Manifestazions atuales speziales

Data

23 de messel 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes tla edizion dl 23 de messel
Musiga de Mozart cun »Passo Avanti«
La Ciasa Runcher a Badia ospitëia incö vëndres ai 23 de messé dales 21:15 n conzert dl cuartet »Passo Avanti«
»Bach ess albü gran ligrëza cun Passo Avanti, de chël sunse sigüsc«, él da aldí te reportajes de BR Klassik y NRD Kultur, che lalda le cuartet por la »müda di parameters musicai de toc esistënc te na novité y al vëgn fora n moscedoz ezitant danter musiga classica y jazz. Les metamorfoses é da umor y riches de idees. Imprömadedöt vëgnel le devertimënt dl aranjamënt y dl'improvisaziun y chësc se reporta sön chi che ascuta sö.«
Sëgn pón aldí chësc cuartet ince tla Val Badia, tla cornisc dl festival Badiamusica. L'apuntamënt é por incö vëndres ai 23 de messé dales 21:15, tla Ciasa Runcher a Badia. Le cuartet é nasciü dl 2011 y é metü adöm da Alexander von Hagke (clarinet, fabló), Julia Bassler (vidora), Lucas Campara Diniz (chitara) y Eugen Bazijan (violoncello). Ai portará dant operes de W. A. Mozart, Leopold Mozart y dl sonadú A. von Hagke.

Reinterpretaziuns creatives
»Saving the World! Musical Upcycling« é le titul dl conzert che le festival Badiamusica pîta en lönesc ai 26 de messé dales 21:00 sön paiun d'Al Plan
Protagonisć dl conzert é le grup »Konnexion Balkon« cun Michael Eichele (bas y usc), Steffen Müller (banjo y usc), Sinisa Horn (clavier y usc), Erol Dizdar (cello y usc), Volodymir Trikolenkov (acordeon) y Igor Stavansky (vidora y usc). Le grup cun musizisć internazionai pîta n repertore dër desvalí, olache ai »reanuzëia« musicalmënter toc cone­sciüs. Insciö él da aldí toc sciöche »Il Barbiere di Schwabing« ispiré dala opera de Gioacchino Rossini cina a »Rock me Amadeus« de Falco, o ince »Tricky Canon« ispiré da na opera de Johann Pachelbel, tuta sö plü inant dal grup »Run DmC«.
»Konnexion Balkon« é n grup cosciënt dl ambiënt, che ne scrí nia de nü, mo miorëia ci che é bele, tres so reanuzamënt creatif.

Boé Slackline Show
Ince chësc ann vëgnel pité le spetacul pro le lech de Boà, amesa i crëps dl Grup dl Sela. L'apuntamënt é por chësta domënia ai 25 de messé
Atlec internazionai y dl post, anter chisc Benjamin Kofler, Nazareno Maracantoni y tröc d'atri, incantará cun so spetacul de ecuiliber, sön na corda trata ia por le lech y sön la »highline«. La manifestaziun é chësta domënia ai 25 de messé y mët man dales 13:30. An röia söl post do na cörta spazirada dala staziun dl lift Boé sura Corvara. L'evënt vëgn abelí dai grups musicai »Gota« y »Alphornfreunde Wengen«. Dan la mani­festaziun, dales 11:00 inant, vëgnel organisé n »Sky Aperitif« pro la ütia Boé Alpine Lounge. Sce al foss bur' tëmp, vëgn la manifestaziun sburlada ala domënia 1. de agost.

Efet Clima: contrades che se müda
A Al Plan él da odëi chësc isté na mostra alaleria de Sergio Pitamitz, fotograf de National Geographic, che lascia odëi co che le clima matorin stramüda les contrades
»Efet Clima, la müsa de contrades y natöra che se müda«. Chësc é le titul de na mostra fotografica alaleria, che é da odëi cina ai 19 de setëmber, tl parch »Col dles Cialciares« a Al Plan. Tema dla mostra é i cambiamënc dl clima, che stramüda nostes contrades cun fenomens nia plü da suraodëi. Iceberg giganc che se destaca dal'Antartida o i dlacias de nostes munts che se tira tres plü zoruch. Flora y fauna s'adatëia tresfora y cheriëia contrades demorvëia y ince fora dl normal. N valgünes de chëstes contrades é gnüdes tignides toch cun l'aparat dal fotograf Sergio Pitamitz (che contribuësc pro la »National Geographic Image Collection«). Te sües reportajes fora por le monn ál abiné trasformaziuns evidëntes de habitac naturai. Chëstes trasformaziuns é da odëi tla mostra a Al Plan, organisada dala Cooperativa Turistica en colaboraziun cun Swarovski Optik.

Plajëis y duciaries
En mertesc ai 27 de messé gnarál tigní a Calfosch la manifestaziun »Plajëis y duciaries«, che condüj fora por n itinerar gastronomich
Deplü eserzizi pita na degustaziun de spëisa ducia y sarada, sciöche ince d'atres spezialités tradizionales, diretamënter te so local, dales 10:00 ales 17:00. Ala manifestaziun tol pert le Hotel Gran Ciasa, la Ciasa Dorigo, le Bistrot »La Scola«, le restorant Mesoles, le agriturism »L' Sciadà«, le Hotel Tabladel y le Altrove Bar-Food-Lounge.
I eserzizi che tol pert pîta n menü al cost de 42,00€. Plü informaziuns y les chertes de prevenüda ciafon ti ofizi turistics. L'auto pón lascé debann pro le parch dai tiers – Pera Ciaslat, do avëi cumpré la cherta. La mani­festaziun vëgn abelida cun intratignimënt musical de »Pippi's Friends« y »Daniel & Vic«.

Vives Enrosadira
En jöbia ai 29 de messé vëgnel tigní ti pra dlungia la staziun a munt dl lift de Gherdenacia a La Ila, na cëna olache an po amiré l'inrosadöra
Dales 18:00 inant gnarál arjigné ca na cëna cun plü derzades, metüda adöm dai hotí La Majun, Diana y Antines, y la furnaria Gasser. Döt acompagné da n bun gote de vin de Südtirol y d'atres boandes da aperitif. An podará amiré le jí jö dl sorëdl y ascuté la musiga dl grup de intratignimënt musical »Hondmade«.
Te chësta ocajiun restará le lift de Gardenaccia davert plü di, por che i parte­zipanc ne mësses nia rové sö a pe. I posć de partezipaziun é limitá y an pó se scrí ite tl ofize turistich anter le de denant. Sce al foss bur' tëmp, vëgn la manifestaziun sburlada al vëndres ai 30 de messé. Chësc evënt á ciafé le zertificat sciöche »Green Event«, deache la programaziun, l'organisaziun y la realisaziun vëgn fates aladô di criters de sostenibilité y dl'ecologia. La manifestaziun vëgn metüda a jí tl respet dles regoles preodüdes.

Joegn de Mendranza e Musega Jazz
Conzerc de calità a l'averta e da sera enconter con i artisć a La Grenz. Ai 25 de messèl a l'Agritur El Mas Anita Obwegs en quartet
L'aprijièda rassegna JMMJ, endrezèda da La Grenz col sostegn de Comun General de Fascia, Region Trentin-Sudtirol e Provinzia de Trent ge dèsc lèrga te Fascia a joegn musizisć de mendranzes linguistiches. Conzerc a l'averta da les 11:00 inantmesdì e da les 21:00 jam session coi artisć a La Grenz (debant con tessera Arci) prenotan a infolagrenz@gmail.com .
En domenia ai 25 de messèl a l'Agritur El Mas de Moena la ciantarina de Mareo Anita Obwegs (ousc, orghen e chitara) prejenta sie nef CD 'Forza', en quartet con Philipp Schörghuber (contrabas), Karin Kimmeswenger (vidola e flauc) e Lorenz Müller (chitara acustica).
Na musega dai ritmes che ciapa e se muda te gregn tapees sonores olache melodies lijieres e feruscoles sauta anter elemenc de bal folk, world jazz o sons de l'Europa de l'est.

La realtà virtuela fej reviver l Ichthysaur de Secëda
N'atrazion nueva cun esperienza virtuela tl Museum Gherdëina – Ti jì permez ala geologia dla Dolomites te na maniera jughënta
L gran itosaur de Secëda ie n unicum a livel mundiel, l sëul abinà per l tëmp dl Ladinicum. Julé damez da Secëda ulache n à giatà su i osc fossilisei y vester a cunfront cun l gran itiosaur tl mer de Tethys dan 241 milions d'ani: chësta espe­rienza a 360° pieta l Museum Gherdëina a Urtijëi de gra ala realtà virtuela cun chëla che l saur-pësc y si habitat ie unic recostruii a na maniera scienti­ficamënter prezisa.
L'esperienza virtuela fej pert dla vijita ala mostra geo perma­nënta. Tlo pòssen amiré mo d'autri fossii de marueia y la geodes cun cristai d'uni culëur tipiches dla Mont de Sëuc.
Uni mes'ëura vëniel pità na ntroduzion. Per no messëi aspité massa giut pòssen se lascé scrì su danora.
L Museum ie daviert da lunesc nchin sada, dala 10-13 y 14-18.
Per se nuté su: tel. 0471 797554, email info@museumgherdeina.it .
Infos: www.museumgherdeina.it 

Les »somonzes« vá inant
A La Pli de Mareo: insnöt (dales 18:00) él la festa de premiaziun dla IX ediziun dl Pest Angelo Trebo. Chisc dis mët fora Jutta Valentini y Davide Brandlechner sü chedri. En jöbia, ai 29 de messé, dales 18:00, serada de letöra
Le cërtl cultural »somonzes« a La Pli de Mareo vá inant chisc dis cun les mostres personales de chedri de Jutta Valentini (titul: »Isoles«) y Davide Brandlechner (titul: »Raísc«); da odëi vigni de danter les 10:00 y les 18:00, cina en mercui sëra.
Davide Brandlechner
Chedri desco motif y testemonianza dles raísc che l'om á metü y de ci che al é cioscé dinfora. Chësc laur y ritual vá inant ince te nüsc tëmps moderns. Formes geometriches y corusc arcunciá te sperses ispriades dai frabicac rurai y dales viles da paur ladines trasmët na perzeziun intima dla cultura dla natöra incëria.
Jutta Valentini
Pitöres de odüdes y paesaji che plej al'artista, defora y daite. I corusc dl'atmosfera fora por vigni sajun y ora dl de é ispiraziun de ligrëza y emoziun por i edli. Cun l'aumënt dl turism y le progres te nüsc raiuns trasmët l'artista l'aodanza y le debojëgn da ciafé y descurí val' »isola tla natöra« por se destaché dla cuotidianeité y routine, y fossené forzes nöies da jí inant.
Pest Angelo Trebo
Tl contest de »somonzes« él metü ite la premiaziun dl Pest Angelo Trebo insnöt vëndres, dales 18:00, tres a La Pli de Mareo. Dala juria competënta gnaral premié Carlo Suani (1. post), André Comploi (2. post), Roland Verra (3. post), Silvia Liotto (reco­nescimënt), Antonietta Crepaz (reconesciment) y Cristine Call (conscidraziun). Le pröm pest monetar vëgn metü a desposiziun dal impresar y scritur Simon Josef Rubatscher.
Auturs ladins li...
En jöbia, ai 29 de messé, dales 18:00, saral spo la serada de letöres leterares cun Nadia Rungger, Christian Ferdigg, Jasmin Ferdigg y Simon Josef Rubatscher. I toc portá dant sará te deplü lingac. Entrada debann!