Manifestazions atuales speziales

Data

27 de agost 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes tla ediziun dl 27 de agost
»The Classical Sonata«
Chësc é le titul dl conzert de clavier cun Christoph Declara, che é da aldí incö vëndres ai 27 d'agost dales 20:30, tl salf dles manifestaziuns da San Ciascian
Protagonist dl conzert a San Ciascian é le pianist Christoph Declara, che á studié tl Mozarteum de Salzburg, olache al é ince sté 7 agn assistënt dl prof. Pavel Gililov. Al á spo lauré tla »Hochschule für Musik und Tanz« a Köln y á sëgn süa classa de clavier tl Mozarteum. Süa ativité conzertistica sciöche solist y musizist de musiga da ciamena l'á condüt te plü Paisc dl'Europa y ti USA. Al á davagné deplü pesć da concursc nazionai y internazionai. Pro le conzert di 27 d'agost a San Ciascian portarál dant sonates de clavier dla »Wiener Klassik«, cun operes de Joseph Haydn, Wolfgang Amadeus Mozart y Ludwig van Beethoven.

Le bun sonn di stromënc de lëgn
Le Festival Badiamusica vá a piz en mercui al 1. de setëmber cun le conzert »Im Holz vereint – The united Woodwinds«
Le conzert de conclujiun é preodü en mercui al 1. de setëmber dales 20:30, tl salf dles manifestaziuns da Corvara. Protagonisć sön paladina é sonadus y sonadësses dla orche­stra de stromënc a fle de lëgn »Im Holz ver­eint«. La orchestra é nasciüda dl 2018 y al fej pert na cerna de insegnantes y insegnanc dla scora de musiga dl Südtirol. I mëmbri de chësta formaziun par­ticolara entusia­smëia cun so soné rich de temperamënt.
Particolarmënter plajores é les interpretaziuns y les elaboraziuns de operes desfarëntes de David Walters.

Vie nce tu a nudé!
N vënderdi ai 03.09. dala 15:00 tl Mar Dolomit a Urtijëi
L club de nudé de Gherdëina nvieia mutons y mutans dl 2016 y plu vedli a fé pea. N vënderdi dala 15:00 tla nudadoia Mar Dolomit a Urtijëi, saràl na proa de nudé per pona mpartì ite la grupes. N ne à nia drë de se lascé nuté su danora!
Cun i alenamënc scumenceràn ai 04.09. y i sarà danter 2 y 4 iedesc al'ena.
Do n ann cun truepa deficulteies se ncunfertons sun la sajon nueva de alenamënc, acioche nosc atlec posse inò unì regularmënter a nudé, miuré si tecnica y artenienza y nce inò fé garejedes.
L club pieta nce for i cursc de nudé per mutons o nce ëures privates (nce per granc). Nfurmazions plu avisa giàpen tl Mar Dolomit 0471 797131 o pra l club de nudé de Gherdëina sot a nuoto@gardena.net .

Prejentazion dla Bienela Gherdëina∞
N mierculdi ai 01.09. dala 20:00 a Puntives sud 8 o nce online
La lia Zënza Sëida y l team dla Bienela Gherdëina nvieia ala prejentazion dla otava edizion dl avenimënt artistich che unirà a s'l dé n auter ann d'instà.
N prejenterà l presidënt nuef dla lia Zënza Sëida, Eduard Demetz, y la curadëures Lucia Pietroiusti y Filipa Ramos deberieda cun n valgun artisć che fajerà pea pra la proscima edizion cunterà di argumënc, di pensieres y dla vijions per la Bienela 2022 che à sciche titul »Persones«.
Ntan la sëira uniràl nce prejentà l proiet per na mostra daujin a chëla prinzipela, ulache l ti vën lascià lerch ai artisć jëuni, sot a 35 ani, dl Südtirol.
Chi che uel possa nce scuté su la prejentazion online sun facebook, Instagram o sun Zoom (ID: 818 2760 3910 PW: 423425).

Aniverser di 101 ani Circolo - Lia Mostra d'Ert
»I proscimi 100 ani« – manifestazions de ert y cultura
Cun si storia de urmei 101 ani, tol la Lia Mostra d'Ert ite na pusizion zentrela tl ciamp dl'ert y dla cultura dl luech. Chësta istituzion culturela, che ie nasciuda tl 1920, possa cialé de reviers a na storia longia cun milesc de manifestazions unides a s'l dé la gran pert tres l idealism per l'ert de si tëmp. L Circolo-Lia Mostra d'Ert à te chësc centené de vita partì stories y persunajes desfrënc, zënza schivé cunflic cun l'autoritieies y cun la popu­lazion. Te chësc zënter per l'ert ti iel daniëura unì dat la lerch a pensieres inuvatifs, nce radicai, cun la ulentà de svilupé y modernisé la populazion dla valeda. La Lia Mostra d'Ert se à daniëura adatà al bujën atuel, se mudan cun uni cunsëi nuef y purtan i zitadins de Gherdëina n var inant, ti giaurian la porta ora per l mond. L Circolo ie stat determinënt per i mudamënc tl luech de Urtijëi, dajan tres la storia n cuntribut culturel y sustenian la junanza da tlo te si vijions dl'ert. Nchin ncueicundì à la Lia mantenì si carater y cëla for mo de viers de n daunì cun uedli frësc, per pudëi nsci ti dé inant l mpuls ala generazions che vën do.
Per se abiné danter la generazions che à cunlaurà per fé ora dl Circolo chël che l ie al didancuei, se ons mpensà de mëter ju n prugram drët desvalif danter prejentazions de ert, workshops, referac, performances de ert y mujiga. L prugram ie partì su sun trëi dis, da n juebia ai 02.09. nchin n sada ai 04.09. iel na lingia de manifestazions che cëla de viers dl daunì. Te nosc mond for plu y plu digitel, se à l duvier dl'ert mudà y la va de cialé te ce ciamps che l'ert possa avëi si fazion sëuraprò. Cun l titul dla manifestazion »I proscimi 100 ani« ulessans mustré su, che l'ert ne jirà mei perduda, ma coche bele da for tla storia se adatea nce al didancuei l'ert ai mesuns y bujëns de nosc tëmp.
La manifestazions ie te duta trëi la rujenedes dla valeda. L bel mescedoz danter prejentazions de jënt de nosc luech y che vën da plu dalonc caprò, ie de mpurtanza pervia de n barat danter minonghes desfrëntes. I referënc y artisć se desmostra de cualità auta y prufe­sciunalità y speron che l sibe n arichimënt culturel per chëi che vën a cialé pro.
01.-06.09.
Mostra de placac ora dl archif dl Circolo - Lia Mostra d'Ert
Juebia 02.09. tl self dla mostres
dala 15:00 – Prejentazion di lëures dl curs 3D
dala 18:00 – Prejentazion dl liber »100 ani Circolo«
dala 20:30 – Referat cun Andrea Baffoni dal titul »La percezione del futuro – Cento anni di avanguardia dalla nascita dei robot all'epopea del mutante«; dopro saràl nce na descuscion
Vënderdi 03.09. tl self dla mostres
dala 10:00 – Workshop de stampa cun linoleum
dala 15:00 – Prejentazion di lëures dl Symposium 2020
dala 18:00 – Prejentazion dl liber »Sté ert«
dala 20:30 – Referat cun Jerome Becker, Matthias Moroder »MAGAZIN. Aus­stellungsraum für zeitgenössische Archi­tektur«; descuscion
Sada 04.09. sun Pitla Plaza de S. Antone
dala 10:00 – Workshop de collage tl self dla mostres
dala 16:00 – Performance »Lijënda dl uriginn dl Circolo – Lia Mostra d'Ert«
dala 16:30 – Marion Moroder, mujiga dal vif
dala 17:30 – Thomas Sterna »Wenn das Werk spricht, muss der Künstler schweigen« performance
dala 18:00 – Stefan Demetz y Ivan Schenk, mujiga dal vif
dala 19:30 – Julia Liedel »Der pinke Baum zeigt sich im Wasser« performance
dala 20:00 – Pëufla, mujiga dal vif
dala 21:30 – Mujiga eletronica