen«. L'emuzion dla mujiga ti va l plu daujin puscibl ala maniera de suné live di »Queen«, che se desferenzieia scialdi da chëla de n studio. Ai 24 de lugio festejea »The Q Project« si debut y se ncunforta a prejenté la cianties cunesciudes y amedes da trueps. Ntreda debant y cun Green Pass

»Di dla porta davierta« tl Museum Gherdëina
Ncuei vënderdi, 16.07. dala 14:00 nchin la 20:00, cun l'atrazion nueva, da udëi per l prim iede: la »Virtual Reality« lascia revenì virtualmënter l Itiosaur de Secëda
Per plu de 100 milions de ani à n tier, nchin a 10 metri lonch, mez pësc y mez lingiola, duminà l mer preistorich de Tethys ne lascian tan che deguna fusties. I sëui resć de chësc gran saur dl mer ntan l tëmp dl Ladinicum ie unic abinei tl 1968 sun Secëda. Śën ie chësta criatura revenida y chël tla forma de na »virtual reality« che ti vën piteda ai vijitadëures dl Museum Gherdëina a Urtijëi da mez lugio inant. La Realtà Virtuela dl itiosaur y si habitat tl mer primurdiel Tethys ie da sperimenté l prim di debant n ucajion dl di dla porta davierta ncuei vënderdi ai 16.07. dala 14:00 nchin la 20:00. Per dé spligazions saràl presënt l paleontologh Andrea Tintori y nce i scuvridëures Johann Compoj y Meinhard Strobl.
Per fé l'esperienza virtuela vëniel cunsià de se nuté su danora tl Museum Gher­dëina, tel. 0471 797554.
Info: www.museum gherdeina.it, mail: info@museumgherdeina.it.

»Belvedere« de Ulrich Egger
La Lia Mostra d'Ert/Circolo nvieia ala giaurida dla mostra n vënderdi ai 23.07. dala 19:00 a Urtijëi sun Plaza S. Antone
La ntroduzion ala mostra unirà fata da Hermann Josef Runggaldier.
Cun n uedl rebel lascia Egger udëi tan zite che ie nosc mond materiel. I lëures mostra su na pruspetiva nueva dl ambient che se à mudà y dassëssa ti dé na scasseda al'umanità, acioche la se rënde cont che l ie zeche che ne va nia sun chësc mond!
L artist se dà ju cun l svilup dl turism y ce cunflic y mudamënc che l vën a s'l dé coche resultat. Si opres d'ert mostra su realteies che fej pensé do. L se dà ju cun la nterazion danter forma, material, lerch y fotografia. Tla fotografia à Egger abinà n mesun che ti dà la puscibltà de mudé ora materiai desfrënc da chëi tla realtà.
La mostra sarà da udëi nchin ai 8 d'agost, da merdi nchin juebia, dala 16:00-20:00 y de vënderdi, sada y dumënia dala 16:00 ala 22:00. De lunesc iela stluta.

Sonns tla natöra
Incuntades de meditaziun y relassamënt cun i sonns dl gong amesa la natöra da La Crusc. Ai 19 de messé y ai 9 d'agost.
Chësc isté gnarál metü a jí dui apuntamënc de meditaziun y relassamënt acompagná dal sonn dl gong, tla bela culissa amesa la natöra sö La Crusc a Badia. Ara se trata de na sesciun de massaje dl sonn tres le stromënt dl gong, dles ciampanes tibetanes y de d'atri stromënc, che porta i partezipanc te na fasa de meditaziun y relassamënt. Na bona ocajiun por se tó tëmp por se instësc y passé n danmisdé alaleria amesa la natöra. Le pröm apuntamënt é söl program en lönesc ai 19 de messé pro la staziun a munt dl lift »La Crusc1«. La incuntada mët man dales 11:00 y döra apresciapüch n'ora. L'apuntamënt cun i »Sonns tla natöra« gnará ciamó metü a jí n iade le lönesc ai 9 d'agost. Les prenotaziuns al cost de 10,00€ é da fá ti ofizi turistics dl'Alta Badia anter le de denant. L'iniziativa vëgn metüda a jí tl respet dles regoles preodüdes.

Ert tla cuntredes de Gudon
Chësta dumënia ai 18 de lugio dala 10 danmesdì nchin la 7 da sëira
Sot al titul »Kulturmeile Gufidaun« vëniel metù a jì per l cuarto iede la manifestazion d'ert tres la cuntredes y ti frabicac storics de Gudon. Amanc dla cultura y dl'ert ie nviei a passé n di ulache n possa viver da daujin l'ert dla pitura, scultura, dla fotografia, y danter l auter nce ti cialé pro ai artisć pra si lëur, dut adum acumpanià da de bela mujiga.
I artisć che fej pea ie: Viola Poschenrieder-Schink, Fabian Dalpiaz, Roland Moroder, Harald Schmalzl, Ernst Müller, Sonya Hofer, Elisabeth Frei, Lothar Dellago, Otto Piazza, Andy Geier, Helga Kasseroler, Edith Insam, Hans Rabanser, Sergio Sommavilla, Armin Grunt, Tamara Tavella, Elfi Gelf, Jochen Gasser, Martin Ruepp, Evi Gasser, Sigmund Holzknecht, Klaus Rungger, Nadia Rungger, Clara Fiegl, Hubert Mair, Karolina Gacke, Oswald Rifesser y Gerhard Ploner.
Per vijité la manifestazion iel de bujën dl coronapas (dlavea, test o varì), de avëi sëura l mascherot y de tenì ite la destanzes.

Vernissaja y matiné leterara
Somonzes a La Pli de Mareo deura le program incö vëndres dales 18:00. Dodoman domënia dales 10:00 saral le pröm apuntamënt de letaratöra
Daurida ofiziala de »somonzes« incö dales 18:00, cun i salüc da pert dles autorités, la vernissaja dles döes mostres personales de Margareth Forer y Mattia Maldonado y renfrësch.
Dodoman domënia ai 18 de messé, dales 10:00, él la matiné »Die Frauen aus Fanis / Le donne di Fanis / Les ëres de Fanis«, te trëi lingac, por Anita Pichler (1948-1997), öna dles scrituries südtirolejes plü lita y conesciüda. Iaco Rigo li fora dla traduziun ladin-marora, Donatella Trevisan dala versciun taliana y Renate Mumelter desco ince Sabine Gruber dala scritöra originala de Anita Pichler »Die Frauen aus Fanis«. Salüt y introduziun: Carlo Suani. Discusciun incër la traduziun. »Les ëres de Fanis« é gnü fora, translaté da Iaco Rigo, dl 2015; »Le donne di Fanis« dl 2020 tla traduziun de Donatella Trevisan da Edizioni alphabeta.
Margareth Forer y Mattia Maldonado
Les prömes döes mostres personales tles cupoles tl zënter d'La Pli de Mareo (che döra spo otedé, cina en mercui sëra) ti é dedicades a Margareth Forer (fia de geniturs de Mareo, vir aldedaincö y insëgna te Gherdëna) che mët fora te öna dles cupoles sü laurs sot al tema »Unicorn«, y a Mattia Maldonado che mostra chedri »zënza titul«.
»Unicorn« é na manifestaziun de magia y de ritual te na figöra fantastica, ireala, mitologica y ludica conesciüda dales cultures primitives cina te nüsc tëmps. Montaja y demontaja dl laur, mit y jüch tres la scultöra, pitöra y intervenziun (performance).
»Zënza titul« é la desmostraziun che l'espresciun é na cossa da vigni de por düc canc, y che al é momënc olache l'esprersciun devënta n debojëgn. Te de te' caji él plajor da ponsé le manco poscibl – dij l'artist Maldonado.

Dolomitale On Tour
Na lingia de films da ti cialé alalergia uni vënderdi ntan dut l instà. La ntreda ie debant
Ncuei vënderdi 16.07. dala 21:15 iel da udëi l segondo film dla lingia, plu avisa tl pavillon a Badia. L se trata dl film »Abel – il figlio del vento«. (Da bur' tëmp vëniel sce n cajo desdit.)
N vënderdi che vën, ai 23.07. dala 21:00 se urteràn sun Pana a S. Cristina per ti cialé al »Alpen Film Festival«, na lingia de films curc per tudësch. (Da bur' tëmp da udëi tla cësa de cultura a Urtijëi).
Y nsci jiràla inant mo cun films d'uni sort mustrei ti luesc plu desferënc de nosta valeda per stlù ju ai 10 de setëmber cun n bel cunzert dla Ganes te dlieja a Urtijëi.
Duc i film à nce sottituli tl'autra rujenedes. L program plu avisa ie da giaté sot a www.dolomitale.com. La ntreda a duc i film ie debant, mé per l cunzert finel saràl da apusté la chertes de ntreda.

Yatra Jazz Quartet
Ultimo cunzerc dla sajon di Jëuni de Mujiga de Gherdëina n mierculdi ai 21.7. dala 21:00 sun plaza de chemun te Sëlva
Do esperienzes curtes cun plu grupes à Enzo Pietropaoli, che sona l contrabas, ulù mëter su nstës na grupa y se à cris trëi de bon musicisć, che ie Fulvio Sigurtà (tumbrëta), Julian Mazzariello (tlavier) y Alessandro Paternesi (percuscions). La ucajion fova n nvit a fé cunzerc tl'India. Nsci nce l inuem »Yatra«, che per urdu uel dì viac.
La carateristica dla grupa ie na maniera formela de fé mujiga, na crissa de cosses scëmples y mpo sotes, che per Pietropaoli, coche strumentist y cumponist, reprejentea n travert da arjonjer. L repertore dla grupa ie n mescedoz danter cumposizions urigineles y pec mprestei da stii de mujiga drët desferënc danter ëi.
L Yatra Quartet ie unì lità dala zaita de mujiga jazz »Top Jazz« coche miëura grupa taliana dl 2013.

Curs da soghé al palé
Por mituns dles scores elementares. Indöt 10 incuntades a La Ila
La Uniun Sport Alta Badia mët a jí sëgn de messé n curs da soghé al palé, che s'oj a mituns dles scores elementares. Al vëgn tigní indöt 10 incuntades, dagnora de lönesc y jöbia, pro le ciamp dal sport da La Ila. Por informaziuns plü menüdes pón cherdé sö Ubi Valentini al 338 3462087.