Manifestazions atuales speziales

Data

13 de agost 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes tla edizion dl 13 de agost
Curs de proietazion y stampa 3D
La Lia Mostra d'Ert – Circolo mët a jì n curs per jëuni y jëunes dla scola mesana. L curs scumëncia ai 25.08., iscrizions daviertes nchin ai 20.08.
I orars ie:
  • ai 25.08. 09:00-12:00 y 15:00-18:00
  • ai 26.08. 09:00-12:00 y 15:00-18:00
  • ai 27.08. 09:00-12:00
  • ai 02.09. dala 15:00 prejen­tazion di lëures tla sala dla Lia Mostra D'Ert – Circolo a Urtijëi.
I referënc sarà Martin Demetz y Sara Solderer.
Per l curs ie l cuntribut de iscrizion de 60 €. Da se lascé nuté su y paië ite l cuntribut iel tla biblioteca d'ert dl Circolo nchin ai 20.08.. Per plu nfurmazions: 377 5936350.

Jöbia de Corvara
Aperitif cun l'ert ladina, en jöbia ai 19 d'agost
En ocajiun dla jöbia de Corvara di 19 de agost vëgnel indô tigní n aperitif dediché al'ert ladina. Al sará plü artisć dl post che presentëia sües operes d'ert, che sona o cianta melodies locales y lí dant poesies. N domisdé rich de ert, olache an pó se gode n bun aperitif ti locai dl zënter de Corvara, che vëgn stlüt al trafich dales 16:00 ales 22:30. Pro chësta Jöbia de Corvara podarán ascuté sö tl Hotel Tablé les poesies de Christian Ferdigg d'Al Plan, y tó pert tl Adlerkeller a n jüch de domanda y resposta cun Simon Kostner. Le duo »Gota Music« da La Val se crüzia dl intratignimënt musical, che gnará pité tla Stüa dal Tê, l'artejan Hubert Pezzei da Lungiarü mostra pro le Berghotel Ladinia l'ert dl ziplé le lëgn, y le jonn Manuel Crazzolara da La Ila dessignará retrac y caricatöres, tl Iceberg Lounge Bar. La manifestaziun vëgn tignida dales 16:00 ales 19:30, tres tl respet dles regoles preodüdes. Por tó pert al evënt vëgnel damané le Green Pass.

Scora de palé a La Val
La US La Val mët a jí en colaboraziun cun l'alenadú Davide Moling na scora dl palé
Le fin dla scora dl palé é da ti fá conësce a mitans y mituns interessá le monn dl palé y ti insigné les bases fondamentales de chësc bel jüch de scuadra. Les sesciuns de alenamënt metará man de setëmber y jará inant cina de dezëmber, söl ciamp dal sport y te palestra a La Val. Ala scora dl palé podará tó pert mituns y mitans da 5 a 8 agn. Dis y orars plü avisa gnará comunicá plü inant.
Chësta é na ocajiun por podëi imparé valch de nü y podëi insciö crësce adöm te n grup.
Por motifs de organisaziun é düc i interessá periá da se anunzié sön le link publiché sön la plata internet y facebook www.uslaval.it . Por d'atres informaziuns pón cherdé sö Davide al 340 5090762.

I gragn da Víena
La festival Badiamusica inviëia ai 16 d'agost al conzert cun le »Duo Mosca & Goy«. Söl program operes di »gragn vienesc« Mozart y Beethoven
»The great Vienneses« é le titul dl conzert söl program en lönesc ai 16 d'agost dales 21:15 tla Ciasa Runcher a Badia. Tla cornisc dl festival Badiamusica sarál da aldí Liana Mosca ala vidora y Pieree Goy al clavier a martí, che forma deboriada le »Duo Mosca & Goy«. Ai portará dant la »Sonate für Klavier und Violine KV 301« de Wolfgang Amadeus Mozart y spo la »Sonate Nr. 9 op. 47 'Kreutzersonate', für Klavier und Violine« de Ludwig van Beethoven. Danter la sonata de Mozart (1778) y la sonata de Beethoven (1803) él trënt'agn amesaite. N tëmp cört, mo te chël che al s'á mudé a funz la conzeziun dla musiga che ê impröma de intratignimënt y che é deventada espresciun dl'anima. Le duo Mosca & Goy »cunta« sön stromënc d'epoca de chësc mudamënt y ince dl'evoluziun dl raport danter le clavier en confrunt dla vidora, jon demez dal rode che chësc stromënt â suradöt de acompagnamënt tratan le tëmp baroch.

Dötes les varietés dl brass
Conzerc cun le cuintet »Belgian Brass Soloists« a Al Plan y Corvara, tla cornisc dl Festival Badiamusica
Sot al titul »Brass diversitiers...!« pîta le Festival Badiamusica dui conzerc cun le cuintet »Belgian Brass Soloists«. I apuntamënc é en mertesc ai 17 d'agost dales 21:00 sön paiun d'Al Plan y en mercui ai 18 d'agost dales 21:00 sön paiun da Corvara (sce al é bur' tëmp spo dales 21:15 te salf dles manifestaziuns). I »Belgian Brass« ê impröma le cuintet »Belgian Brass Soloists«, cina che le diretur artistich Manu Mellaerts â proponü da mëte adöm n grup de musizisć maiú y plü complet, por mioré la cualité artistica dl ensemble. Injuntan la seziun de percusciuns y lauran sön de vigni sort de aranjamënc él gnü fora n ensemble modern y flessibl. Al n'é nia n caje che süa pröma CD á ciafé le titul »Pushing the Limits«. Pro sü conzerc tla Val Badia sarál da aldí sorts de musiga che vá dal renascimënt ala musiga contemporana, dal sinfonich al pop, dal scerio al berloch.

»Vi musicae ad salutem« – Sanità tres la mujiga
Cunzert dl'Orchestra Sonoton n vënerdi ai 20 y n sada ai 21 de agost dala 20:30 te dlieja de Urtijëi
L'Orchestra Sonoton de Gher­dëina, sot ala bachëta de Matthäus Crepaz, Ve nvieia de cuer al cunzert n vendërdi ai 20 de agost y n sada ai 21 de agost dala 20:30 te dlieja de Urtijëi. Ntan l cunzert saràl da audì operes de Bach, Purcell, Barber, Jenkins, Van­gelis y truep d'autri cumpu­sidëures purtei dant da ensem­bles de strumënc a fla y strumënc a archët dl'Orchestra Sonoton.
La chertes de ntreda ie da giaté tl ufize dla Lia dl Turism de Urtijëi. La ntreda ie mé cun green pass dai 18 ani insù; dai 12 nchin ai 18 ani pòssen fé l test dan l cunzert; sot ai 12 ani ne n'iel nia debujën dl test. I musicisć y la musizistes dl'Orchestra Sonoton de Gherdëina se ncunforta sun Vosc unì!

Cunzert dla Scola de Mujiga de Gherdëina
N merdi, ai 17.08. dala 21:00 te Cësa de Cultura te Sëlva. Ntreda debant
L cunzert sarà de jëuni y jëunes, solisć y solistes, dla Scola de Mujiga de Gherdëina che se à fat unëur pra l cuncors »Prima la musica 2021«.
Da scuté saràl danter l auter la posauna, l corn, l tlavier, l oboe, l fagot, l marimba, l flaut traviers. Leprò saràl sam­bën nce samben n valguna sculées che cianterà, cun mujiga dal'epoca de Édith Piaf nchin pra Johannes Brahms.
La ntreda ie liedia y ne n'à nia drë' de se lascé nuté su.