Manifestazions atuales speziales

Data

20 de agost 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes tla ediziun dl 20 de agost
»Funk & Jazz-rock«
Chisc é i stils musical che nes aspeta pro le conzert de »Red Loam«, ai 23 d'agost a Al Plan
Le Festival Badiamusica vá inant en lönesc ai 23 d'agost dales 21:00 sön paiun d'Al Plan, cun le conzert dl grup »Red Loam«, metü adöm da Lucia Kastlunger (usc), Oliver Marec (sax y fabló), Martin Lamla (chitara), Dominik Lehmeier (bas) y Aron Hantke (percursciun).
Le travert de »Red Loam« é colié jazz, rock, soul y funk y da lascé aldí le sonn sides di cover co dles composiziuns personales te na manira spontana y auten­tica, arichis da aran­jamënc y idees nöies. Tres na süa interpre­taziun ciara le grup da ti dé ales operes n sonn daldöt nü. Ritms y »grooves« müda carater y fej deventé i toc caraterisá da na intonaziun soul; toc da n tempo asvelt vëgn deformá y presentá te na manira nöia, ciariada de energia.

Parores de musiga
En jöbia ai 26 d'agost dales 20:30 él tla Ciasa Runcher a San Linert le conzert »Words of Music«. Sön paladina sona le Trio Lignan
Te chësc conzert, che fej pert dl Festival Badia­­­musica, sarál da aldí le grup »Trio Lignan«, metü adöm da Katia Moling ala viola, Nevena Majdeva ala oboa y Nikola Stojković al clavier. Ai portará dant operes dl romantizism de August Klughardt, Charles Martin Loeffler y Robert Kahn. Katia Moling s'á diplomé de viola tl conservatore »L. Cheru­bini« de Firenze. Ara sona dal 2017 incá tla »Orchestra Giovanile L. Cherubini« de Riccar­do Muti y colaborëia cun orchestres desvalies. Nevena Majdevac s'á diplomé te oboa tl medemo conservatore y á colaboré cun orchestres desvalies tla Serbia, tla Bosnia-Erzegovina, a Belgrad y d'atres. Nikola Stojković s'á diplomé de piano tla Université de Kragujevac y tla Facolté de Musica de Belgrad. Al á davagné concursc desvalis.

»Vi musicae ad salutem« – Sanità tres la mujiga
Cunzert dl'Orchestra Sonoton n vënerdi ai 20 y n sada ai 21 de agost dala 20:30 te dlieja de Urtijëi
L'Orchestra Sonoton de Gher­dëina, sot ala bachëta de Matthäus Crepaz, Ve nvieia de cuer al cunzert n vendërdi ai 20 de agost y n sada ai 21 de agost dala 20:30 te dlieja de Urtijëi. Ntan l cunzert saràl da audì operes de Bach, Purcell, Barber, Jenkins, Van­gelis y truep d'autri cumpu­sidëures purtei dant da ensem­bles de strumënc a fla y stru­mënc a archët dl'Orchestra Sonoton.
La chertes de ntreda ie da giaté tl ufize dla Lia dl Turism de Urtijëi. La ntreda ie mé cun green pass dai 18 ani insù; dai 12 nchin ai 18 ani pòssen fé l test dan l cunzert; sot ai 12 ani ne n'iel nia debujën dl test. I musicisć y la musizistes dl'Orchestra Sonoton de Gherdëina se ncunforta sun Vosc unì!

»The Classical Sonata«
Chësc é le titul dl conzert de clavier cun Christoph Declara, che sará da aldí en vëndres ai 27 d'agost dales 20:30, tl salf dles manifestaziuns da San Ciascian
Protagonist dl conzert a San Ciascian é le pianist Christoph Declara, che á studié tl Mozarteum de Salzburg, olache al é spo sté 7 agn assistënt dl prof. Pavel Gililov. Al á spo lauré tla »Hochschule für Musik und Tanz« a Köln y á sëgn süa classa de clavier tl Mozarteum. Süa ativité conzertistica sciöch solist y musizist de musiga da ciamena l'á condüt te plü Paisc dl'Europa y ti USA. Al á davagné deplü pesć da concursc nazionai y internazionai. Pro le conzert di 27 d'agost a San Ciascian portarál dant sonates de clavier dla »Wiener Klassik«, cun operes de Joseph Haydn, Wolfgang Amadeus Mozart y Ludwig van Beethoven.

Gosté sön munt
Pro la staziun a munt dl implant de Gherdenacia vëgnel metü a jí ai 26 d'agost le »gosté sön munt«
Ara se trata de na ocajiun por podëi gosté n iade te n post particolar, amiran les munts de Sas dla Crusc, Lavarela y Conturines. Le gosté sön munt vëgn tigní en jöbia ai 26 de agost dales 8:00 inant y deplü strotöres dl post arjigna ca n gosté rich de produc locai. Döt l'evënt vëgn abelí dai corgn da munt. Al sará la poscibilité da jí sö cun l'implant de Gherdenacia bele dales 8:00 inant. Sce al foss bur' tëmp, vëgn la manifestaziun spostada al de do, vëndres 27 de agost. Por tó pert al gosté pón se scrí ite ti ofizi turistics dl'Alta Badia al prisc de 30,00€. La manifestaziun é sgnüda reconesciüda sciöche »Green event«, n evënt olache an ciara da ti dé ince na gran importanza ala sostenibilité y al'eco­logia. L'iniziativa gnará metüda a jí tl respet dles regoles preodüdes y al vëgn damané le Green Pass.

Plajëis y duciaries
En mertesc ai 24 de agost gnarál tigní a Calfosch la manifestaziun »Plajëis y duciaries«, fora por n itinerar gastronomich
Deplü eserzizi pîta na degustaziun de spëisa ducia y sarada y d'atres spezialités tradizionales, diretamënter te so local, dales 10:00 ales 17:30. Ala manifestaziun tol pert strotöres desvalies, che pîta n menü intier al cost de 42,00€, mo an pó ince cumpré diretamënter la spëisa tl eserzize. Informaziuns y les chertes de preve­nüda ciafon ti ofizi turistics. L'auto pó gní lascé debann pro le parch dai tiers »Pera Ciaslat«, do avëi cumpré la cherta. La manifestaziun vëgn abelida cun intratignimënt musical de »Pippi's Friends« y »Daniel & Vic«. L'iniziativa gnará metüda a jí tl respet dles regoles preodüdes y al vëgn damané le green pass.

Joegn de Mendranza e Musega Jazz
Conzerc de calità de dì a l'averta e da sera a La Grenz. En domenia ai 22 de aost sun Ciampedie »Drumlanduo« dal Friul
Va inant l'aprijièda rassegna JMMJ, endrezèda da La Grenz col sostegn de Comun General de Fascia, Region Trentin-Sudtirol, Provinzia de Trent e Comun de Moena, che ge dèsc lèrga te Fascia a joegn musizisć de mendranzes linguistiches.
En domenia ai 22 de aost l'event ne porta sonorità dal Friul. Da les 11:00 sun Ciampedie se podarà scutèr Drumlanduo. Laura Giavon (ousc) e Marco D'Orlando (percuscions e bas) l'é anter i miores esponenc de la neva generazion jazz del Friul. Sie projet musical fona i piesc te la tera furlèna vardan te l'iperspazie, manejan con ferstont e ironia la tradizion populèra.
Da les 21:00 a La Grenz, te Strada Saslonch a Moena, sarà la jam session con »Animali notturni«; se pel ite debant con tessera Arci, prenotan a infolagrenz@gmail.com .

Simone Bacci, la Mont de Sëuc y si jënt
Ncuei vënderdi, 20.08. dala 17:30 tla Cësa de Cultura de Urtijëi, ancunteda cun l autëur Simone Bacci
Simone Bacci vën bele da na vita sun Mont Sëuc a fé si feries. Te ël iel nasciù na gran pascion y n gran amor per la Mont de Sëuc y nsci àl scrit n liber dal titul »La mia Alpe – Quaranta anni di escursioni in una terra idillica«. L scrij de ponc de referimënt soc, mistics, luesc te chëi che l ie ruvà, chiec y da armunia, che ti à lascià lecorc y emuzions stersces, ulache l raziunel y l sentimënt abina l drë' balanz. Te chësc paravis sun tiera se dejëuj si cunteda autobiografica.
L scrij nce coche l mpera a cunëscer truepa jënt da tlo, danter l auter nce l prufessëur Edgar Moroder. Ntan la sëira cun l autëur Bacci uniràl nce cuntà mpue dla vita de Edgar Moroder y si liam cun la Mont de Sëuc.
Duc ie nviei a unì a scuté su y a rujené pea. Ntreda cun green pass.