Manifestazions atuales speziales

Data

30 de messel 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 30 de messel
»Na munt de emoziuns«, cun Simone Moro
Alpinisć conesciüs a livel internazional cunta de sües esperiënzes tles munts: ai 6 d'agost él na incuntada cun Simone Moro
La seria de referac cun i alpinisć y personaji liá ales munts dal titul »Na munt de emoziuns« vá inant tles proscimes edemes. Ai 6 de agost podarán tó pert al'incuntada cun Simone Moro, che cunta dla spediziun plü prigorosa de süa vita sön la munt Gasherbrum. Tl pre sura la staziun a munt dl lift »La Crusc1«, presentarál dales 10:30 so liber »Ho visto l'abisso«, olache al cunta de sües esperiënzes plü emozionantes y prigoroses. Sce al foss bur' tëmp, vëgn la incuntada tignida dales 17:30 Ciasa Runcher a Badia.
Porsones cun andicap deura vies
Ai 23 de agost dales 21:15 gnarál presenté tl salf dles manifestaziuns a San Ciascian le proiet »Arrampicande«, porté dant da döes porsones cun andicap, che á daurí deplü vies da arpizé tl Perú.
11.000 km cun la roda
La iniziativa se stlüj jö ai 6 de setëmber, cun l'incuntada adöm cun David Niederkofler. Do 11.000 km cun la roda ál arjunt le ciamp basa dl Everest. Chësc apuntamënt vëgn tigní tl salf dles manifestaziuns da Corvara, dales 21:00.
Les serades di 6 y 23 d'agost é por talian, la sëra di 6 de setëmber por todësch. Düc i apuntamënc vëgn tignis tl respet dles regoles preodüdes.

10 agn Museum Ladin Ursus ladinicus
Chësta sabeda ai 31 de messé festejëia le Museum Ladin i 10 agn de ativité dla sënta da San Ciascian dedicada ala laurs dl ander de Conturines
Al é 10 agn ca che al é gnü daurí le Museum Ladin Ursus ladinicus a San Ciascian. Le iubileum vëgn festejé chësta sabeda ai 31 de messé. Por l'ocajiun podarán vijité le museum debann, dales 10:00 ales 18:00. Tl Museum a San Ciascian él da odëi deplü sön la storia dla laurs ladina y dles Dolomites, mo an pó ince ciafé fora tröp sön les laurs che vir ciamó aldedaincö y sön i mudamënc climatics.
Chësc de vëgnel pité vijites menades dales 10:00, dales 15:00 y dales 17:00 (por i grups él na limitaziun de 10 porsones). Nia inultima gnarál ince pité ativités por mituns (dai 5 ai 12 agn) dales 11:00 y dales 16:00. Döt debann. Les prenotaziuns por les vijites y les ativités vëgn tutes sö te Museum al 0474 524020.
Dan le museum sarál ince n punt de informaziun cun i colaboradus dl Parch Natu­ral Fanes – Senes – Braies. Le de vëgn organisé en cola­bo­raziun cun l'Ofize Natöra y l'Assoziaziun Turistica Alta Badia. Informaziuns ciafon al 0474 524020, e-mail info@museumladin.it , web www.museumladin.it 
Le Museum ciafon ince sön Facebook sot a www.facebook.com/MuseumLadin y sön instragram sot a www.instagram.com/museumladin 

Incuntades cun l'autur
La manifestaziun leterara »Un libro, un rifugio. Incontri con l'autore« curada da Gianna Schelotto, röia chësc isté ala dejedotejima ediziun
Dal 1. ai 20 d'agost vëgnel tigní deplü incun­tades cun personaji dla leteratöra taliana, ti salfs dles manifestaziuns di paisc dl'Alta Badia. Döes presentaziuns vëgn tignides alaleria, cun la natöra sciöche culissa. Tratan les presentaziuns gnarál traté deplü temesc d'atualité y n valgügn apuntamënc gnará abelis dales melodies de Simona Bondanza, Alessandro Trebo y Roberto Gorgazzini.
I apuntamënc
01.08. – 17:30 a Corvara: »Un giorno lo dirò al mondo« de Alessandro Milan, cun Paolo Mazzucato, serada cun musiga;
03.08. – 17:30 a La Ila: »Il cielo stellato fa le fusa« de Chiara Francini, cun Gianna Schelotto;
04.08. – 17:30 a Corvara: »Palloni. Campioni. Nazoni – Un racconto in musica« de Beppe Severgnini, cun musiga;
08.08. – 17:30 a Corvara: »La rappresen­tazione« de Romana Petri, cun Guido Rispoli;
12.08. – 17:30 a Corvara: »Non perderti niente« de Luca Barbarossa, cun Alberto Faustini;
14.08. – 17:30 a Corvara: N dialogh cun Carlo Cottarelli y Dino Pesole, serada cun musiga;
16.08. – 10:30 sö La Crusc: »A grandezza naturale« de Erri de Luca, cun Michil Costa;
17.08. – 17:30 a Corvara: »Tempo: il sogno di uccidere Chrònos« de Guido Tonelli, cun Alberto Faustini, serada cun musiga;
19.08. – 10:30 sura la staziun a munt Boé: »My Way: zio Bricco che ricette!« de Francesco Aquila, cun Michil Costa;
20.08. – 17.30 a Corvara: »Uomini: è ora di giocare senza falli!« de Tiziana Ferrario, cun Guido Rispoli;
Les incuntades vëgn metüdes a jí tl respet dles regoles preodüdes. I posć é limitá.

Degustaziun de bira artejanala
Le Ciastel Colz a La Ila i fej tratan l'isté da cornisc ai apuntamënc cun la degustaziun de bira artejanala de Südtirol
Le proscim apuntamënt cun na degustaziun de bira artejanala é en vëndres ai 6 de agost dales 17:00, olache n produzënt da Tlüses presentëia les carateri­stiches de süa bira, tla curt dl ciastel. I partezipanc podará ciarcé plü sorts de bira. Na degustaziun vëgn ciamó tignida ai 24 de setëmber. Por podëi tó pert, él da se scrí ite ti ofizi turistics dl'Alta Badia, anter le de denant. L'ini­ziativa vëgn metüda a jí tl respet dles regoles preodüdes.

Dolomites Yoga Days
Dai 3 ai 6 de agost vëgnel metü a ji tl'Alta Badia n program cun deplü workshops y cursc de yoga cun Egon Castlunger. Por prinzipianc y progredis
Al gnará mostré ativités cun azënt sön les posiziuns fisiches, la dërta respiraziun y la pert meditativa dl yoga. Le mertesc ai 03.08. vëgnel naota fat na cörta escurjiun che pëia ia dales 10:00 tla plaza da parché dl Sciaré, por rové cina al Sas Dlacia. Dailó vëgnel tigní na leziun alaleria, dedicada a eserzizi por la stabilité dl corp. Le mercui ai 04.08. s'incunton dales 10:00 pro l'ofize turistich da La Val. Dedô vëgnel fat na cörta escurjiun cina ala dlijia de Santa Berbura, olache al vëgn spo tigní na leziun de yoga. La jöbia ai 05.08.sarál na leziun pro la ütia Planfistí sura Ciaulunch, che mët man do na cörta spazierada che pëia ia dales 10:00 da la ütia La Tambra. I »Dolomites Yoga Days« vá a piz le vëndres ai 06.08. cun na leziun dedicada al Pranayama y ala meditaziun. Dales 10:00 se incunton pro la Capanna Alpina por jí a pe cina sön Scotoni. Les iscriziuns é da fá ti ofizi turistics dl'Alta Badia, anter le de denant. I »Dolomites Yoga Days« gnará ciamó tignis n iade de setëmber. La manifestaziun vëgn metüda a jí tl respet dles regoles preodüdes.

Mostra »Paesaje tla Ladinia«
Dai 2 ai 31 d'agost él da odëi tl Istitut Ladin »Micurá de Rü« a San Martin na mostra cun retrac y sugestiuns de nostes contrades
Le Fotoclub Val Badia á le plajëi da comuniché che dal lönesc, ai 02.08.21, sarál tl Istitut Ladin »Micurá de Rü« a San Martin de Tor da odëi la mostra cun le tema »Paesaje tla Ladinia«. Ara restará daverta cina en mertesc ai 31 de agost, tratan i orars dla biblioteca dl Istitut.
Fotografs che tol pert ala mostra a San Martin é Costa­biei Uli, Dapoz Carlo, Erardi Alfred, Elzenbaumer Ester, Elzenbaumer Helmut, Pescoll Andreas, Ploner Ulrike, Ploner Frida, Rungger Florian, Sottara Freddy, Tolpeit Zeno.

»Charing« – soghé por n bun fin
Valur sozial, pasciun por le sport, gastronomia y tradiziuns dl post.Ai 7 y 8 de agost vëgnel tigní l'evënt »Charing – Charity & Sharing in alta quota«
Ara se trata de na incuntada de apascioná dl golf y dles munts, por na bona gauja. La devisa de »Charing« é chëra de soghé a golf alaleria tles Dolomites, amiran le panorama, se gode spezialités dl post y fá dl bun. Te chësta ocajiun vëgnel naota tigní n torné de golf tl ciamp dl Golf Club Alta Badia, y dedô vëgnel soghé inant te d'atri percursc y te d'atri posć – cinamai sön la Gran Risa a La Ila. Deperpo pón ince ciarcé n gröm de spezialités tles isoles de degustaziun, pitades da Norbert Niederkofler, Giancarlo Morelli, Nicola Laera, Andrea Irsara y Claudio Sadler. Por stlü jö l'evënt vëgnel tigní na cëna gourmet cun la premiaziun. L'obietif de chësta organisaziun é chël da sostigní les realtés dl terzo setur y deperpo cherié na ocajiun olache an pó imparé da conësce jënt nöia. L'ativité de ciarité é dedicada al'istitut Serafico de Assisi. Por podëi tó pert a chësc evënt él da paié ite na cuota de partezipaziun y an adora le Green Pass. Info: www.charing.events .

Dolomites Star Party
Descurí le cil deboriada cun esperc y apascioná. Chësc isté pón le fá a San Ciascian, a Calfosch, a Al Plan y sön Börz
Iniann d'isté vëgnel pité te plü posć l'iniziativa »Dolomites Star Party«, olache an pó descurí les carateristiches dl cil deboriada cun plü esperc y apascioná. L'iniziativa vëgn tignida tl'Alta Badia a San Ciascian y Calfosch, spo a Al Plan y sön Börz. Dai 2 ai 5 d'agost gnarál pité n program rich de referac, incuntades y osservaziuns dl sorëdl y dles stëres.
Le program mët man ai 02.08. dales 21:15, sön paiun da San Ciascian, olache al vëgn tigní n talk show cun le jornalist scientifichLuigi Bignami.
Escurjiuns da sëra a Pederü y Calfosch
Ai 02.08. dales 22:00 s'incunton ta Pederü, daite d'Al Plan, olache al é la poscibilité da tó pert a na escurjiun da sëra, por odëi stëres, planec y costelaziuns. La serada vëgn acompagnada da dui esperc de astronomia. La partezipaziun costa 7,00€ a ce.
La medema incuntada vëgn tignida ai 03.08. dales 22:00, en chësc iade a Calfosch, tla Val Edelweiss.
Recort de Rodolfo Calanca
Ai 04.08. dales 21:00 vëgnel tigní sön paiun d'Al Plan na serada sön l'atronomia, en recordanza de Rodolfo Calanca. Ala pert sarál Luigi Bignami y d'atri scienziá.
Ti ciaré ales stëres cun sotfunz de clavier
Le punt culminant dla »Dolomites Star Party« é dessigü la gran osservaziun dles stëres sön Börz, ai 05.08. dales 21:00 ales 23:30, acompagnada da n conzert de clavier. Por chësta sëra vëgnel pité n sorvisc de shuttle cina sön Börz. Sce al foss bur' tëmp, vëgn l'osservaziun spostada al de do. Les preno­taziuns mëss gní fates anter le de denant ti ofizi turistics d'Al Plan y dl'Alta Badia.

Ispiraziuns de Bach
Sot al titul »Bach Inspirations« él Antonio Pantalone che pîta ai 2 d'agost n conzert de Badiamusica sön l'orghe de Badia
En lönesc ai 2 d'agost dales 21:15 se sposta le Festival Badiamusica te dlijia de Badia, olache l'orghelist Antonio Pantalone, ann 1997, pîta le conzert dal titul »Bach Inspira­tions«. L'orghelist s'á diplomé cun les notes plü altes y lalt de orghe y composiziun pro le conservatore »L. D'Annunzio« de Pescara. Danter i traverc ál davagné le pröm pest dl concurs internazional »Fiorella Benetti Braz­zale – Città di Vicenza« y á ince colaboré cun l'orchestra »Novi Toni Comites«.
Tl conzert a Badia sarál da aldí operes de Johann Sebastian Bach, mo ince operes de componisć che é de val' vers liá a d'ël: Girolamo Frescobaldi, Antonio Vivaldi y Dietrich Buxtehude.

Les »somonzes« vá inant
A La Pli de Mareo: chisc dis él da odëi tles Cupoles le proiet artistich de Helmut Pizzinini y Giulia Bortolini. En mercui, ai 4 d'agost, dales 21:00, saral la serada leterara cun la rezitaziun de Maria Pedevilla dal »Fanneslied« de Karl Staudacher (1875 – 1944)
Le cërtl cultural »somonzes« a La Pli de Mareo vá inant chisc dis cun la mostra de dui de Helmut Pizzinini y Giulia Bortololini che se dá jö cun le tema »Tera Ladina«. Da odëi ésera vigni de danter les 10:00 y les 18:00, cina en mercui sëra.
Proiet artistich »Tera Ladina« de Helmut Pizzinini y Giulia Bortololini
Racoiüda de laurs dedicá ala cultura ladina, che á l'intenziun y le travert da cherdé tl recort la gran richëza de nosc popul y de nosta Tera. Na odüda sota, intensiva y incher­sciora al tëmp passé, che lasciará, defat, n sëgn tl cör de chi che aprijará la mostra cun interes y curiosité.
Rezitaziun dal »Fanneslied«
En mercui, ai 4 d'agost 2021, dales 21:00, portará dant la scrituria Maria Pedevilla les perts plü significatives y beles dl epos de Karl Staudacher, tl lingaz original todësch.
»Ert te ciasa« y »Musiga ladina te plaza«
Te otedé, en vëndres ai 6 d'agost 2021, dales 18:00 inant sarál spo tl zënter de paisc a La Pli de Mareo la mostra y le marcé de laurs creatifs de artisć y artistes dl tëmp lëde de Mareo. Dales 20:00 inant sarál le conzert de »musiga ladina te plaza«.
Por jí a trames les manifestaziuns gnaral damané ala jënt dai 12 agn insö le »green pass« o le test antigenich nia plü vedl co 48 ores.

Tublà da Nives: Mostra »Ces« de Lois Anvidalfarei
La giaurida ie n juebia ai 5 de agost dala 18:00
Ntan l mëns de agost saràl da udëi tl Tublà da Nives te Sëlva na mostra dl scultëur badiot, scialdi cunesciù y stimà, Lois Anvidalfarei. Cun »Ces« (cëves) uel Anvidalfarei fé n viac spirituel tl luech dla cuscienza y dla rejon, l ie na secuënza de emuzions y de esperienzes che uniun de nëus fej te si vita da uni di. L ie dantaldut na reflescion laica n con' dla tematica for atuela dl'ejistënza umana y di valores dl tëmp y dla ratio, śën sciche śën mo plu mpurtanc per gauja di avenimënc storics che vivon.
»Ces« ie tl medem mumënt n percurs da fé a pe tres la cater sales dla mostra tl Tublà da Nives, ulache l ie metudes ora 17 scultures de bront o de ghips de grandëzes defrëntes, realisedes da Lois Anvidalfarei ntan i ultims vint ani. La scultures ie te n dialogh cun na lingia de dessënies che à da nfé cun la medema tematica.
Lois Anvidalfarei ie nasciù dl 1962 y ie jit tla Scola d'Ert a Urtijëi; da dedò iel jit inant a studië tl'Academia der Bildenden Künste a Viena. L ie cunesciù per si lëures scialdi espresifs, che simbulisea la putënza, ma tl medem tëmp iesi nce lesieres. L scultëur à nce abù l unëur de realisé truep lëures publics coche »Metànoia« a Bulsan tl verzon dla scola Claudiana, pona la »Fassade der Hoffnung« a Dispruch y la »Hommage an Friedrich Gulda« a Viena. Oradechël se àl nce fat n inuem per i alestimënc de presbiteresc y auteresc de dliejes. Longia ie nce la lista dla mostres te nosc raions y nce oradeca. Ël viv y lëura a Badia.
Pra la giaurida n juebia ai 5 de agost dala 18:00 fajerà Alessandro Casciaro la ntroduzion artistica. La mostra resterà davierta nchin ai 29 de agost, uni di dala 16:00 nchin ala 19:00. De dumënia, merdi, mierculdi y vënderdi iela nce davierta da sëira dala 20:30 nchin ala 22:00.
Duc ie nviei de cuer. Nfurmazions giàpen nce sot a www.tubladanives.it .

Festa ta mont 2021
Ve speton te Val de Sèn Nicolò l prum de aost con festa, magnadiva e spetacoi
L Comitat con le sociazion de volontariat del comun endreza la 13^ edizion de Festa te Val de Sèn Nicolò, anter Ciampié e Ciamp, en verscion mingol più lijiera, demò la domenia prum de aost, con chest program:
10:00 – scomenz de la festa: distribuzion del libret su la eves 'Te mie picola gofa'
11:00 – ti pré de Ciampié: messa dita da don Andrea
12:00/15:00 – da la 'Ciasa da fech Festa ta Mont, anter Ciampié e l Monument: marena con l 'piat Maerins' o l crofen 'Col Ombert' su prenotazion
13:00/18:00 – ló dal bait la Marmotta, nosce golosarie: fortae e sone da pomes
14:00 – te Ciampié: prejentazion de la mostra 'Attraverso Vaia'
14:30 – spetacol Circen Dolomites Festival: Circo a pois, con Francesca Poppi Mari
15:30 – sul percors da Ciampié fin ta Ciamp: 'L bosch: musega e contìe'
16:00 – 'L vascel da la eves', percors con la sociazion 'Apicoltori di Fiemme e Fassa'
16:30 – 'Rejonon dal Giaf', spetacol sul Giaf con Simon Kostner e David Dorich.
Per la magnadiva ge vel se prenotèr sul sit www.festatamont.it 

Taca l Circen Dolomites Festival
Dal prum ai 8 de aost ogne dì te Fascia spetacoi da marevea
3^ edizion de l'event de INOUT che porta la jocoleria te paìjes e monts de Fascia.
Al prum de aost:14:30, ante­pruma te Val de Sèn Nicolò (se l'é burt 21:00 te tendon de Poza).
Ai 2: 21:15 a Vich te Piaz Massar spetacol leà a la mostra »Play« (o 21:00 te tendon de Vich)
Ai 3: 13:30 sun Ciampac (o 17:00 a Cia­nacei); 21:00 a Ciam­pestrin al PalaDolomites e sun Pianac a Vich tel bosch con la Scola de Circo Bolla di Sapone.
Ai 4: 13:30 sun Ciampedie La Sbrindola; 18:00 a Poza CircenAperitif te Piaz del Mal­ghèr e 21:00 artisć sun strèda (o te tendon).
Ai 5: 13:30 sun Duron (o 17:00 jun Ischia) e 21:00 a Moena te piaz (o te Navalge).
Ai 6: 06:00 sun Ciampedie conzert de l'èlba vejin a Pra Martin; 13.30 spetacol sun Vael e 21:00 a Cianacei te piaz (o te chino).
Ai 7: 13:30 sun Bufaure vejin a Baita Cuz (o 17:00 te tendon a Poza); 18:00 e 21:00 a Vich te Piaz Massar (o te tendon).
Ai 8: 13:30 sun Gardecia (o 21:00 te tendon de Poza) Circen­sema e Michela Marangoni porta dant »L giat coi stivai da mont«.
Program su www.circendolomitesfestival.com 

Juesc da d'Instà sun Renon
Pra l teater »Das Gasthaus am See – La ustaria pra lech« féjel nce pea l'atëura de Urtijëi Hanenn Huber. Da udëi mo nchin ai 13 de agost
La va de mazamënc, pra l teater sun Renon, i »Rittner Sommerspiele«. La trama: na lingia de mazamënc fej resté zënza fla na zità ntiera. Sun dut l raion zitadin vëniel rubà beliejes de gran valor. L assassin mascrà ie for bon de ti mucé ala polizia, nce sce l lascia for do n si sëni de merca: »la man foscia.« (c. nce l articul sot ala plates de Gherdëina).
L reghisser ie Konrad Hoch­gruber. I atëures ie Hanenn Huber, Julian Pichler, Werner Hohe­negger, Jos Niederstätter, Joachim Mit­terutzner y Andreas Penn.
L teater ie mo da udëi ncuei vënderdi ai 30 de lugio, n lunesc ai 2 de agost, n mierculdi ai 4 de agost, n vënderdi ai 6 de agost, n lunesc ai 9 de agost, n mierculdi ai 11 de agost, n juebia ai 12 de agost y n vënderdi ai 13 de agost. L scumëncia for dala 21.00. Per infos plu avisa www.rittnersommerspiele.com .

Joegn de Mendranza e Musega Jazz
Conzerc de calità sa mont e da sera enconter con i artisć a La Grenz. Insnet la romancia Ursina
L'aprijièda rassegna JMMJ, endrezèda da La Grenz col sostegn de Comun General de Fascia, Region Trentin-Sudtirol, Provinzia de Trent e Comun de Moena ge dèsc lèrga te Fascia a joegn musizisć de mendranzes linguistiches. Da les 11:00 l'é l conzert a l'averta e da les 21:00 jam session coi artisć a La Grenz (debant con tessera Arci) prenotan a infolagrenz@gmail.com .
Anché vender 30 de messèl l'apuntament l'é sun Costabela sun Sèn Pelegrin con Ursina & Band dai Grijons. Apede a Ursina l'é Vojko Huter a la chitara, Florian Egli al bas e Maxime Paratte a la bateria. Ursina é nasciuda te na picola vila anter i monc svizeres e sie univers musical refinà à tout sù elemenc da la musega classica, dal folk, dal pop e da la cianties populères te sie lengaz mère, l romanc.
En vender ai 6 de aost te Fuciada sarà enveze l Jemm Music Project con l badiot Max Castlunger.