Manifestazions atuales speziales

Data

06 de agost 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes tla edizion dl 06 de agost
»Musiga ladina te plaza«
Insnöt, vëndres ai 6 d'agost 2021, dales 20:00 inant, te plaza de paisc a La Pli de Mareo
Al sonará y ciantará chisc inter­prec, chëstes ciantauturies, sciö­che ince chisc grups: Martina Iori (Fa­scia), Alexander Dal Plan y Amisc, Iaco Rigo y Compagns, Laura Willeit & Hubert Dorigatti, Daniel Willeit y Marion Palfrader, y le duo rap »Ethnic Techniques«. Organisaziun: EPL – Ert por i Ladins y UCL – Uniun Cian­tauturs Ladins. Spëisa y boandes: Grup Jonëza La Pli. Assistënza tecnica: Benni Valentin.
Entrada a porsona: 3,00 euro, azes cun »green pass«, por la jonëza cina ai 18 agn él la posci­bilité da fá n test nasal debann söl post!

Les »somonzes« vá inant
A La Pli de Mareo: chisc dis él da odëi tles Cupoles les mostres de Irina Tavella (ceramica / rejila), Georg Erlacher (fotografia) y Gabriele Grones (pitöra). Vernissaja incö, vëndres, dales 18:00
L'orar é vigni de danter les 10:00 y les 18:00, cina en jöbia sëra ai 12 d'agost 2021
Irina Tavella: Copes
I früc coiüs dai lëgns d'altonn arcunciunse cun sües formes y sü corusc te na copa sön mësa. I ún indó ciafé i früc che la natöra á madorí, dala flu d'aisciöda ala saú d'isté. La »natöra morta« cun i früc tla copa n'é nia n motif incherscior tl artejanat artistich dla rejila (ceramica), mo interpretaziun dla »natöra via«: les copes contëgn ti früc la somënza.
Georg Erlacher: Somënza
Somënzes: na questio primordiala, materia prima che ascogn la vita. N mister che mët raisc, spízora y florësc. Le cërtl dles sajuns toma en toc, a tera. Mëteman y fin, por vita y mort y vita. Le fotograf al'archirida filosofica y manuala dl potenzial figuratif stravardé tla planta y tla somënza, incuntan formes arcaiches de interes aplicatif y de svilup artistich.
Gabriele Grones: naturae
Depënje la natöra sciöche fá n portré de na porsona, coion le sit, la löm y la richëza dl de­tai. Al é na ert che pé passada te nüsc tëmps dai aparac da fá jö y dales cameres ti fonins.
»Ert te ciasa«
Insnöt, vëndres, dales 18:00 inant, él tl zënter de paisc a La Pli de Mareo ince na mostra y n marcé de laurs creatifs de artisć y artistes dl tëmp lëde de Mareo. Dales 20:00 inant él spo le conzert de »musiga ladina te plaza« (ciara avis de sot!)

Thabata Arduini y si »Torpore Atarassico«
La vernissage dla mostra tla sala dla Lia Mostra d'Ert – Circolo sarà n vënerdi ai 13.08. dala 20:30 cun ntroduzion de Lugi Ramoni. La mostra resterà davierta nchin ai 29.08. uni di dala 10:00 nchin la 12:00 y dala 18:00 nchin la 22:00.
Aspité nia minà coche se aspité velch de cuncret, ma coche n vester belau ontologich dla persona che ie śareda ite te n tëmp che ne ie nia plu lineél, ma tóch y stracëus. N tëmp da chël che se n mucé ne n'ie per nia, ma che ie scialdi mpurtant per mantenì viva la flama dla vita. Chësta cundizion y chësc pont de ududa dl aspité y dl tëmp che vën suvënz ascundù tl subconsce, devënta l zënter tematich ntëur a chël che l ie idealisà la mostra »atarassic torpor« de Thabata Arduini.

Terza Academia da d'Instà de Gherdëina
Duman sada ai 7 de agost saràl la mostra di lëures a Puntives
La Lia La Vëta nvieia duc y dutes a unì a ti cialé ala mostra di lëures tla berstot tl raion artejanel a Pun­tives Nord nr. 13 du­man sada ai 7 de agost dala 10:00 nchin la 17:00. Dala 11:00 saràl da audì la paroles dl'autoriteies cun nce i/la reprejentanc/tes de vel' lia de ert dla valeda.
Pra la mostra saràl la ucajion de ti cialé ai lëures pra chëi che i studënc y la studëntes à laurà doi enes alalongia per chësta terza edizion dla Academia da d'Instà de Gherdëina.
Per plu nfurmazions pòssen cialé do sun la plata ufiziela https://it.summeracademygardena.com .

Joegn de Mendranza e Musega Jazz
Conzerc de calità de dì a l'averta e da sera a La Grenz. Anché Jemm Music Project con Max Castlunger
Va inant l'aprijièda rassegna JMMJ, endrezèda da La Grenz col sostegn de Comun General de Fascia, Region Trentin-Sudtirol, Provinzia de Trent e Comun de Moena. Anché vender ai 6 de aost da les 11:00 te Fuciada l'é Jemm Music Project, con l poli­strumentist badiot Max Castlunger, Andrea Polato a la bateriìa, Mirko Pedrotti al vibrafon, Marco Stagni contrabas e bas eletrich, Matteo Cuzzolin sax tenor e Hannes Mock trombon.
N projet che pea via da la world music, passan da esprescions sćiantives de popoi veiores per ruèr a l'improvisazion e la musega dance de anchecondì, con strumenc improvisé con elemenc de la natura che passenea con l'ambient dolomitich.
L grop sarà ence per la jam session da les 21:00 a La Grenz (debant con tessera Arci) prenotan a infolagrenz@gmail.com.

Performance y giaurida dla mostra »Georitmie« de Mona Lisa Tina
Ncuei vënderdi ai 06.08. dala 18:30 y dala 20:30 iel da udëi na performance dl'artista Mona Lisa Tina tla galaria Vijion a Puntives. La curadëura ie Livia Savorelli
La performance ie na forma d'ert che viv dl mumënt y ne possa nia unida fata mo n iede unfat. L ie rie da la descrì, pervia che la se basa suvënz sun plu formes d'ert, coche mujiga, leteratura, teater, bal o nce di mesuns tecnics dl video y dla foto­grafia. Cun la per­formance arjonj l'ert la sëida plu sutila danter ert y vita. La persona o l publich vën nstës tucà y fej nsci pea ativamënter y mentalmënter.
Na bela ucajion per udëi na tel performance se pieta ncuei da sëira, ulache l'artista Mona Lisa Tina prejënta si perfor­mance y mostra persunela dal titul »Georitmie«. Pervia dla restrizions anti-Covid-19 prions bel de fé al savëi sce sëis nte­ressei a ti cialé ala performance dala 18:30 o dala 20:30 – tel. 3382098697 – info@vijion.it.

»Dialogo musicale«
Chësc le titul di conzerc de musiga baroca che vëgn tignis ai 12 d'agost a La Pli y ai 13 a Badia
Le festival Badiamusica pîta en jöbia ai 12 d'agost dales 20:30 te dlijia da La Pli y en vëndres ai 13 d'agost dales 21:15 te dlijia de Badia le conzert »Dialogo Musicale«. Da aldí él operes de Johann David Heinichenì, Georg Philipp Telemann, Antonio Caldara, Johann Sebastian Bach y Signore (Louis) Detry. Al sona l'ensemble »Re-Sonanz« Ulrike Hofbauer – sopran, Priska Comploi – fabló y oboa baroca, Philipp Comploi – violoncello y Franz Comploi – orghe.

Cuncors de proietazion per la Cësa di Ladins
Prejentazion di proiec, giaurida dla mostra y premiazion ncuei vënderdi ai 6 de agost dala 17:00 te Cësa di Cungresc
De merz de chëst ann iel unì stlut ju l cuncors de proietazion scrit ora dal Chemun de Urtijëi a livel europeich per la Cësa di Ladins. L Chemun mët śën a jì na mostra cun dui 13 i proiec che à pudù fé pea pra l cuncors. Ntan la sëira uniràl prejentà plu avisa l proiet di architec Rudi Perathoner, Andreas Lengfeld y Pavol Mikolajcak, che à venciù l cuncors, y l unirà nce dat ora n catalogh.
La prejentazion sarà n vënderdi ai 6 de agost dala 17:00 tla gran sala de Cësa di Cungresc a Urtijëi. Da dedò uniral jit tla sala Luis Trenker basite per la giaurida dla mostra. Duc ie de cuer nviei. Per vester leprò pra la manifestazion iel debujën de avëi l Green Pass.
La mostra sarà da udëi nchin ai 22.08., for de mierculdi nchin de dumënia dala 10:00 nchin la 12:00 y dala 16:00 nchin la 19:00; de vënderdi nce dala 20:00 nchin la 22:00.